ຂ່າວສານຈາກຝ່າຍປະທານສູງສຸດ, ເດືອນມິຖຸນາ 2016
ພຣະບິດາຂອງເຮົາ, ຄູສອນຂອງເຮົາ
ໂດຍ ປະທານດີເດີ ແອັຟ ອຸກດອບ
ທີ່ປຶກສາທີສອງໃນຝ່າຍປະທານສູງສຸດ
ທ່ານເຄີຍເປີດແກັດອັນໃດອັນໜຶ່ງບໍ ທີ່ສິ່ງຂອງໃນນັ້ນຍັງບໍ່ຖືກປະກອບເຂົ້າກັນເທື່ອ, ເມື່ອທ່ານ ດຶງເຈ້ຍ ອອກມາອ່ານ ວິທີປະກອບມັນເຂົ້າກັນ, ທ່ານຄິດວ່າ, “ມັນສັບສົນຂະໜາດ”?
ບາງເທື່ອ, ເຖິງແມ່ນເຮົາມີເຈດຕະນາດີ ແລະ ມີຄວາມໝັ້ນໃຈ, ແຕ່ເຮົາໄດ້ດຶງສ່ວນໃດສ່ວນໜຶ່ງອອກມາ, ແລ້ວຖາມວ່າ, “ອັນນີ້ແມ່ນຫຍັງ?” ຫລື “ມັນແມ່ນສຳລັບບ່ອນໃດ?”
ເຮົາຈະງຸດງິດໃຈຫລາຍຂຶ້ນ ເມື່ອເຮົາອ່ານຂໍ້ຄວາມທີ່ຕິດຢູ່ເທິງແກັດ ເວົ້າວ່າ, “ຕ້ອງປະກອບເຂົ້າກັນ—ອາຍຸ 8 ປີ ຂຶ້ນໄປ.” ຍ້ອນວ່າເຮົາບໍ່ຮູ້ຈັກວິທີ, ສິ່ງນີ້ບໍ່ໄດ້ຊ່ວຍໃຫ້ເຮົາມີຄວາມໝັ້ນໃຈ ຫລື ມີຄວາມເຊື່ອໝັ້ນໃນຕົວເຮົາເອງຫລາຍຂຶ້ນເລີຍ.
ບາງເທື່ອເຮົາກໍມີປະສົບການທີ່ຄ້າຍຄືກັນນີ້ກັບເລື່ອງພຣະກິດຕິຄຸນ. ເມື່ອເຮົາຫລຽວເບິ່ງບາງສ່ວນ, ເຮົາອາດເກົາຫົວ ແລະ ບໍ່ຮູ້ວ່າ ພາກສ່ວນນັ້ນແມ່ນສຳລັບບ່ອນໃດ. ຫລື ເມື່ອເຮົາກວດກາເບິ່ງອີກສ່ວນໜຶ່ງ, ເຮົາອາດຮູ້ວ່າ ຫລັງຈາກເຮົາໄດ້ພະຍາຍາມຫລາຍທີ່ສຸດ ທີ່ຈະເຂົ້າໃຈມັນ, ແຕ່ເຮົາຍັງບໍ່ຮູ້ວ່າ ເປັນຫຍັງພາກສ່ວນນັ້ນ ຈຶ່ງມີຢູ່ນຳ.
ພຣະບິດາເທິງສະຫວັນຂອງເຮົາ ເປັນຄູສອນຂອງເຮົາ
ໂຊກດີທີ່ພຣະບິດາເທິງສະຫວັນໄດ້ປະທານຄຳແນະນຳອັນດີເລີດໃຫ້ເຮົາ ເພື່ອເປັນການກໍ່ສ້າງຊີວິດຂອງເຮົາ ແລະ ຊ່ວຍປະກອບຕົວເຮົາເອງໃຫ້ດີທີ່ສຸດ. ຄຳແນະນຳເຫລົ່ານັ້ນ ມີຜົນຕໍ່ທຸກຄົນ ໂດຍບໍ່ຈຳກັດອາຍຸ ຫລື ສະພາບການ. ພຣະອົງໄດ້ປະທານພຣະກິດຕິຄຸນ ແລະ ສາດສະໜາຈັກຂອງພຣະເຢຊູຄຣິດໃຫ້ເຮົາ. ພຣະອົງໄດ້ປະທານແຜນແຫ່ງການໄຖ່, ແຜນແຫ່ງຄວາມລອດ, ແມ່ນແຕ່ແຜນແຫ່ງຄວາມສຸກໃຫ້ເຮົາ. ພຣະອົງບໍ່ໄດ້ປະເຮົາໃຫ້ຢູ່ຕາມລຳພັງ ກັບທຸກສິ່ງທີ່ບໍ່ແນ່ນອນ ຫລື ກັບການທ້າທາຍຕ່າງໆໃນຊີວິດ, ໂດຍກ່າວວ່າ, “ຮັບເອົາມັນໄປ. ໂຊກດີເດີ. ໃຫ້ຄິດຫາທາງເອງ.”
