Mensahe iti Visiting Teaching, Hunio 2016
Dagiti Ordinansa ken Katulagan iti Templo
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawat iti “Ti Kaamaan: Maysa a Waragawag iti Lubong” ket mangpadakkel iti pammatiyo iti Dios ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati, Pamilia,Tulong
Amin nga ordinansa a kasapulan para iti pannakaisalakan ken pannakaintan-ok ket kaduaen dagiti katulagan iti Dios. “Ti panagaramid ken panagtungpal kadagiti katulagan ket kayatna a sawen a panangpili a mangibegkes iti bagbagitayo iti Amatayo iti Langit ken ni Jesucristo,” kinuna ni Linda K. Burton, Relief Society general president.1
Kinuna ni Elder Neil L. Andersen ti Korum dagiti Sangapulo-ket-dua nga Apostol, “Kinuna ti Apo, ‘Kadagiti ordinansa … maiparangarang ti bileg ti kinadios.’
“Adda dagiti naisangsangayan a bendision manipud iti Dios para iti tunggal maikari a tao a nabuniagan, umawat iti Espiritu Santo, ken kanayon a makiranud iti sakramento.”2
“No mapan iti templo dagiti lallaki ken babbai,,” kinuna ni Elder M. Russell Ballard ti Korum dagiti Sangapulo-ket-dua nga Apostoi, “agpadada a naisagutan iti maymaysa a bileg, a daytoy ti bileg ti priesthood …
“… Amin a lallaki ken amin a babbai ket makaala iti daytoy a bileg para iti tulong iti panagbiagda. Amin a nagaramid kadagiti sagrado a katulagan iti Apo ken mangdayaw kadagitia a katulagan ket maikari nga umawat iti personal a paltiing, tapno mabendisionan iti panagserserbi dagiti anghel, tapno makisarita iti Dios, tapno umawat ti pakabuklan ti ebanghelio, ken, kangrunaanna, tapno agbalin nga agtawid kas ken ni Jesucristo iti amin nga adda iti Amatayo.”3
Dagiti Mainayon a Nasantuan a Kasuratan
Dagiti Estoria ti Tattao a Sibibiag Pay
Idi 2007, uppat nga aldaw kalpasan ti dakkel a ginggined iti Peru, naam-ammo ni Elder Marcus B. Nash ti Seventy ti branch president Wenceslao Conde ken ti asawana, ni Pamela. “Sinaludsod ni Elder Nash ken ni Sister Conde no komusta dagiti babassit nga annakna. Siiisem nga insungbatna a babaen ti kinaimbag ti Dios natalged ken nasayaatda. Kinomustana ti pagtaengan dagiti Conde.
“‘Awanen,’ gagangay a kinunana.
“… ’Ngem,’ nadlaw ni Elder Nash, ‘umis-isemka bayat ti panagsaritata.’
“’Wen,’ kinunana, ‘nagkararagak ket naaddaanak iti kappia. Adda kadakami ti amin a kasapulanmi. Adda kadakami iti tunggal maysa, adda kadakami dagiti annakmi, nailantipkami iti templo, addaankami iti nakaskasdaaw a Simbaan, ken adda kadakami ti Apo. Makaibangonkami manen iti tulong ti Apo.’ …
“Ania ti maipapan iti panagaramid ken panagtungpal kadagiti katulagan iti Dios a mangted kadatayo iti bileg nga umisem iti baet dagiti rigrigat, tapno mapagbalin a balligi ti panagrigat … ?”
“Ti Dios ti pagtaudan. Ti panangalami iti dayta a bileg ket babaen dagiti katulagan Kenkuana.”4
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/15. Pannakaanamongna a maipatarus: 6/15. Pannakaipatarus ti Visiting Teaching Message, June 2016. Ilokano. 12866 864
Ibilang Daytoy
Kasano a mapapigsa ken mapabilegnatayo dagiti ordinansa ken katulagan iti templo?