Poraus seni Fefn Chon Amwa, June 2016
Efeiochun non Tempel me Pwon mi Pin
Anneani ekkei puk fiti iotek me kutta om kopwe sinei met kopwe aporousa. Ifa usun om weweiti “An ewe Famini: Esinesin ngeni ei Fonufan” a anapano om nuku non Kot me efeiochu ekkewe ka tumunur ren om amwar? Ren pwan ekkis poraus, kopwe feino won reliefsociety.lds.org.
Nuku, Famini, Aninnis
Meinisin ekkewe efeioch mi auchea fan iten manau me manau fefeita ra pachengeni ekkewe pwon mi pin ngeni Kot. Linda K. Burton, Presetenin Unusen Fin Anisi a apasa “Ach fori me apwonueta pwon mi pin a wewen pwe sia finata ach sipwe fotikicheno ngeni Semach won Nang me Jises Kraist,”1
Elter Neil L. Anderson seni ewe Mwichen Engon me Ruemon Aposel a apasa, “Ewe Samon a apasa, ‘Non ekkewe feioch … ewe manamanen mettochun Kot a pwano.’
“Mi wor feioch mi auchea seni Kot fan iten emon me emon aramas mi nimenimoch ewe a fen papatais, angei ewe Ngun mi Fel, me angei ewe sakrament fansoun meinisin.”2
“Nupwen mwan me fefin ra no ngeni ewe tempel,” Elter M. Russell Ballard seni ewe Mwichen Engon me Ruemon Aposel a apasa, “ir me ruemon ra angei niffang me pin ren ena chok manaman, minne ewe manamanen pristut …
“… Mwan meinisin me fefin meinisin a wor rer ewe mumuta ar repwe angei ei manaman ren aninnis non manauer. Meinisin ekkewe ra fori pwon mi pin ren ewe Samon me ekkewe ra afona ekkena pwon mi pin ra fich ngeni ar repwe angei pwisin ar pwarata, ar repwe feioch me ren angangen chon nang, ar repwe nonnom ren Kot, ne angei unusen ewe kapas allim, me, amuchunon, ar repwe fiti Jises Kraist ne winiti chon muuni mettoch meinisin an Semach we.”3
Pwan ekkoch Wokisin
Poraus mi Manau
Non 2007, ruanu ran mwirin ew watten chechin fonu non Peru, Elter Marcus B. Nash seni ekkewe Fik a churi pranch preseten Wenceslao Conde me punuwan we, Pamela. “Elter Nash a eisini Sister Conde ifa usun noun kewe kukkun semirit. Fiti an amenimen, a ponueni pwe seni ochun Kot ir mi tumun me pochokun. A eis usun imwen ekkewe Condes.
“‘A tano,’ a chok apasa.
“… ’Iwe inamo,’ Elter Nash a apasa, ‘ka amenimen nupwen sia kakapas.’
“’Ewer,’ a apasa, ‘Ua fen iotek me ngang mi mefi kinamwe. Mi wor rem mettoch meinisin am mi mochen. Am mi nom fengen, am aua nom rem noum kewe semirit, am aua riri non ewe tempel, mi wor rem ei Mwichefen mi amwarar, me mi nom rem ewe Samon. Am mi tongeni aueta sefan ren an ewe Samon aninnis.’ …
“Met usun ach fori me apwonueta pwon mi pin ren Kot a ngeni kich ewe pochokunen amenimen non weires, ach sipwe siwini osukosuk ngeni ach win … ?”
“Kot ina ewe popun. Ach mumuta ngeni ena manaman a feito seni ach pwon mi pin ngeni I.”4
© 2016 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/15 Kapungunon chiakun: 6/15. Chiakun Visiting Teaching Message, June 2016. Chuukese. 12866 901
Ekkieki Usun Ei
Ifa usun efeiochun tempel me pwon mi pin a apochokuna me amanamana kich?