ຖ້າຫາກເຮົາພຽງແຕ່ມີຄວາມອົດທົນ ແລະ ຫລຽວເບິ່ງດ້ວຍໃຈທີ່ຖ່ອມ ແລະ ດ້ວຍຄວາມຄິດທີ່ເປີດກວ້າງ, ແລ້ວເຮົາຈະພົບເຫັນວ່າ ພຣະເຈົ້າໄດ້ປະທານເຄື່ອງມືຫລາຍຢ່າງໃຫ້ເຮົາ ເພື່ອຊ່ວຍເຮົາໃຫ້ເຂົ້າໃຈຫລາຍຂຶ້ນກັບຄຳແນະນຳອັນລະອຽດຂອງພຣະອົງ ສຳລັບຄວາມສຸກໃນຊີວິດຂອງເຮົາ:
-
ພຣະອົງໄດ້ປະທານພຣະວິນຍານບໍລິສຸດ ທີ່ເປັນຂອງປະທານ ທີ່ມີຄ່າທີ່ສຸດ ໃຫ້ເຮົາ, ຊຶ່ງມີຄວາມສາມາດທີ່ຈະເປັນຄູສອນພິເສດສ່ວນຕົວ ທີ່ມາຈາກສະຫວັນສຳລັບເຮົາ ເມື່ອເຮົາສຶກສາພຣະຄຳຂອງພຣະເຈົ້າ ແລະ ພະຍາຍາມເຮັດໃຫ້ຄວາມຄິດ ແລະ ການກະທຳຂອງເຮົາສອດຄ່ອງກັບພຣະຄຳຂອງພຣະອົງ.
-
ພຣະອົງອະນຸຍາດໃຫ້ເຮົາເຂົ້າຫາພຣະອົງໄດ້ຕະຫລອດເວລາ ຜ່ານການອະທິຖານດ້ວຍສັດທາ ແລະ ຜ່ານການອ້ອນວອນດ້ວຍເຈດຕະນາອັນແທ້ຈິງ.
-
ພຣະອົງໄດ້ປະທານອັກຄະສາວົກ ແລະ ສາດສະດາໃນປະຈຸບັນໃຫ້ເຮົາ, ຜູ້ເປີດເຜີຍພຣະຄຳຂອງພຣະເຈົ້າ ໃນສະໄໝຂອງເຮົາ ແລະ ມີສິດອຳນາດທີ່ຈະຜູກມັດ ຫລື ຜະນຶກຢູ່ເທິງແຜ່ນດິນໂລກ ແລະ ໃນສະຫວັນ.
-
ພຣະອົງໄດ້ຟື້ນຟູສາດສະໜາຈັກຂອງພຣະອົງຄືນມາໃໝ່—ເປັນອົງການຂອງຜູ້ທີ່ເຊື່ອ ຊຶ່ງຮ່ວມເຮັດວຽກງານດ້ວຍກັນ ເພື່ອຊ່ວຍເຫລືອຊຶ່ງກັນແລະກັນ ໃນຂະນະທີ່ເຂົາເຈົ້າສະແຫວງຫາຄວາມລອດ ດ້ວຍຄວາມຢ້ານກົວ, ຕົວສັ່ນ, ແລະ ດ້ວຍຄວາມສຸກທີ່ບໍ່ມີສິ່ງໃດເທົ່າທຽມໄດ້.1
-
ພຣະອົງໄດ້ປະທານພຣະຄຳພີທີ່ສັກສິດໃຫ້ເຮົາ—ເປັນພຣະຄຳຂອງພຣະອົງ ທີ່ຂຽນໄວ້ໃຫ້ເຮົາ.
-
ພຣະອົງໄດ້ປະທານເຄື່ອງມືຝ່າຍເທັກໂນໂລຈີ ທີ່ທັນສະໄໝຈົນນັບບໍ່ຖ້ວນໃຫ້ເຮົາ ເພື່ອຊ່ວຍເຫລືອເຮົາໃນເສັ້ນທາງເດີນຂອງການເປັນສານຸສິດ. ເຄື່ອງມືທີ່ໜ້າອັດສະຈັນໃຈຫລາຍຢ່າງດັ່ງກ່າວນີ້ ມີຢູ່ທີ່ LDS.org.
