Etop eke First Presidency, Ofiong June ke isua 2016

Ete Nnyin Eti-onoitem Nnyin

Andiwet edi President Dieter F. Uchtdorf

Udiana Ono-item ke First Presidency

Nte akananam afo omokubure ekebe emi ediwak nkpo-utom odude ke esit, osio nwed item emi mme andinam nkpo-utom oro ewetde, ndien edikere-ke-esit ete, Emi iworoke nkpo ndomo nte kiet?

Ke ubak ini, ke-esioho ata eti uduak ye osongo eke esit idem nnyin, nnyin isio nkpo-utom kiet inyung ibup ete, Nso ke eda nkpo-utom enye emi enam? ye Didie ke nkpo-utom oro ekem ye utom esie?

Ekikere edikpu nnyin edikpon ke nte nnyin isede ekebe oro inyung ikut nwed unana-unen emi odohode ete, Ebop nkpo-utom emi eno mbon emi edide—isua Itiaita ka iso. Koro nnyin isuk inyeneke usung nte ikpenamde, emi isongoke mbuotidem mme eti-ekikere eke idem nnyin.

Ke ubak ini nnyin imenyene ukem ifiok-ukpeb emi ke iko Abasi. Nte nnyin isede mme ubak nkpo eke iko Abasi, nnyin imekeme ndiwai ibuot nnyin inyung idu ke mkpa-idem se ubak nkpo-utom oro ada ono. Mme nte nnyin isede nkpo iko Abasi efen, nnyin imekeme ndifiok ete ke nte nnyin isinde idem man itim inyene ifiok ofon, nnyin ikemeke ndikut ntak emi ekesinde nkpo-utom oro ke ekebe oro.

Ete Nnyin ke Enyong Edi Eti-onoitem Nnyin

Ke mfon-iso Ete nnyin ke Enyong ama ono nnyin nti item ndikama uwem nnyin nnyung nim idem nnyin otokiet man ofon. Mme item oro eyenam utom isehe nte isua ye ndaha nnyin edide. Enye ama ono nnyin iko Abasi ye ufok Abasi Jesus Christ. Enye ama ono nnyin uduak erifak, uduak erinyanga-ukpong, kpa uduak inemesit. Enye ikeyakke nnyin iduyo ikpong ke ofuri unana-iwuk ye afanikong eke uwem, ndidoho ete, Ka okim do. Mmebenge mfon-iso nno fi. Yom nte edinamde do.

Edieke nnyin idinyenede ime inyung ise ke mmem-mmem esit ye eti ekikere, nnyin iyekut ete ke Abasi ama ono nnyin ediwak nkpo-utom ndida ntim-mfiok ofuri item Esie kabanga inemesit nnyin ke uwem:

Enye ama ono nnyin anana ekom-urua eno eke Edisana Spirit, emi enyenede ndaha ndidi andikpeb eke idem nnyin, eketode enyong kini nnyin ikpebde iko Abasi inyung idomo ndida ekikere ye utom nnyin man asanga ekekem ye iko Esie.
Enye ama ono nnyin usung ndida akam mbuotidem nsim Enye ke ndibup ye ofuri esit kpukpru ini ke usen.
Enye ama ono nnyin mme isungutom ye prophet eke ini emi, eke ayarade iko Abasi ke ini nnyin emi onyung enyene unen ndibop ye ndidian k’isong ye ke enyong.
Enye ama afiak ayak ufok Abasi Esie ono edi—eboho eke mme andinim ke akpaniko eke enamde utom otokiet man enwam kiet eken ke nte mmo eyomde erinyanga-ukpong mmo ke ndik, iduo-esit ye idara eke adanga miduhe.¹
Enye ama ono nnyin ndisana New Abasi—iko emi Enye ekewetde ono esok nnyin.
Enye ama ono ediwak nkpo-utom eke nkpo-ukwak eke ini emi man anwam ke nte nnyin isangade ke usung eti-owo mbet. Imekeme ndikut ediwak mme nti nkpo-utom emi ke LDS.org.

Nsidi ntak emi Ete nnyin ke Enyong okonode nnyin oruk unwam eke awakde ntem? Koro Enye amama nnyin. Ndien oto koro, nte Enye eketingde abanga Idemesie ete, “Emi edi utom ye ubong Mi—man owo akan mkpa ikpokidem onyung enyene nsinsi uwem.”²

Ke usung efen, Ete ke Enyong edi Abasi nnyin, ndien Abasi edi eti-onoitem ono nnyin.

