Klumech er a First Presidency, Ongelolem el buil 2016

Demad, Omekrael er Kid

Mla er a President Dieter F. Uchtdorf

Ongerung el Counselor er a First Presidency

siasing/Llecheklel

Mla er a President Dieter F. Uchtdorf

Kau ng ngarngii a tang me ke milkengii a baks el mui ra klekedall, me kultebedii a babier el mesaod er a teletelel a bo moleketek er ngii, e omdesuang, “Tia meral diak dodengei a losaod el tekoi”?

Sel le bebil, eng diak el iior er a ungil uldesued e medengelii a rengud, kede mo kursii a tara klekedellel e oker, “Tiang mora keskelel? malechub “Tilechang ng mekera bolsiseb?”

Kede meral mengai el mo checherd a rengud sel domes er tial baks e desa llechukl el kmo, “Ng kired el meleketek er ngii—eai a rekil el morbab.” Le uchul eng dirkak bo dodengelii, meng diak el sebechel moklou a rengud el kirel malechub e kede medengelii a rengud e meruul er ngii.

Sel le bebil eng kmeed el mo osisiu el teletael ngii ma klemedengei er kid er a ebangkelio. Sel domes a bebil ra techetechel, e kede locha mengkas a btelud e omdasu el kmo sel tara techetechel ng kuk mo er ker. Malechub e sel dosuub ra tara techetechel, e kede mo metik el kmo tia ngii mesel le blak a rengud el mesuub er ngii, eng meral diak el sebeched el mo medenglii el kmo sel tara techetechel ngera meng uldimukl er ngii.

A Demad er a Babeluades a Omekrael er Kid

Ng klengeltengat, e le Demad er a Babeluades a mla meskid a meral ungil omesodel a doleketek er a klengar er kid e mengederodel er a mo ungil klechad er kid. A ikal omesodel a oureor el diak el iior er a rekid malechub eng teletael el de ngarngii. Ng mla meskid a ebangkelio ma Ikelesia er a Jesus Kristo. Ng mla meskid a uldasu el kirel omengikiid er kid, sel udasu er a osobeled, el ngii a uldasu el kirel a deureng. Ng dirkak el blal chitid mel dil kid el tang el chelbangel a diak dodengei ma ringelel a klengar, e lolekoi el kmo, “Ka bong. Ma obom ngeltengat kung. Dilekau el omes er ngii.”

Dil merekmo bo le klou a rengud lomes loba klengariou el reng el le blok a uldesued, e kede mo metik er ngii el kmo a Dios a mla meskid a betok el klekedall el mo ungil medengelii a cherrengelel osisecheklel el kirel a deureng er kid er a klengar:

Ng mla meskid a mekreos el sengk er a Chedaol Reng, el ngii a sebechel mo obengked, el olsisechakl er kid sel dosuub a tekingel a Dios e melasem el molab a uldesued ma omerelled el mo osisiu ngii ma tekingel.
Ng mla meskid a 24/7 el sebeched el mo er Ngii lokiu a nglunguuch ma klaumerang e olengit lokiu a ungil moktek er kid.
Ng mla meskid er chelechal taem a re apostol ma re profet, el olecholt a tekingel a Dios er chelechal sils e lobang a ngerachel el mo merenged malechub eng olterekokl el ngar tial beluulechad ma babeluades.
Ng mla lmuut el toketekii a Ikelesia er Ngii—el chelechad er a roumerang el dmak loureor el kaingeseu er a delongelir el oureor el kirel osebelir loba blekongesenges, oltirakl, e ngara deureng el diak a mo uaingii.¹
Ng mla meskid a chedaol llechukl—el llechukl er ngii a tekingel el mei er kid.
Ng mla meskid a betok el bedengel a beches el klekedalll el mo olngeseu er kid er a roled el chedal. Ng betok er a ikal ungil klekedall a sebeched el metik er a LDS.org.