ເປັນຫຍັງພຣະບິດາເທິງສະຫວັນຂອງເຮົາ ຈຶ່ງໄດ້ປະທານສິ່ງຊ່ວຍເຫລືອໃຫ້ເຮົາຢ່າງຫລວງຫລາຍ? ເພາະວ່າພຣະອົງຮັກເຮົາ. ແລະ ເພາະວ່າ, ດັ່ງທີ່ພຣະອົງໄດ້ກ່າວເຖິງພຣະອົງເອງວ່າ ມັນແມ່ນວຽກງານ ແລະ ລັດສະໝີພາບຂອງພຣະອົງ—ທີ່ຈະກໍ່ໃຫ້ເກີດຄວາມເປັນອະມະຕະ ແລະ ຊີວິດນິລັນດອນຂອງມະນຸດ.2
ໃນອີກຄຳໜຶ່ງ, ພຣະບິດາເທິງສະຫວັນເປັນພຣະເຈົ້າຂອງເຮົາ, ແລະ ພຣະເຈົ້າເປັນຄູສອນຂອງເຮົາ.
ພຣະບິດາເທິງສະຫວັນຂອງເຮົາຮູ້ຈັກຫລາຍກວ່າຄົນອື່ນໆ ເຖິງຄວາມຕ້ອງການຂອງລູກໆຂອງພຣະອົງ. ມັນແມ່ນວຽກງານຂອງພຣະອົງທີ່ຈະຊ່ວຍເຫລືອເຮົາໃນທຸກທິດທຸກທາງ, ໄດ້ປະທານແຫລ່ງຊ່ວຍເຫລືອທາງຝ່າຍໂລກ ແລະ ຝ່າຍວິນຍານໃຫ້ເຮົາ ເພື່ອຊ່ວຍເຮົາໃນເສັ້ນທາງທີ່ພາກັບໄປຫາພຣະອົງ.
ພໍ່ທຸກຄົນເປັນຄູສອນ
ໃນບາງພາກສ່ວນຂອງໂລກ, ພໍ່ທັງຫລາຍໄດ້ຮັບກຽດຈາກຄອບຄົວ ແລະ ສັງຄົມ ໃນເດືອນມິຖຸນາ. ມັນເປັນສິ່ງດີສະເໝີທີ່ຈະໃຫ້ກຽດ ແລະ ນັບຖືພໍ່ແມ່ຂອງເຮົາ. ພໍ່ໄດ້ເຮັດຫລາຍສິ່ງທີ່ດີສຳລັບຄອບຄົວຂອງຕົນ ແລະ ມີຄຸນສົມບັດທີ່ໜ້ານັບຖືຫລາຍຢ່າງ. ບົດບາດທີ່ສຳຄັນທີ່ສຸດສອງຢ່າງຂອງພໍ່ ໃນຊີວິດຂອງລູກໆຂອງຕົນ ແມ່ນການເປັນຕົວຢ່າງ ແລະ ເປັນຄູສອນທີ່ດີ. ພໍ່ເຮັດຫລາຍກວ່າທີ່ຈະບອກລູກໆວ່າ ອັນໃດຖືກ ຫລື ອັນໃດຜິດ; ເຂົາເຈົ້າເຮັດຫລາຍກວ່າທີ່ຈະໂຍນຫລັກສູດໃຫ້ລູກ ແລະ ຄາດຫວັງໃຫ້ລູກຝ່າຟັນກັບຊີວິດດ້ວຍຕົວເອງ.
ພໍ່ຈະເປັນຄູສອນໃຫ້ລູກໆທີ່ລ້ຳຄ່າຂອງຕົນ ແລະ ສະແດງວິທີດຳລົງຊີວິດຢ່າງຊື່ສັດໃຫ້ລູກເຫັນ ດ້ວຍຕົວຢ່າງທີ່ດີຂອງຕົນ. ພໍ່ຈະບໍ່ປ່ອຍໃຫ້ລູກໆຢູ່ຕາມລຳພັງ ແຕ່ຈະຟ້າວໄປຊ່ວຍເຫລືອ, ຊ່ວຍພະຍຸງເຂົາຂຶ້ນ ເມື່ອເຂົາສະດຸດລົ້ມ. ແລະ ບາງເທື່ອ ເມື່ອເຖິງເວລາທີ່ລູກຕ້ອງຮຽນຮູ້, ພໍ່ຈະປ່ອຍໃຫ້ລູກດີ້ນລົນ, ໂດຍທີ່ຮູ້ວ່າ ສິ່ງນີ້ເປັນວິທີທີ່ດີທີ່ສຸດສຳລັບເຂົາ ທີ່ຈະຮຽນຮູ້.