Ete nnyin ke Enyong otim odiongo se inanade ndito Esie akan owo efen. Edi utom ye ubong Esie ndinwam ke ofuri nde, ndino nnyin nti nkpo-unwam eke obuk-idem ye eke ukpong man anwam nnyin ndika-iso ke usung nnyin man ifiak inyong itiene Enye.

Ofuri Ete-ndito Edi Eti-onoitem

Ke mme ubak ebiet ke ererimbot, mme ufokemana ye mbon obio esikpono mme ete-ndito ke Ofiong Itiokiet. Esitim ofon nditoro nnyung mkpono mme ete ye eka. Mme ete-ndito esinam ediwak nti mkpo eno ufokemana mmo enyung enyene ediwak edu-uwem eke etorode. Akpan ubiong-utom iba emi mme ete-ndito enyenede ke uwem ndito mmo edi ke ndidi nti uwutnkpo ye eti-onoitem. Mme ete enam awak akan ndidoho ndito mmo mme nkpo se inen ye se idiok, mmo enam awak akan nditop nwed ukpeb-nkpo nno ndito mmo ndien eyom mmo efiok usung eno idem mmo ke uwem emi.

Mme ete eno osongurua ndito mmo nti-item enyung eda eti uwutnkpo mmo ewut nte ekpedude eti uwem akpaniko. Mme ete isiyakke ndito mmo edu ikpong edi esosop ekeno mmo unwam, enwam ndimenede mmo eda ke ukot ke ini ekededi emi mmo eduode. Ndien ke ubak-ini kini esinde eti-ibuot, mme ete esiyak ndito mmo eyom usung eno idem mmo, efiok ete ke emi edi ata eti usung ono mmo ndibo ukpeb.

Kpukpru Nnyin Idi Nti-onoitem

Kini mme ete eke ererimbot enamde emi eno ndito mmo, spirit eke edide eti-onoitem edi nkpo emi nnyin inyenede ndiyak nno ofuri ndito Abasi, isehe ndaha isua, ebiet, ye ini. Ti, ke ndito Abasi edi ndito-eka nnyin irenowo ye iban, kpukpru nnyin idu ke ukem-ukem nsinsi ufokemana.

Ke ntak emi, yak ofuri nnyi nidi nti-onoitem—eke iyomde ndisin nnyung nnwam kiet eken man ikabare idi ata nti owo ke idem nnyin. Koro nnyin idi ndito Abasi, nnyin nko imenyene ukeme ndikabare ntie nte Enye. Ndima Abasi ye mbon owo efen, ndinim mbet Abasi, nnyung ntiene uwutnkpo eke Christ edi nnen-nnen, mkpafaha, ye usung oyoho idara ndifiak nnyong nka iso eke ete ye eka nnyin ke enyong.

Edieke Abasi andikara ofuri ererimbot etimde ese enyin abanga nnyin man otodo Enye edi eti-onoitem ono nnyin, ntre nnyin nko imekeme ndinwam mbon owo nnyin efen, isehe mbuwet-idem, oruk, ndaha-inyene, usem, mme edu-ukpono mmo. Yak nnyin ikabare idi mme nti-onoitem inyung idiong uwem mbon efen—idighe eke ndito nnyin ikpong edi eke ofuri ndito Abasi ke ofuri ekondo.

© 2016 eketode Intellectual Reserve Inc. Ekpan kpukpru unen ndiming nwed emi. Ekeming ke USA. Enyime edikabare ke Iko Mbakara: 6/15. Enyime edikabare: 6/15. Edikabare Etop eke First Presidency Message, June 2016. Efik. 12866 553

Ukpebnkpo eketode Etop Emi.

Mbufo emekeme nditongo ke ndibup mbon owo emi mbufo ekpebde ete ekere ini emi Ete ke Enyong ekedide eti-onoitem ono mmo. Mbufo ndien emekeme ndibup mmo ete ekere mbiet ukem oro ke ufot ini oro ye ini eke mmo ekekopde nti-item eto ete ererimbot mmo. Doho mmo ete ewet mme mbiet-nkpo nte ekenode mmo nti-item enim. Mbufo emekeme ndidoho mmo ete yak edomo ndinam nkpo emi mmo ekewetde enim ke ofuri ukeme mmo man ekabare edi nti uwutnkpo eno mbon efen.