Te Rongorongo man te Moan Beretitentii, Tuun 2016
Tamara, Te Tia Kairiira
Iroun Beretitenti Dieter F. Uchtdorf
Te Kauoman ni Kauntira n te Moan Beretitentii
Ko a tia ni kauka te baoki ma mwakorokorona, ni kaotinakoa te kaetieti n aron kanimwana, ao n iango, “E a bon aki ota te aba iai”?
N tabetai, n aki tarai tamaroan ara iango ao onimakinara inanora, ti kaotinakoi mwakorokoro ao n titiraki, “Bwain tera anne?” ke “E na kanga n nim anne?”
E rikirake unin nanora ngkai ti taraa te bwaoki ao n noora te kauring ibukin te aki bukintaeka are e kangai, “Buatakina e kainnanoa—te ririki 8 ni waerake.” Ibukina bwa ti teimatoa n aki ataia, aio e aki karikirakea mwengaraoira ke onimakinara i bon iroura.
N tabetai iai aekakin are ti rinanona ma te euangkerio. Ngkai ti tarai mwakoro tabeua mai iai, ti kona ni ngongoi atura ao n titiraki ibukin tera anne. Ke ngkai ti taratara te mwakoro teuana, ti kona n ataia bwa imwiin ara kakatai ae korakora ni kan ata arona ae tabwanin, ti bon aki kona n iangoia bwa bukin tera e karinaki te mwakoro anne.
Tamara are i Karawa te Tia Kairiira
Te kabwaia, Tamara are i Karawa e a tia n anganiira kaetieti aika tamaroa ibukin kateiraoan maiura ao ni kona ni karokoira n ara kabanea n tamaroa. Kaetieti akanne a mwakuri n aki tarai ara ririki ke arora. E a tia n anganiira te euangkerio ao ana Ekaretia Iesu Kristo. E a tia n anganiira te baire ibukin te kabooaki, te baire ni kamaiu, ao bon te baire ni kakukurei. E bon tuai ni katikuira n tii ngaira ma te aki koaua raoi ni bwaai ni kabane ke kakaewenako inanon maiura, ni kangai, “An touanako kawaim. Tekeraoi. Iangoa arona.”
Ngkana ti bon taotaonakin n nano ao n taratara ma te nanorinano ao ni kauka ara iango, ti na kunea bwa te Atua e a tia n anganiira bwaai ni mwakuri aika a mwaiti bwa ti na kona riki n ota n Ana kaetieti ni bwaai ni kabane ibukin kukureira ni maiu:
-
E a tia n anganiira te bwaintangira ae akea boona ae te Tamnei ae Raoiroi, are iai ana anga ni kona n raoniira, ni kairiira mai karawa ngkai ti kamatebwaia ana taeka te Atua ao ni kataia n uoti ara iango ao ana mwakuri n irii nanon Ana taeka.
-
E a tia n anganiira bwa ti na kona n roko irouna rinanon ara tataro n onimaki ao n anga ma nanora ni koaua.
-
E a tia n anganiira abotoro ao burabeti ni boong aikai, ake a kaoti ana taeka te Atua inanon ara bong ni karekea te kariaiakaki ni kabaeira iaon te aba ao i karawa.
-
E a tia ni kaoka Ana Ekaretia—aia bootaki taan kakoaua ake a uaia ni mwakuri n ibuobuoki imarenaia ngkai a mwakuriia kamaiuakiia ma te maaku, teruru ao te kukurei ae akea kabotauana.1
-
E a tia n anganiira koroboki aika a tabu—Ana taeka ake a koreaki nakoira.
-
E a tia n anga bwai ni mwakuri n rabakau aika a boou n taai aikai bwa e na buokiira n nakonakora n riki bwa ana reirei. Mwaitin bwaai ni mwakuri aika a kakaawaki aikai a kona ni kuneaki n LDS.org.
Bukin tera Tamara are i Karawa e anganaiira te buoka ae mwaiti? Ibukina bwa E tangiriira. Ao ibukina, ngkai E a tia n taekinna bwa bon,“Ana mwakuri ao Mimitongina—bwa e na uota te aki mamate ao te maiu are akea tokina nakoia aomata.”2
N taekinana teuana, Tamara are i Karawa bon Atuara, ao te Atua te tia kairiira.
