Mensahe ti Umuna a Panguluen, Hunio 2016
Amatayo, Mannursurotayo
Ni Presidente Dieter F. Uchtdorf
Maikadua a Mammagbaga iti Umuna a Panguluen
Napadasanyo kadin ti nanglukat iti maysa a kahon a naglaon kadagiti nadumaduma a partes, inruaryo dagiti annuroten iti panangbukel, ken panunotenyo, “Awan kaes-eskanna daytoy”?
No dadduma, iti baet dagiti kasayaatan a panggep ken kompiansa iti kaunggan, mangiruartayo iti maysa a parte ket saludsoden, “Para iti ania dayta?” wenno “Kasano nga umsek dayta?”
Umad-adda ti pannakapaaytayo no makitatayo ti kahon ket mabasa ti, “Kasapulan ti panangbukel—agtawen iti 8 ken nasursurok.” Gapu ta awanantayo pay iti pamalpalatpatan, saan a daytoy ti mangpapigsa iti kompiansa wenno panagtalek iti bagitayo.
Maipada daytoy iti padastayo iti ebanghelio no dadduma. No kumitatayo iti maysa a parte daytoy, kudkodentayo ti ulotayo ket panunotentayo no para iti ania dayta a parte. Wenno no amirisentayo ti sabali pay a parte, maammuantayo nga uray kalpasan ti panangikarigatantayo nga awaten a nasayaat, ditayo kabaelan a panunoten no apay a mairaman dayta a parte.
Ti Nailangitan nga Amatayo ti Mannursurotayo
Nagasat ta inikkannatay ti Nailangitan nga Amatayo kadagiti nakaskasdaaw nga annuroten para iti panangbukel kadagiti biagtayo ken mangurnos iti kasasayaatan dagiti bagbagitayo. Maaramid dagita nga annuroten ania man ti edadtayo wenno kasasaad. Intedna kadatayo ti ebanghelio ken ti Simbaan ni Jesucristo. Intedna kadatayo ti plano ti pannakasubbot, ti plano ti pannakaisalakan, ken ti plano ti kinaragsak. Dinatayo baybay-an nga agmaymaysa iti amin a parikut wenno pannubok iti biag, nga agkunkuna, “Agpatuloykayo. Naimbag a gasat Panunotenyo daytoy.”
No agan-anustayo laeng ken agsapsapultayo nga addaan iti napakumbaba a puso ken nawada a panunot, masarakantayonto nga inikkannatayo ti Dios iti adu a mausar a ramit tapno maawatantayo a nasaysayaat dagiti nalawag nga annurotenna para iti pagragsakantayo iti biag:
-
Inikkannatayo iti di magatadan a sagut ti Espiritu Santo, nga addaan iti potensial nga agbalin a personal, nailangitan a mannursurotayo bayat ti panagadaltayo iti balikas ti Dios ken panangpanggep a mangitunos kadagiti panunot ken tignaytayo iti balikasna.
-
Inikkannatayo iti ania man nga oras a panangdanon Kenkuana babaen dagiti kararag ti pammati ken araraw nga addan iti pudno a panggep.
-
Inikkannatayo kadagiti apostol ken propeta iti agdama a panawen, a mangipalgak iti balikas ti Dios iti panawentayo ken addaan iti awtoridad a mangbegkes wenno manglantip iti daga ken iti langit.
-
Insublina ti Simbaanna—ti organisasion dagiti mamati nga agtrabaho a sangkamaysa nga agtitinnulong kabayatan ti panangitrabahoda iti pannakaisalakanda nga addaan iti panagbuteng, panagpigerger, ken awan kapadana a rag-o.1
-
Inikkannatayo kadagiti nasantuan a kasuratan—ti naisurat a balikasna kadatayo.
-
Inikkannnatayo iti nagadu a ramit ti moderno a teknolohia a makatulong kadatayo iti panagbalintayo a disipulo. Adu kadagitoy a nakaskasdaaw a ramit ti masarakan iti LDS.org.
Apay nga inikkannatayo ti Nailangitan nga Amatayo iti kasta unay a kaaduna a tulong? Gapu ta ay-ayatennatayo. Ken gapu ta, kas iti kinunana maipapan ti Bagina, “Daytoy ti aramidko ken gloriak—mangipatungpal iti saan nga ipapaptay ken agnanayon a biag ti tao.”2
Iti sabali a pannao, Ti Nailangitan nga Ama ti Diostayo, ken ti Dios ti mannursuro kadatayo.
