Messaġġ tal-Għalliema taż-Żjajjar, Ġunju 2016
Ordinanzi u Patti tat-Tempju
Bl-għajnuna tat-talb studja dan il-materjal u fittex sabiex tkun taf x’ għandek taqsam ma’ ħutek. Kif l-għarfien aħjar tal-“Il-Familja: Proklamazzjoni lid-Dinja” jista’ jwassalkom biex tkabbru l-fidi tagħkom f’ Alla u tbierku lil dawk li intom responsabbli minnhom permezz tat-tagħlim taż-żjajjar? Għal aktar informazzjoni, żuru reliefsociety.lds.org.
Fidi, Familja, Għajnuna
Flimkien mal-ordinanzi neċessarji kollha għas-salvazzjoni u l-eżaltazzjoni hemm ukoll il-patti li aħna nagħmlu ma’ Alla. “Li nagħmlu u nżommu l-patti jfisser li nagħżlu li norbtu lilna nfusna ma’ Missierna tas-Smewwiet u Ġesù Kristu,” qalet Linda K. Burton, president ġenerali tas-Soċjetà tal-Għajnuna.1
Il-Presbiteru Neil L. Andersen tal-Kworum tat-Tnax-il Appostlu qal, “Il-Mulej qal, ‘Fl-ordinanzi … tidher il-qawwa tad-divinità.’
“Hemm barkiet speċjali minn Alla għal kull persuna denja li titgħammed, tirċievi l-Ispirtu s-Santu u tieħu sehem regolarment fis-sagrament.”2
“Meta l-irġiel u n-nisa jmorru t-tempju,” qal il-Presbiteru M. Russell Ballard tal-Kworum tat-Tnax-il Appostlu, “huma t-tnejn jiġu mogħtija l-istess qawwa, li hi l-qawwa tas-saċerdozju …
“… Kull raġel u kull mara għandhom aċċess għal din il-qawwa li tista’ tgħinhom f’ ħajjithom. Dawk kollha li għamlu patti sagri mal-Mulej u li jonoraw dawk il-patti huma eleġibbli li jirċievu r-rivelazzjoni personali, li jkunu mberkin bil-qadi tal-anġli, li jitkellmu ma’ Alla, li jirċievu l-milja tal-evanġelju, u, ultimament, isiru werrieta flimkien ma’ Ġesù Kristu ta’ dak kollu li għandu l-Missier.”3
Skrittura Addizzjonali
Stejjer Ħajjin
Fl-2007, erbat ijiem wara t-terrimot enormi fil-Peru, il-Presbiteru Marcus B. Nash tas-Sebgħin iltaqa’ mal-president tal-fergħa ta’ Wenceslao Conde u mal-mara tiegħu, Pamela. “Il-Presbiteru Nash staqsa lil Sister Conde kif kienu wliedha ċ-ċkejknin. Bi tbissima, hija wieġbet li permezz tat-tjubija ta’ Alla huma kienu jinsabu lkoll tajbin ‘il bogħod mill-periklu. Huwa staqsiehom dwar id-dar tagħhom.
“Hi wieġbet sempliċiment, ‘Inqerdet.’
“… ‘U madankollu,’ innota l-Presbiteru Nash, ‘inti tinsab titbissem waqt li qed nitkellmu.’
“‘Iva,’ qalet hi, ‘jiena tlabt u ninsab fil-paċi. Għandna kull ma neħtieġu. Għandna lil xulxin, għandna lil uliedna, aħna ġejna ssiġillati fit-tempju, għandna din il-Knisja meraviljuża, u għandna lill-Mulej. Nerġgħu nibnu bl-għajnuna tal-Mulej.’ …
“Tgħid x’inhi dik il-ħaġa li meta aħna nagħmlu u nżommu l-patti ma’ Alla tagħtina l-qawwa li nitbissmu minkejja d-diffikultajiet li ngħaddu minnhom, u nibdlu t-tribulazzjoni fi trijonf … ?”
“Is-sors hu Alla. L-aċċess tagħna għal dik il-qawwa huwa permezz tal-patti tagħna miegħu.”4
© 2016 minn Intellectual Reserve, Inc. Id-drittijiet kollha riservati. Stampat fil-Ġermanja. Approvazzjoni bl-Ingliż: 6/15. Approvazzjoni tat-traduzzjoni: 6/15. Traduzzjoni ta’ Visiting Teaching Message, June 2016. Maltese. 12866 159
Ikkunsidraw Dan
L-ordinanzi u l-patti tat-tempju kif isaħħuna u jqawwuna?