Mulwol ko Bin Somm’on e Presidency, June 2016

Chitamangdad, Sensey Rodad

Ni yib ku President Dieter F. Uchtdorf

Bin La’gruw e Counselor u lane Bin Somm’on e Presidency

Bay bi’id ni kam bing reb e kahol nib sug tale murwel riy, mag fek fare babyor ni ma weliy ragon ni ngan chamiy, mag lamnag ni, “Tiney e damur nang fan ni gubin?”

Boech e ngiyal’, demtrug ragon ni kad lamniged nga ragon ni gadad ba thamiy ni rayog rodad, gadad ra gerngiy bang fare tale muruwel magdad fith, “Mang fen e giney?” fa “Urogon me taw e giney?”

Ma kaknan’ rodad e be ga’i yan napa’an ni gadad ra sap ko fare kahol mag gadad guy u duwngin ni be ga’ar, “Rayog ni nge chamiy e —bitir ni ragag nge meruk e duw rok ngalang.” Bachane dan dananged, biney e darma pi’ e athamgil ko tafiney rodad fa gelngin dad.

Boech e ngiyal’ ma ta’ab ragon ko nen’ ni ma boech ko fare gospel. Napa’an ni gadad ra sap ko yuyang riy, magdad kerker lolgandad magdad lam ko mang fan e ginem riy. Fa woed ni gadad ra yaliy bang riy, me damtrug ragon ni gadad ra gay ragon ni ngad nanged fan, ma ku dabiyog ni ngad nangedfan e ginem nib mu’un ngay.

Chitamangdad ni bay u Tharmiy e ir e Sensey Rodad

Nge fal’ lanin’uy ngay ni, Chitamangdad ni bay u Tharmiy e ke pi’ ngodaed bukun e tale muruwel nib mangil ni ke powi’iy e yafos rodad magdad fal’eg ragondad nib mangil ragon. Pi tale muruwel nem e fel’ ko demtrug e yangar fa magagawon. Ke pi’ ngodad fare gospel nge fare Galasia rok Yesus Kristus. Ke pi ngodad fare wo’en e bayul, fare wo’en yalen e yafos ni manimus, nge wo’en e falfalan’. Dawri pagdad ni yigo’ gadad nib mu’un urngin e marwar nge yafos nib momaw’, nibe ga’ar, “Aray man. Fal’ wa’atham. Mu guy ragon.”

Karimus ni fa’an gadad ra munguy nag gamircha’endad magdad bing e tafiney rodad, ma gadad ra peri’eg ni Got e ke pi’ ngodad bo’or mit tale mururwel ni ngayog ni ngad nangfaned ragon e fanow Rok ni fan ko yafos ko falfalan’ ni fan ngodad:

Ke pi’ ngodad fare tawa’ath ko Kan ni Thothup, ni bay gelngin ni nge mang bang ngodad, ni nge ayuweg dad napa’an ni gadad be fill fare thin rok Got me ayuweg e tafiney rodad nge ngongol rodad ni nge puluw ko pi thin Rok.
Ke pi’ ngodad kanawo’en ni rayog ni ngad nonad ngak ni 24/7 u fathik e meybil nib riyul’.
Ke pi’ ngodad e pi apostle nge profet e chiney, ni ma dag e thin rok Got ko pi ran rodad ma ku bay gelngin rad ni ngar m’aged fa ni ta’areb nag m’ag uroy u fayleng nge tharmiy.
Ke fulweg fare Galasia rok—fare ulung nib sug ko michan’ nima muruwel u ta’abang ni ngar ayuweged rad ma kiyad be ayuweg rad ko thapag ko marus, dada’, nge athi falfalan’.¹
Ke pi’ ngodad fapi chep nib thothup—pi yol rok ni kan yoloy ngodad.
Ke pi’ ngodad e technology e chiney ni nge ayuwegdad ko pi kanawo’ rodad ko fanow. Bo’or ko pi tale muruwel ney e rayog ni ngan pir’eg ko LDS.org.

Mang fan ni Chitamangdad ni bay u Tharmiy e be pi’ e ayuw ngodad nib bo’or? Ni bachane gadad ba tu’uf Rok. Nge bachane, woed ragon ni Ke yog, “Iraray e muruwel rog nge rir rog —ni nge yog ni ngan thapeg e yafos ni darma mus nge yafos ni manemus ko gidii’.”²

Ku reb e thin, Chitamangdad ni bay u Tharmiy e Got rodad, ma Got e sensey rodad.

