President a Odzi Kan na n’Apamfo Amandzɛɛbɔ, Obiradzi 2016
Hɛn Egya, Hɛn Kwankyerɛnyi
Ana ebue adaka bi woetutu adze bi gu mu, na atwe ne nhyehyɛe ho nkyerɛkyerɛ na nkyii adwen ho dɛ, “Iyi dze munnhu n’enyiwa do koraa”?
Ɔtɔfabi a, hɛn awerɛhyɛmu wɔ hɛn mu nyina ekyir no, yeyiyi afã afã na yebisa dɛ, “Iyi wɔdze yɛ dɛn?” anaa “Osi dɛn kɛhyɛ yie.”
Hɛn adwen mu yɛ hɛn kunsaa ber a yɛhyɛ no nsew dɛ wɔakyerɛw abɔ ho dɛ, “Ohia dɛ wɔhyehyɛ—mfe 8 na no mboree.” Osiandɛ yɛda ho ara nnhu n’enyi do ntsi, iyi mmpegya hɛn awerɛhyɛmu anaa hɛn gyedzi a ɔwɔ hɛn mu.
Ɔtɔfabi a yenya asɛmpa no ho sũahu so dɛmara. Yɛhwɛ n’afã binom, na yɛtwerɛw hɛn tsir ho dwen dza wɔdze afã no bɛyɛ. Anaa yɛhwɛ afã bi so a, yɛabɔ mbɔdzen dɛ yɛbɛtse ase emudzi mu no mpo no, yenntum nnhu siantsir a wɔdze dɛm afã no kãa ho.
Hɛn Ɔsor Egya Yɛ Hɛn Kwankyerɛnyi
Enyigye mu ara, hɛn Ɔsor Egya ama hɛn nkyerɛkyerɛ nwanwa a yɛdze besiesie hɛn abrabɔ ama yɛafa hɛn tampa efura. Dɛm nkyerɛkyerɛ no yɛ edwuma a hɛn mfe, anaa hɛn gyinabew mmfa ho. Ɔama hɛn asɛmpa no na Jesus Christ n’Asɔr. Ɔama hɛn ɔpon ho nhyehyɛɛ, nkwagye ho nhyehyɛɛ, enyigye ho nhyehyɛɛ no mpo. Onngyaa hɛn ankonam wɔ abrabɔ akadadwen horow anaa taferbanyinmbɔmu horow mu a, Ɔrese dɛ, “Hom nkɔ. Wondua yie. Hom ara hom nhwehwɛ mu.”
Sɛ yebesie abotar na yɛdze botooyɛ akoma na adwen a ɔda hɔ a, yebohu dɛ Nyame ama hɛn edwindadze pii a ɔbɛma yɛatse Ne nkyerɛkyerɛ pefee a ɔma hɛn abrabɔ mu ahotɔ no ase yie.
-
Ɔama hɛn Sunsum Krɔnkrɔn akyɛdze a wonntwa ho bo, a Obotum abɛyɛ hɛn ankorankor kyerɛkyerɛnyi a ofi sor ber a yesũa Nyame N’asɛm na yɛbɔ mbɔdzen dɛ yɛdze hɛn adwendwen na ndzeyɛɛ bedzi N’asɛm do.
-
Ɔama hɛn No ho kwan da mu no nyina a yedua gyedzi mpaabɔ na nokwar akoma mu nkotoserɛ do.
-
Ɔama hɛn ndɛ-mber yi mu asomafo na nkɔnhyɛfo a wɔda Nyame asɛm edzi wɔ hɛn mber yi mu na wɔwɔ tumdzi dɛ wɔbɛkyekyer anaa wɔsɔw ano wɔ asaase do na wɔ ɔsor.
-
Ɔdze N’Asɔr asan ananmu aba—agyedzifo fekuw a wɔbɔ mu yɛ edwuma dze boa hɔnho nkorkor ber a wɔdze suro, ahopopo, na ehurisi a onnyi kabea yɛ hɔn nkwagye ho edwuma.1
-
Ɔama hɛn kyerɛwsɛm krɔnkrɔn no—N’asɛm a wɔakyerɛw ama hɛn.
-
Ɔama hɛn abaefo mfir edwindadze horow a ɔboa hɛn wɔ hɛn osũanyiyɛ anamɔntu mu. Edwindadze nwanwa horow mu dodowara no wobohu no wɔ LDS.org.
Dɛn ntsi na Ɔsor Egya ama hɛn mboa dodow yi? Osiandɛ Ɔdɔ hɛn. Na osiandɛ, tse dɛ mbrɛ Ɔkãa kyerɛɛ Noho no, “Iyi nye m’edwuma na m’enyimnyam—dɛ medze nyimpa ne bɛkyebo na onnyiewiei nkwa bɔbɔ adze.”2
Anaaso yɛbɛkã no dɛ, Ɔsor Egya yɛ hɛn Nyame, na Nyame yɛ Ɔkwankyerɛnyi ma hɛn.