Tamara are i Karawa e atai bwaai aika a kainnanoi riki Natina nakon riki temanna. Bon Ana mwakuri ao mimitongina bwa e na reitinako ni buokiira, n anganiira bwaai aika a na kona ni buokiira iaon kawaira n oki nako Ina.
Kaaro n tatabemaniia nako Bon taan Kairiiri
N tabo tabeua n te aonaaba, kaaro a karineaki irouia utu ao te botannaomata inanon te namwakaina ae Tuun. Bon te bwai ae tamaroa n tainako te karinerine ao te ongotaeka nakoia ara karo. Kaaro a karaoi bwaai aika a mwaiti aika raraoi nakoia aia utu ao iai anuaia aika karineaki ake a butimwaeaki. Uoua mwakuri aika a kakaawaki n nakoaia kaaro inanon maiuia natiia bwa bon te banna ni katoto ae tamaroa ao te tia kairiiri. Kaaro e mwaiti riki ae a karaoia nakon tuangakiia natiia te bwai ae e eti ke e kairua; a karaoa riki ae e mwaiti nakon are a kareia n te manuo ao ni kantaningaia bwa a na kona n iangoa aron maiuia i bon irouia.
Kaaro a kairiia natiia aika moan te kakaawaki ao a kaota te banna ni katoto nakoia n aron maiuakinan te kokoaua. Kaaro aki katikuia natiia i bon irouia ma a kawaekoa ni buokiia, ni buokiia ni kateia iaon waeia n te tai are a tatanako iai. Ao n tabetai ngkana ai bon te bwai ae riai ni karaoaki, kaaro a kariaia natiia bwa a na korakai, n ataia bwa aio te kawai ae te kabanea n tamaroa bwa a na reiakinna.
Ngaira ni Kabane Bon Taan Kairiiri
Ngkai kaaro iaon te aba a karaoa aio nakoia natiia, tamnein te kairiiri bon te bwai ae ti kainnanoia n anga nakoia natin te Atua ni kabane, n aki taraa te ririki, tabo, ke te aro. Uringnga, natin te Atua bon tarira ao mwanera; ngaira ni kabane ti bane n roko man te utu ae akea tokina.
N te aro aei, ti na bane n riki bwa taan kairiiri—ingainga n rootia ao ibuobuoki n riki bwa aomata aika kabanea n tamaroa. Ibukina bwa ngaira natin te Atua, iai ara konabwai n riki n ai Arona. Tangiran te Atua ao raora, kawakinan ana tua te Atua, ao irirakin ana banna ni katoto Kristo bon te kawai ae eti, man irariki ao e kakukurei n oki rikaaki nako mataia ara karo ake i Karawa.
Ngkana Atuan te aonaaba e rang n tabeakiniira n te aro are E riki bwa te tia kairiira, tao ngaira naba ti kona n rootia raora, n aki tarai kuniia, reeti n aomata ra, tein kaubwain abaia, aia taetae, ke aia aro. Ti na riki bwa taan kairiiri aika kairaki ao ni kakabwaiai maiuia tabeman—tiaki tii nakoia natira ma nakoia natin te Atua ni kabuta te aonaaba.
2016 iroun Interllectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/15. Kariaiakaki rairana: 6/15. Rairan te First Presidency Message, June 2016. Kiribati. 12866 859
Reirei man te Rongorongo Aei
Ko na bae n tangiria ni waaki moa n titirakiniia naake ko reireiniia bwa a na iango tabeua te tai n te tai are e kairiia iai Tamara are i Karawa. Ko kona ngkanne n titirakiniia bwa a na iangoa aekakin te tai anne ao te tai are a namakina iai kairakiia iroun Tamaia are iaon te aba. Kaoiia bwa a na korei bwa a kanga n titebo aekakin kairirii akanne. Ko kona n anganiia te kakaewenako bwa a na kataia n riki bwa banna ni katoto ni bwaai ake a korei ni katamaroa bwa te banna nakoia tabeman.