Poraus seni ewe Aewin Presetensi, June 2016

Semach, Nouch Chon Emwen

Seni Preseten Dieter F. Uchtdorf

Aruemonun Chon Aninnis non ewe Aewin Presetensi

Ami ouwa fen pin susuki ew pworun ekkoch mettoch, oua wau ewe toropwen awewen forutan, me ekieki, “Ei ese weweoch”?

Fan ekkoch, me nukun ach mochen awesano me ennetin nuku, sia kan weitau ew kinikinin me eis, “Minen met ena?” are “Ifa usun epwe masengeni?”

Ach ningeringer a napeno nupwen sia nengeni ewe pwor me kuna ew mak a apasa, “Mi auchea oupwe apachafengeni—ier 8 feita.” Pokiten ach sise chok weweiti, ei ese apochokuna ach nuku are ach apinukunukoch.

Fan ekkoch a wewengeni usun ew ach memmef ngeni ewe kapas allim. Nupwen sia nengeni ekkoch kinikinin, menin sipwe ekerikeri mokurach me ekiekei minen met ena kinikinin. Are nupwen sia attonaochu pwan ew kinikinin, sipwe apereni pwe mwirin mwo ach achocho ne sotuni ach sipwe weweiti, sisap chok sinei pwata ena kinikinin mi pwan pachenong.

Semach won Nang I Nouch Chon Emwen

Sia feioch pwe, Semach won Nang a fen ngeni kich aurour mi murino fan iten etettenin manauach me ach sipwe manau mi murino. Ekkena aurour ra fich ngeni ese nifinifin ierich me nonnomuch. A fen ngeni kich ewe kapas allim me ewe Mwichefenin Jises Kraist. A fen ngeni kich ewe kokkotun ngaseno, ewe kokkotun manau esemuch, pwan ewe kokkotun pwapwa. Esamo nikitikicheno ngeni ekkewe mettochun manau ese fat are osukosuken manau, ren an apasa, “Ikkei ekkei mettoch. Oupwe feioch. Oupwe pwisin apungano.”

Ika pwe sipwe chok tipepos ne nenengeni ren tipetekison me sukkun ekiek, sipwe kuna pwe Kot a fen ngeni kich chommong pisek ach sipwe weweochuti an unusen aurour fan iten ach pwapwa non manau:

A fen ngeni kich ewe auchean niffangen ewe Ngun mi Fel, minne mi tongeni epwe winiti ach pwisin, chon emwen seni nang nupwen sia kaeo ewe kapasen Kot me achocho ne awena ach ekiek me foffor ngeni An Kapas.
A fen ngeni kich ach tufich ne kokkori I fansoun meinisin me non iotekin nuku me sio ren ennetin mochen.
A fen ngeni kich aposel me soufos non ekkei ran ikenai, ekkewe ra pwarano ewe kapasen Kot non ekkei ran me a wor rer ewe mumuta ar repwe foti are apunguano won fonufan me non nang.
A fen aniwinato An Mwichefen—ew mwichen chon nuku ekkewe ra angang fengen ar repwe anisi emon me emon nupwen ra anganga manauer fiti nuokus, chechech, me pwapwa mi wesen napanap.¹
A fen ngeni kich ekkewe pukfel—An kapas mi makketiw ngenikich.
A fen ngeni kich chommongun pisekin mettochun ikenai ar repwe anisikich non ach fetanin kaeo usun Kraist. Chommong me nein ekkei pisek mi amwarar sia tongeni kuner me won LDS.org.

Pwata Semach won Nang a fen ngeni kich chommong aninnis? Pokiten A tongei kich. Me pokiten, usun A apasa usun pwisin I, “Iei ai angang me ai ning—ne apwonueta ewe inis ese tongeni mano me manau esemuch an aramas.”²

Non ekkoch kapas, Semach won Nang I ach Kot, me Kot i emon chon emwen ngenikich.

Semach won Nang mi sinei mochenin Noun semirit nap seni pwan emon. Ina An angang me ning ne anisikich fansoun meinisin, a ngenikich pisek ren pekin inis me ngun ar repwe anisikich won anach ne niwin ngeni I.

Emon me emon Sam i emon Chon emwen

Non ekkoch kinikinin ewe fonufan, famini me mwicheich ra kan afona sam non ewe maramen June. Mi och ach sipwe afona me asufonu semach me inach kewe fansoun meinisin. Sam ra fori chommong mettoch mi och fan iten ar kewe famini me a wor chommong napanaper mi murino. Ru me nein ekkewe auchean wiis mi wor ren sam non manauen nour kewe ar repwe nenien appiru mi och me emon chon emwen. Sam ra fori nap seni chok ar ureni nour kewe semirit met mi pung are muan; ra fori nap seni chok ar mwonei ngeni ir ew puk me esuku pwe repwe pwisin apungano usun nonnomun manau.

Sam ra emweni nour semirit mi auchea me pwarano ren ar nenien appiru ewe napanapen manau mi ennet repwe manaueni. Sam rese nikitano nour kewe semirit nge ra mwitir ne anisir, ra anisireta won pecher inet chok ra turuno. Iwe fan ekkoch nupwen mirit epwe aitir, sam ra mutata nour kewe semirit repwe weri weires, ra apareni pwe eni ei epwe auchea ngeni ir ar repwe kaeo.

Kich Meinisin Kich Chon Emwen

Nupwen sam won fonufan ra fori ei fan iten pwisin nour semirit, ewe ngunun emwen mi ew mettoch mi auchea sipwe awora ngeni noun Kot semirit meinisin, ese nifinifin ierir, nenier, are nonnomur. Chechemeni, Noun Kot kewe semirit ir pwiich me fefinach; kich meinisin seni ewe chok famini esemuch.

Non ei napanap, kich meinisin sipwe chon emwen—sipwe fokkun mochen ach sipwe ossongeu me aninnis fengen pwe manauach epwe murino. Pokiten kich noun Kot, mi wor rech ewe tufich ach sipwe winiti usun chok I. Tongei Kot me pwan ekkoch aramas, aneasochisi an Kot annuk, me tapweno mwirin an Kraist nenien appiru ir ekkewe aan mi wenechar, chokukun, me pwapwa mi emwen sefanikich ngeni mwen mesen semach me inach non nang.

Ika ewe Koten nang me fonufan mi wesen aucheani kich pwe I emon chon emwen fan itach, iwe menin kich mi pwan tongeni ossongeu ren pwan ekkoch aramas, ese nifinifin anuwer, ir chon ia, nonnomur, ar kapas, are ar namanam. Sipwe winiti chon emwen me efeiochu manauen ekkoch—esap chok pwisin nouch kewe semirit nge pwan noun Kot semirit meinisin non unusen ewe fonufan.

© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15 Kapungunon chiakun: 6/15. Chiakun First Presidency Message, June 2016. Chuukese. 12866 901

Afanafan seni Ei Poraus

Ka tongeni poputa ren om eisini ekkewe ka asukuner ar repwe ekieki usun ew fansoun nupwen Semach won Nang a emweni ir. Mwirin ka tongeni aisinir ar repwe ekieki usun nonno fengenin ena fansoun me ew fansoun nupwen ra mefi emwen seni semer won fonufan. Tingorer ar repwe makketiw usun nonno fengenin ar weri emwen. Ka tongeni peser pwe repwe sotuni ne appiru ewe mettoch ra makketiw non ar achocho ngeni ar repwe winiti emon chon nenien appiru mi murino ngeni ekkoch.