Mensahe sang Unang Panguluhan, Hunyo 2016

Aton Amay, Aton Manunudlo

Ni Pangulong Dieter F. Uchtdorf

Ikaduhang Manuglaygay sa Unang Pangulohan

Litrato

Ni Pangulong Dieter F. Uchtdorf

Nakaagi bala kamo bukas sang isa ka kahon sang (assembly) parts, nagbasa sang instruksyon sa pagbalay, kag nagpanumdum, “Daw Indi man ini maintiendihan”?

Kon kaisa, sa pihak sang aton pinakamaayo nga mga katuyuan kag salig sa kaugalingon, ginakuha naton ang isa ka parte kag nagapamangkot, “Para sa ano ina”? ukon “Paano ina magsanto?”

Ang aton kapaslawan nagadugang samtang ginalantaw naton ang kahon kag makita ang notisya nga nagasiling, “Kinahanglan sang pagbalay—edad 8 pataas.” Bangud indi kita sa gihapon makahibalo, wala ini nagapadugang sang aton pagsalig ukon bili-sa-kaugalingon.

Kon kis-a may pareho man kita nga mga eksperiyensya sa ebanghelyo. Samtang ginatulok naton ang pila ka parte sini, mahimo mangalot kita sang aton mga ulo kag matingala kon para sa ano ang ina nga parte. Ukon sa aton pag-usisa sang isa pa gid ka parte, mahimo naton marealisar nga bisan pagkatapos nga magtinguha kita sing todo agud mahangpan sing lubos, indi naton sa gihapon matungkad kon ngaa ang ina nga parte nalakip.

Ang Aton Amay nga Langitnon Aton Manunudlo

Maayo lang, ang aton Amay nga Langitnon naghatag sa aton sang manami nga mga panulin sa pagbalay sang aton mga kabuhi kag sa pagpasad sang pinakamaayo naton nga mga kaugalingon. Ining mga panulin epektibo wala sapayan sang aton edad ukon kahimtangan. Ginhatagan Niya kita sang ebanghelyo kag sang Simbahan ni Jesucristo. Ginhatagan Niya kita sang plano sang pagtubos, sang plano sang kaluwasan, bisan pa sang plano sang kalipayan. Wala Niya kita ginpabayaan nga nagaisahanon sa pihak sang tanan nga mga kawala’y-kaseguruhan kag mga hangkat sang kabuhi, nga nagasiling, “Ari o. Swertihon ka tani. Diskubreha.”

Kon mangin pasensyoso kita kag maglantaw nga may mapainubuson nga tagipusuon kag bukas nga panghunahuna, makita naton nga ang Dios naghatag sa aton sang madamo nga mga kasangkapan agud mahangpan sing mas maayo ang Iya kumpleto nga mga instruksyon para sa aton kalipayan sa kabuhi.

Ginhatagan Niya kita sing malahalon nga dulot sang Balaan nga Espiritu, nga may ikasarang nga mangin aton kaugalingon, langitnon nga manunudlo sa pagtuon naton sang pulong sang Dios kag pagtinguha nga dalhon ang aton mga huna-huna kag mga buhat nga nagakasanto sa Iya pulong.
Ginhatagan Niya kita sang wala’y untat (24/7) nga pahanugot sa pagpalapit sa Iya paagi sa mga pangamuyo sang pagtuo kag pag-ampo sing hugot sa tagipusuon.
Ginhatagan Niya kita sang mga apostoles kag mga propeta sa karon nga panahon, nga nagapahayag sang pulong sang Dios sa aton panahon kag may gahum sa paghugpong ukon pagselyo sa duta kag sa langit.
Ginpanumbalik Niya ang Iya Simbahan—isa ka organisasyon sang mga tumuluo nga nagatrabaho sing ululupod sa pagbulig sa isa kag isa sa ila pagpanikasog sa pagpatuman sang ila kaluwasan nga may kahadlok, kag pagkurog, kag wala’y tupong nga kalipay.¹
Ginhatagan Niya kita sang balaan nga mga kasulatan—ang Iya sinulat nga pulong para sa aton.
Ginhatagan Niya kita sang di-maisip nga mga kasangkapan sang moderno nga teknolohiya agud buligan kita sa aton pagpanglakaton sa pagkadisipulo. Madamo sining manami nga mga kasangkapan masalapuan sa LDS.org.

Ngaa ginhatagan kita sang aton Amay nga Langitnon sang tuman kadamo nga bulig? Tungod palangga Niya kita. Kag tungod, suno sa Iya ginsiling nahanungod sa Iya kaugalingon, “Ini ang akon hilimuon kag himaya—ang magpahanabo sang imortalidad kag wala’y katapusan nga kabuhi sang katawhan.”²

Sa malip-ot nga pulong, ang Amay nga Langitnon amo ang Dios, kag ang Dios manunudlo naton.