Hɛn Ɔsor Egya nyim Ne mba hɔn ehiadze kyɛn obiara. Ɔyɛ n’edwuma na n’enyimnyam dɛ Ɔbɔboa hɛn ber biara, Ɔama hɛn asaase do nye sunsum mu mboa nwanwa a ɔbɔboa hɛn wɔ hɛn anamɔn kwan a yɛdze bɛsan akɔ No hɔ no.
Egya Biara yɛ Ɔkwankyerɛnyi.
Wiadze afã beebi mu no ebusua ebusua na ɔman no hyɛ egyanom enyimnyam wɔ Ɔbiradzi bosoom mu. Oye daa dɛ yɛdze enyimnyam na obu hyɛ hɛn awofo. Egyanom yɛ ndzepa pii ma hɔn ebusua ebusua na wɔwɔ su pa pii a ɔfata nkamfo. Asɛdze ebien a ohia tsitsir a egyanom no da no edzi wɔ hɔn mba hɔn abrabɔ mu nye wɔyɛ fasusu pa nye ɔkwankyerɛfo. Egyanom yɛ dza ɔbor dɛ wɔkã kyerɛ hɔn mba dza oye anaa dza omuo ara; wɔyɛ dza ɔbor dɛ wɔatow kwankyerɛ nwoma ama hɔn na wɔwɔ enyidado dɛ hɔn ara bohu hɔn bra no ano.
Egyanom ma hɔn mba a wɔsom bo no kwankyerɛ na wɔdze hɔn fasusu pa kyerɛ hɔn nokwar abrabɔ no kwan. Egyanom no nngya hɔn mba ankonam mbom wɔdze ntsɛmyɛ bɛyɛ hɔn mboa, ber biara a wofintsiw no wɔboa hɔn ma wogyina hɔn anan do. Na ɔtɔfabi a, ber a adwenpa kyerɛ no, egyanom no ma hɔn mba no kwan ma wodzi aper, ber a wohu dɛ ɔno botum ayɛ kwan pa a wobenya mu adzesũa
Hɛn Nyina Yɛyɛ Akwankyerɛfo
Ber a asaase do egyanom yɛ iyi ma hɔn mba no, ɔkwankyerɛ sunsum yɛ adza a yebotum dze ama Nyame ne mba nyina a hɔn mfe, bea a wɔwɔ anaa hɔn gyinabew mmfa ho. Hom nkaa, Nyame ne mba yɛ hɛn nuambanyin na nkyerɛbaa; hɛn nyina yefi daapem ebusua kor mu.
Dɛm adwen yi do no, hom mma hɛn nyina yɛnyɛ akwankyerɛfo—yɛmfa enyigye mboa hɛnho nkorkor ama yɛafa hɛn tampa efura. Osiandɛ yɛyɛ Nyame ne mba, na yɛwɔ kwan dɛ yɛbɛyɛ tse dɛ Ɔno. Yɛrodɔ Nyankopɔn na hɛn mfɛfo, yeresie Nyame ne mbrasɛm, na yeridzi Christ ne fasusu do yɛ enyigye kwan tɔɔtsen na tseabaa a ogya hɛn kɔ hɛn ɔsor awofo enyim.
Sɛ wiadze nyina mu Nyame dwen hɛn ho ara ma Ɔyɛ hɛn kwankyerɛnyi a, nna bi a hɛn so yebotum atsen akɔ hɛn mfɛfo do a yɛnnhwɛ hɔn honam enyi, bea wofi, hɔn gyinabew wɔ ɔman mu, hɔn kasaa anaa hɔn nyamesom ho. Hom mma yɛmbɛyɛ akwankyerɛfo a yekenyan na yenhyira binom hɔn abrabɔ—nnyɛ hɛn ankasa hɛn mba nko, mbom Ɔsor Egya ne mba a wɔwɔ wiadze nyina mu.
© 2016 Intellectual Reserve, Inc. Wɔakora ho tumdzi nyina. USA na wotsintsimii. First Presidency Message, June 2016 ne nkyerɛasee. Fante. 12866 502
Erekyerɛkyerɛ efi Amandzɛɛbɔ Yi Mu
Ibotum ebisa hɔn a ekyerɛ hɔn adze no ma wɔadwen mber kumabaa bi a Ɔsor Egya maa hɔn kwankyerɛ dze ahyɛ ase. Nkyii ibotum ebisa hɔn ma wɔadwen dɛm ber no ho na ber kumabaa bi a wɔtsee nkã dɛ hɔn asaase do egya ama hɔn kwankyerɛ no mbrɛ ebien no si sɛ. To nsa frɛ hɔn ma wɔnkyerɛw dza odzi nsɛ wɔ mbrɛ wosi wonyaa akwankyerɛ no. Ibotum ato hɔn tafɛrbanyinmbɔmu dɛ wɔmbɔ mbɔdzen mfa dza wɔkyerɛwee no mbɔ bra ama wɔayɛ fasusu yie ama binom.