Ammo ti Amatayto iti Langit ti kasapulan dagiti annakna a nasaysayaat ngem iti asino man. Daytoy ti aramidna ken gloria nga agtultuloy a mangtulong kadatayo, nga ik-ikkannatayo kadagiti nakaskasdaaw a banbanag ken naespirituan a pamataudan a mangtulong kadatayo iti dalantayo tapno agsubli Kenkuana.
Tunggal Ama ket Mannursuro
Iti sumagmamano a lugar ti lubong, dagiti amma ket padayawan dagiti pamilia ken kagimongan iti bulan ti Hunio. Kanayon a nasayaat a dayawen ken respetarentayo dagiti nagannak kadatayo. Agaramid dagiti amma iti adu a nasasayaat a banag para iti pamiliada ken addaanda iti adu a madaydayaw a kababalin. Dua kadagiti kapatgan nga akem dagiti amma iti biagda kadagiti annakda ket ti panagbalinda a nasayaat a pagwadan ken mannursuro. Ad-adu pay ti maaramid dagiti amma ngem iti mangibaga kadagiti annakda no ania ti umno wenno biddut; ad-adu pay ti maaramidda ngem iti mangted ti pagbasaan kadakuada ket namnamaem ida no ania ti panangkunada iti biag para kadakuada.
Sursuruan dagiti amma dagiti napapateg nga annakda ket ipakitada babaen ti nasayaat a pagwadanda ti wagas a pakapagbiagan iti napudno a panagbiag. Saan a panawan dagiti amma dagiti annakda nga agmaymaysa ngem sidadaan a saranayenda ida, tulunganda ida a tumakder no maitibkolda, tumultulongda kadakuada a mangparmek kadagiti rigat a masarangetda. Ken no dadduma, nainsiriban a lungalong nga, ipalubos dagiti amma nga agrigat dagiti annakda, ta maamirisda a mabalin a daytoy ti kasayaatan a wagas tapno makasursuroda.
Mannursurotayo Amin
Idinto nga aramiden daytoy dagiti amma ditoy a daga para kadagiti bukodda nga annak, ti panangisuro ket maysa a banag a nasken nga idiayatayo it amin nga annak ti Dios, ania man ti edad, lugar, wenno kasasaad. Laglagipen, annak ti Dios dagiti kakabsattayo. Kamengtayo amin ti maymaysa nga agnanayon a pamilia.
Babaen iti daytoy nasken nga agbalintayo amin a mannursuro a sigagagar a dumanon ken tumulong iti maysa ken maysa tapno mapagbalintayo amin ti bagbagitayo a kasasayaatan. Gapu ta annaknatayo ti Dios, addaantayo iti potensial nga agbalin a kas Kenkuana. Panagayat iti Dios ken kadagiti padatayo a tao, panagtungpal kadagiti bilin ti Dios, ken panangsurot iti pagwadan ni Cristo ket isu dagitoy ti nalinteg, akikid, ken narag-o a dalan nga agsubli iti sidong dagiti nailangitan a nagannak.
No ipatpategnatayo unay ti Dios ti sangkataw-an, gapu ta Isu ti mangisuro kadatayo, nalabit a mabalintayo met a tulongan dagiti padatayo a tao, ania man ti maris ti kudilda, ken kasasaadda iti panagbiag, pagsasao, wenno relihion. Agbalintayo koma a naparegta a mannursuro ken mangbendision iti biag dagiti dadduma—saan laeng a dagiti bukodtayo nga annak no di ketdi pay ti amin nga annak ti Dios iti intero a lubong.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti First Presidency Message, June 2016. Ilokano. 12866 864
Panangisuro manipud iti Daytoy a Mensahe
Mabalin a kayatmo nga irugi babaen ti panangkiddaw kadagiti sursuruam a panunotenda ti maysa a kanito idi insuro ida ti Nailangitan nga Ama. Mabalinmo a kiddawen kadakuada a mangpanunot kadagiti pagpadaan dayta a kanito ken ti kanito idi nariknada nga insuro ida di amada iti rabaw ti daga. Awisem ida a mangisurat kadagiti pagpadaan iti no kasano a nasursuruanda. Mabalin a karitem ida a mangpadas a mangtulad iti banag nga insuratda iti panagkagumaan nga agbalin a nasaysayaat a pagwadan kadagiti dadduma.