Mensahe sa Visiting Teaching, Hunyo 2016
Mga Ordinansa kag Mga Kasugtanan sa Templo
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang “Ang Pamilya: Isa ka Proklamasyon sa Kalibutan” makapadugang sang inyo pagtuo sa Dios kag magabugay sa ila nga inyo ginabantayan paagi sa visiting teaching? Para sa dugang nga impormasyon, mag-log on sa reliefsociety.lds.org.
Pagtuo, Pamilya, Bulig
Ang tanan nga mga ordinansa nga kinahanglanon para sa kaluwasan kag kahitaasan may kaupod nga mga kasugtanan sa Dios. “Ang paghimo kag pagtipig sang mga kasugtanan nagakahulugan sang pagpili nga ihugpong ang aton mga kaugalingon sa aton Amay nga Langitnon kag kay Jesucristo,” siling ni Linda K. Burton, pangkabilugan nga pangulo sang Relief Society.1
Si Elder Niel L. Anderson sang Korum sang Napulo’g Duha ka mga Apostoles nagsiling, “Ang Ginuo nagsiling, ‘Sa mga ordinansa … ang gahum sang pagkadiosnon makita.’
“May pinasahi nga mga bugay gikan sa Dios sa tagsa ka takos nga tawo nga nabunyagan, nagabaton sang Balaan nga Espiritu, kag pirme nga nagaambit sang sakramento.”2
“Kon ang mga lalaki kag mga babaye nagakadto sa templo,” siling ni Elder M. Russel Ballard sang Korum sang Napulo’g Duha ka mga Apostoles, alangay sila nga ginahatagan sang magkasubong nga gahum, nga amo ang gahum sang priesthood …
“… Ang tanan nga mga lalaki kag mga babayi may kinamatarong sa sining gahum para magbulig sa ila mga kabuhi. Ang tanan nga naghimo sang sagrado nga mga kasugtanan sa Ginuo kag nagatipig sinang mga kasugtanan nagakaangay sa pagbaton sang personal nga bugna, mabugayan sang pag-alagad sang mga anghel, mangin malapit sa Dios, magbaton sang kabug-osan sang ebanghelyo, kag sa ulihi, mangin mga manunubli upod ni Jesucristo sang tanan nga iya sang aton Amay.”3
Dugang nga Balaan nga mga Kasulatan
Istorya Gikan sa Matuod-tuod nga Kabuhi
Sang 2007, apat ka adlaw pagkatapos sang isa ka daku nga linog sa Peru, si Elder Marcus B.Nash sang Seventy nakigkita kay branch president Wenceslao Conde kag iya asawa, nga si Pamela. “Si Elder Nash nagpamangkot kay Sister Conde kon kamusta ang iya magagmay nga kabataan. Nga may isa ka yuhum, nagsabat sia nga sa kaayo sang Dios tanan sila luwas kag maayo. Namangkot sia parte sa puluy-an sang mga Conde.
“‘Wala na ini,’ simple niya nga sabat.
“… Pero,’ siling ni Elder Nash, ‘nagayuhum ka samtang kita nagasugilanon.’
“‘Huo,’ siling niya, ‘Nakapangamuyo na ako kag may katawhayan ako. Yara sa amon ang tanan namon nga kinahanglanon. Yara sa amon ang isa kag isa, yara sa amon ang amon kabataan, nahugpong kami sa templo, yara sa amon ining dalayawon nga Simbahan, kag yara sa amon ang Ginuo. Makapasad kami liwat sa bulig sang Ginuo.’ …
“Ano ang yara sa paghimo kag pagtipig sang mga kasugtanan sa Dios nga nagahatag sa aton sang gahum nga magyuhum sa tunga sang mga kabudlayan, nga bayluhon ang pag-antus sa kadalag-an … ?”
“Ang ginhalinan amo ang Dios. Ang aton alagyan pakadto sinang gahum amo ang paagi sa aton mga kasugtanan sa Iya.”4
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/15. Petsa sang pagtugot sa paglubad: 6/15. Paglubad sang Visiting Teaching Message, June 2016. Hiligaynon. 12866 861
Binagbinaga Ini
Paano ang mga ordinansa kag mga kasugtanan sa templo nagapabakod kag nagahatag sang gahum sa aton?