ເຮົາທຸກຄົນເປັນຄູສອນ
ເຖິງແມ່ນພໍ່ຢູ່ໃນໂລກເຮັດສິ່ງນີ້ສຳລັບລູກໆຂອງຕົນຢູ່ແລ້ວ, ແຕ່ຄວາມຮູ້ສຶກຂອງການເປັນຄູສອນ ເປັນບາງສິ່ງທີ່ເຮົາຕ້ອງມອບໃຫ້ລູກໆທຸກຄົນຂອງພຣະເຈົ້າ, ໂດຍບໍ່ຈຳກັດເລື່ອງອາຍຸ, ສະຖານທີ່, ຫລື ສະພາບການ. ຈົ່ງຈື່ຈຳໄວ້ວ່າ, ລູກໆຂອງພຣະເຈົ້າ ເປັນອ້າຍເອື້ອຍນ້ອງຂອງເຮົາ; ເຮົາມາຈາກຄອບຄົວນິລັນດອນ ອັນດຽວກັນ.
ໃນຄວາມໝາຍນີ້, ຂໍໃຫ້ເຮົາທຸກຄົນຈົ່ງເປັນຄູສອນ—ຕື່ນເຕັ້ນທີ່ຈະເອື້ອມອອກໄປ ແລະ ຊ່ວຍເຫລືອຊຶ່ງກັນແລະກັນ ເພື່ອຈະໄດ້ກາຍເປັນຕົວເຮົາເອງໃຫ້ດີທີ່ສຸດ. ເພາະເຮົາເປັນລູກຂອງພຣະເຈົ້າ, ເຮົາຈຶ່ງມີຄວາມສາມາດທີ່ຈະກາຍເປັນເໝືອນດັ່ງພຣະອົງໄດ້. ການຮັກພຣະເຈົ້າ ແລະ ຮັກເພື່ອນມະນຸດຂອງເຮົາ, ການຮັກສາພຣະບັນຍັດຂອງພຣະເຈົ້າ, ແລະ ການຕິດຕາມແບບຢ່າງຂອງພຣະຄຣິດ ເປັນທາງທີ່ຊື່, ແຄບ, ແລະ ປິຕິຍິນດີ ຊຶ່ງພາກັບຄືນໄປສູ່ທີ່ປະທັບຂອງພຣະບິດາມານດາ ໃນສະຫວັນຂອງເຮົາ.
ຖ້າຫາກພຣະເຈົ້າແຫ່ງຈັກກະວານ ມີຄວາມເປັນຫ່ວງເປັນໃຍຕໍ່ເຮົາຫລາຍຂະໜາດນີ້ ຈົນວ່າພຣະອົງໄດ້ເປັນຄູສອນຂອງເຮົາ, ບາງທີເຮົາກໍຄວນເອື້ອມອອກໄປຫາເພື່ອນມະນຸດຄືກັນ, ໂດຍບໍ່ຈຳກັດເລື່ອງຜິວພັນ, ເຊື້ອຊາດ, ສະພາບການທາງສັງຄົມເສດຖະກິດ, ພາສາ, ຫລື ສາດສະໜາ. ຂໍໃຫ້ເຮົາຈົ່ງກາຍເປັນຄູສອນທີ່ໄດ້ຮັບການດົນໃຈ ແລະ ເປັນພອນຕໍ່ຊີວິດຂອງຄົນອື່ນ—ບໍ່ພຽງແຕ່ຕໍ່ລູກໆຂອງເຮົາເອງເທົ່ານັ້ນ, ແຕ່ຕໍ່ລູກໆທຸກຄົນຂອງພຣະເຈົ້ານຳອີກ ຕະຫລອດທົ່ວໂລກ.
© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ First Presidency Message, June 2016. Laotian. 12866 331
ການສອນຈາກຂ່າວສານນີ້
ທ່ານອາດເລີ່ມຕົ້ນດ້ວຍການຂໍໃຫ້ຄົນທີ່ທ່ານສອນ ຄິດເຖິງຕອນທີ່ພຣະບິດາເທິງສະຫວັນໄດ້ສິດສອນເຂົາເຈົ້າ. ແລ້ວ ທ່ານອາດຂໍໃຫ້ເຂົາເຈົ້າຄິດເຖິງຕອນທີ່ຄ້າຍຄືກັນ ເມື່ອເຂົາເຈົ້າໄດ້ຮັບການສິດສອນຈາກພໍ່ໃນໂລກຂອງເຂົາເຈົ້າ. ເຊື້ອເຊີນເຂົາເຈົ້າໃຫ້ຂຽນສິ່ງທີ່ເຂົາເຈົ້າໄດ້ຮ່ຳຮຽນ ທີ່ຄ້າຍຄືກັນນັ້ນ. ທ່ານອາດທ້າທາຍເຂົາເຈົ້າໃຫ້ພະຍາຍາມເຮັດຕາມແບບຢ່າງ ທີ່ເຂົາເຈົ້າໄດ້ຂຽນໄວ້ ໃນຄວາມພະຍາຍາມທີ່ຈະເປັນຕົວຢ່າງທີ່ດີກວ່າໃຫ້ກັບຄົນອື່ນ.