Ngera ma Demad er a Babeluades a mla meskid a kmal betok el ngesou E le Ngii el betik a rengul er kid. E dirrek, el Edam er a Babeluades a millekoi el kmo tiang a urerek e klebkellek—el kirel a klengar el diak bol riid ma diak a ulebengelel klengar er a chad.²

A tara belkul a kmo, a Edam er a Babeluades a Dios er kid, el ngii el Dios a omekrael er kid.

A Demad er a Babeluades a imong el medengei a lousbech a rengelekel er a ngii di el chad. Tiang a urerel e klebkellel el mo olngeseu er kid er a bek el taem, lomeskid a dousbech er a tekingel a klechad ma reng el olengeseu er kid er a roled el lemuut el mo er Ngii.

A Rokui el Edam a Omekrael

A kuk bebil er a beluu, e a rechedam a longull er tir a telungalek ma buai sel le Ongelolem el Buil. Ng blechoel lungil sel dongull e dolengesenges er a re demad ma re delad. A rechedam a meruul a betok lungil el kirir a re telungalek er tir e ngarngii a betok lungil teletelir. A teblo el tekoi el kot el meklou a ultutelel el ngerchelir a rechedam er a klengar er a rengelekir a ungil okesiu e omekrael. A Edam a lmuut el betok a loruul el diak el di louchais er a rengelekir a ungil ma menkngit; te meruul a lmuut el betok el diak el dil bidokl er tir a babier e longerchir er tir mel dil tir lomes er a mo klengar er tir.

A Edam omekrael er a remekreos el ngelekir e olecholt lokiu a ungil okesil me a meral rolel sel de kiei el melemalt el chad. A re Edam a diak el bechititerir a rengelekir mel dil tir el tang e bai orreched el mo olngeseu er tir, lolekiis er tir sel bek el taem el le mesibas. E sel bebil ra taem el kirel, e a re Edam a mechititerir a rengelekir me te mo chuarm, e medengei el kmo tiang a dital rolel e te subii a tekoi.

Kede Rokui el Omekrael

Meng uaisei el re edam a meruul aikang el mora rengelekir, eng di sel reng er a omekrael a tara tekoi el kired el meruul er ngii el mora rokui el ngelekel a Dios, el diak el iior er a rekrir, basio, malechub a teletael el le ngara chelsel. Lak mobes, a rengelekel a Dios a rodam ma rodos er kid; kede rokui el ngara osisiu el telungalek el mo cherechar.

Me ngokiu tiang, e mei mede rokui el mo omekrael—semerial el mo odersid e olngeseu er a ta ma tang el mo ungil chad. E le kid el ngelekel a Dios, meng sebeched el mo uai Ngii. Oubeltikelreng el mora Dios ma rebebil er kid, mo olab a llechul a Dios, e oltirakl er a okesiul a Kristo a melemalt, ibutek, e mui ra deureng el rael el lemuut el mora re demad ma redelad el ngara babeluades.

Alsekum me a Dios er a melidiul a mui el omekerreu er kid e Ngii a omekrael er kid, malta e kid me ke er dirrek el sebeched el odersid el mora rebebil er kid, el diak el iior er a iro er a bedengir, belurir, teletael el ngarngii ra belurir, tekingir, malechub a klechelid er tir. Mei me bode semeriar el omekrael me bo de besterir a klengeltengat er a klengar er a rebebil—el diak el dil rengeleked ng bai dirrek el rokui el rengelekel a Dios er tial beluulechad el rokir.

© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/15. Kengei er a oidel: 6/15. Oidel a First Presidency Message, June 2016. Palauan. 12866 881

Osischeklel Tia el Klumech

Ng locha ungil momuchel loker er tirka el molisechakl er tir el momdasu er a taem el Edam ra Babeluades a ulemekrael er tir. Seikied e bo moker er tir el mo omdasu er a klekaisisiu er sel taem me sel kuk taem el ble lomekrael er tir a demerir. Molengit er tir me bolluches a klekaisisiu er sera lomekrael er tir. Ng sebechem lolengit er tir el mo melasem el meruul loltirakl aikal blal lluches me bol sebechir el mo ungil okesiu el mora rebebil.