Ang aton Amay sa Langit nakahibalo sang kinahanglanon sang Iya mga anak sing mas maayo sangsa kon sin-o pa man. Iya buluhaton kag himaya ang buligan kita sa tanan nga tion, nga nagahatag sa aton sang bilidhon nga dutan-on kag espirituhanon nga mga ikasarang agud buligan kita sa aton pagpanglakaton pabalik sa Iya.

Ang Tagsa ka Amay Isa ka Manunudlo

Sa pila ka mga bahin sang kalibutan, ang mga amay ginapasidunggan sang mga pamilya kag sosyedad sa bulan sang Hunyo. Maayo gid pirme nga pasidunggan naton kag tahuron ang aton mga ginikanan. Ang mga amay nagahimo sang madamo nga maayo nga mga butang para sa ila mga pamilya kag may madamo nga dalayawon nga mga kinaiya. Ang duha sa pinakaimportante nga papel sang mga amay sa kabuhi sang ila mga anak amo ang mangin maayo nga ehemplo kag isa ka manunudlo. Ang mga amay nagahimo sing sobra pa sangsa maghambal lang sa ila kabataan kon ano ang husto kag sala; sobra pa ang ila ginahimo sangsa mag-itsa lang sang instruksyon manwal sa ila kag magpaabot nga mahangpan nila ang kabuhi.

Ang mga amay nagatudlo sang ila pinalangga nga mga anak kag nagapakita paagi sa ila maayo nga ehemplo kon paano magpangabuhi sing tampad. Ang mga amay wala nagapabaya sa ila kabataan kundi nagadali-dali sa pagtabang sa ila, nga nagabulig sa pagpabangon sa ila kon sila madasma. Kag kon kis-a kon ginadikta sang kaalam, ang mga amay nagatugot sa ila kabataan nga maghimakas, nga nakahibalo nga ayhan amo ini ang pinakamaayo nga paagi agud sila manuto.

Tanan Kita Mga Manunudlo

Samtang ang mga dutan-on nga amay nagahimo sini para sa ila kaugalingon nga kabataan, ang espiritu sang pagpanudlo isa ka butang nga kinahanglanon naton itanyag sa tanan nga mga anak sang Dios, wala sapayan sang edad, lugar, ukon kahimtangan. Panumduma, ang mga anak sang Dios aton mga utod; kita tanan katapo sang isa lang ka wala’y katubtuban nga pamilya.

Sa sini nga kahulugan, kita tanan mangin mga manunudlo—nga handa magdab-ot kag magbulig sa isa kag isa nga mangin aton pinakamaayo nga kaugalingon. Tungod kita mga anak sang Dios, may ikasarang kita nga mangin pareho sa Iya. Ang pagpalangga sa Dios kag aton isigkatawo, pagtuman sang mga kasuguan sang Dios, kag pagsunod sang ehemplo ni Cristo amo ang tadlong, makitid, kag malipayon nga banas pabalik sa presensya sang aton langitnon nga mga ginikanan.

Kon ang Dios sang uniberso nagaulikid sing tuman sa aton sa bagay nga isa Sia ka manunudlo sa aton, ayhan kita man makadab-ot sa aton mga isigkatawo, wala sapayan sang ila duag, rasa, kahimtangan sa kabuhi, hinambalan, ukon relihiyon. Mangin inspirado kita nga mga manunudlo kag bugayan ang mga kabuhi sang iban—indi lang ang iya sang aton mga kabataan kundi ang tanan man nga mga kabataan sang Dios sa bug-os nga kalibutan.

© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang First Presidency Message, June 2016. Hiligaynon. 12866 861

Pagtudlo gikan sa Sining Mensahe

Ayhan luyag ninyo magsugod paagi sa pagpamangkot sa inyo ginatudloan nga magpanumdum sang isa ka tion sang ang Amay nga Langitnon nagpanudlo sa ila. Mahimo ninyo dayon sila pangabayon nga magpanumdum sang mga kaanggid sinang tion kag sang tion nga nabatyagan nila nga gintudloan sila sang ila dutan-on nga amay. Agdaha sila nga isulat ang mga kaanggid sa kon paano sila gintudloan. Mahimo ninyo sila hangkaton nga tilawan ang pagsunod sang butang nga ila ginsulat sa pangpaninguha nga mangin mas maayo nga ehemplo sa iban.