Chitamangdad ni bay u Tharmiy e manang pi Fak nge tin nib tu’uf rorad. I ir e muruwel nge rir Rok ni nge ayuwegdad ko gubin ben’en, be pi’ ngodad urungin e tale muruwel ni chiney nge tin nib thothup ni nge ayuwegdad ni ngeyog ni ngad suled Ngak.

Gubin e Chitamangdad ma Sensey

U yuyang ko fayleng, chitamangiy e yima tay fan ulangin e tabinaew nge binaw ko puul ni June. Gubin ngiyal’ ma mangil ni yima tay fan e galabthir rodad. Chitamangiy e yad ma rin’ bo’or ban’en nib mangil ni fan ko tabinaew rorad ma bo’or falngin rad. L’agrow ban’en ni tha’abi ga’ fan u langin e yafos ko pi bitir rodad e pi cha’en nib fal’ pangin rad nge pi sensey. Chitamangiy e baga’ ni yad ma rin’ bo’or ban’en ma gathi yad ma yog ko mang e fel’ ba tagan ko pi fak rad; baga’ ni yad ma yon’ e babyor ni fane muruwel ngorad ma yad soen nag fapi bitir ni yad e ngar gayed ragon.

Chitamangiy e yad ma sensey nag pi fak rad ma yad ma dag ko ragon e pi ngongol rorad nib mangil ko ragon e yafos nib yulyul’. Chitamangiy e darma digey pi fak machane ma gurgur ir ko ayuw rorad, ma pi’ e ayuw ngorad demturug ko ngiyal’ ni kar dol’ gad. Boech e ngiyal’ e napa’an ni luwan’ e rannog, chitamangiy e ma pag pi fak ni ngar gayed ragon, bachane iraray kanawo’en ma yad ra fill boech ban’en nib mangil riy.

Gadad Gubin Ma Sensey

Chitamangiy u fayleng e ma rin’ e pin’ey ni fan ko bitir rorad, fare ya’al ko sensey e ban’en nib tu’uf ni ngad pi’iyed ngak gubin pi fak Got, demtrug e duw, gin yad bay riy, fa tin nibe buch rorad. Tafneyem, ni pifaak Got e pi walagen daed; gadaed ba’ ko ta’ab tabinaew nib manemus.

Ko biney, pag dad ngad manged e sensey ni gubin—dab ki yog ni ngad son gad ni ngad pi’iyed e ayuw ngak be’ ni nge yog ni ngad mon’og gad. Bachane gadad ba ulung i fak Got, rayog ni ngad boded Ir. Tu’ufeg Got nge pi walagendad, tay falngin fare motochiyel ku Got, min lek fare kanawo’ rok Kristus e ba keki’iy, achig rdaan, nge kanawo’ nib falfalan’ ngak e galabthir rodad ni bay u tharmiy.

Fa’an ra Got ko fayleng e ba tu’uf rodad ma ku Ir fare sensey rodad, ma kagdad e rayog ni ngad pi’iyed e ayuw ngak pi walagen dad, demtrug ra’en duw rad, gin ra sum gad riy, nge n’en ni yad ma rin ni fan e muruwel rorad, thin nib thil, nge galasia. Dared ngad manged boech e sensey ni ngeyog ni ngad tawa’ath ni ged boech e gidii’ nge yafos rorad—gathi kemus ni fakam machane gubin pifak Got u dakan e fayleng.

© 2016 by Intellectual Reserve, Inc. Gubin mabay matwon. Kan yoloey u Mariken. Kan micheg nag ko thin nu Ngalis: 6/15. Micheg nag i pilyeg: 6/15. Pilyeg thin ko First Presidency Message, June 2016. Yapese. 12866 905

Rogon ni ngan Fil ko Biney e Mulwol

Rayog ni ngam fith ngak e pi cha’en ni gabe machib nag rad ni ngar lamniged bangi yal’ ni Chitamangdad ni bay u Tharmiy e ke sensey nagrad. Rayog mi ngam fith ngorad ni ngar lamniged e pi n’en nib chuchugur u thalin e n’en nike buch nge n’en ni kar thamiyed napa’an e ke sensey nag rad e chitmamangarad. Mu pining rad ngar yoloyed e pi n’en nib chuchugur ko ragon ni kan sensey nagrad. Rayog ni ngam pi’ e athamgil nga laniyan’ rad ni ngar laked e pi n’en ni kar yoloyed nga but’ ni nge yog ni ngar manged e gidii’ nib wo’en rad.