ຊາວໜຸ່ມ
ຈິງໃຈຕໍ່ສັດທາ
ປະທານມອນສັນເລົ່າເລື່ອງກ່ຽວກັບຄອບຄົວຜູ້ບຸກເບີກຄອບຄົວໜຶ່ງ ແລະ ແລ້ວໄດ້ອ້າງເຖິງຂໍ້ຄວາມຂອງປະທານຈອດ ອາວເບີດ ສະມິດ ວ່າ: “ທ່ານຈະດຳລົງຊີວິດໃຫ້ຈິງໃຈຕໍ່ສັດທາຂອງບັນພະບຸລຸດຂອງທ່ານບໍ? … ພະຍາຍາມໃຫ້ມີຄ່າຄວນຕໍ່ການເສຍສະລະ ທີ່ [ເຂົາເຈົ້າ] ໄດ້ເຮັດເພື່ອທ່ານ.” ບໍ່ວ່າເຈົ້າມີບັນພະບຸລຸດທີ່ເປັນຜູ້ບຸກເບີກ ຫລື ເຈົ້າເປັນສະມາຊິກລຸ້ນທຳອິດຂອງສາດສະໜາຈັກກໍຕາມ, ເຈົ້າໄດ້ເຮັດຕາມຕົວຢ່າງແຫ່ງສັດທາ ເພື່ອການນຳພາ ແລະ ເພື່ອຄວາມເຂັ້ມແຂງບໍ? ນີ້ຄືວິທີທີ່ດີ ທີ່ເຈົ້າສາມາດເລີ່ມຕົ້ນໄດ້:
1. ຂຽນຊື່ຂອງ ຄົນທີ່ເຈົ້ານັບຖືໄວ້ໃນເຈ້ຍ ເຂົາເຈົ້າສາມາດເປັນສະມາຊິກໃນຄອບຄົວຂອງເຈົ້າເອງ (ອະດີດ ຫລື ປະຈຸບັນ), ໝູ່ເພື່ອນ, ຜູ້ນຳຂອງສາດສະໜາຈັກ, ຫລື ຜູ້ຄົນໃນພຣະຄຳພີ.
2. ຂຽນຄຸນສົມບັດຂອງເຂົາເຈົ້າ ທີ່ເຈົ້າມັກ ໄວ້ໃນເຈ້ຍ. ແມ່ຂອງເຈົ້າເປັນຄົນອົດທົນຫລາຍບໍ? ບາງທີເພື່ອນຂອງເຈົ້າກໍດີຕໍ່ຄົນອື່ນ. ບາງທີເຈົ້າມັກຄວາມກ້າຫານຂອງນາຍທັບໂມໂຣໄນ.
3. ເລືອກຄຸນສົມບັດໜຶ່ງ ຈາກເຈ້ຍທີ່ເຈົ້າຂຽນໄວ້ ແລະ ຖາມຕົນເອງວ່າ, “ເຮົາຈະໄດ້ຄຸນສົມບັດນີ້ໄດ້ແນວໃດ? ເຮົາຕ້ອງເຮັດຫຍັງ ເພື່ອພັດທະນາສິ່ງນີ້ໃນຊີວິດຂອງເຮົາ?”
4. ຂຽນແຜນການທີ່ຈະພັດທະນາຄຸນສົມບັດນີ້ ແລະ ເກັບມັນໄວ້ບ່ອນທີ່ເຈົ້າຈະຫລຽວເຫັນມັນເລື້ອຍໆ, ເພື່ອເຕືອນເຈົ້າເຖິງເປົ້າໝາຍຂອງເຈົ້າ. ອະທິຖານຂໍຄວາມຊ່ວຍເຫລືອຈາກພຣະບິດາເທິງສະຫວັນ ແລະ ກວດເບິ່ງຄວາມກ້າວໜ້າຂອງເຈົ້າເປັນປະຈຳ. ເມື່ອເຈົ້າຮູ້ສຶກວ່າ ເຈົ້າໄດ້ພັດທະນາຄຸນສົມບັດນີ້ພຽງພໍແລ້ວ, ເຈົ້າສາມາດເລືອກເອົາຄຸນສົມບັດຢ່າງອື່ນ ເພື່ອພັດທະນາ.
ໃຫ້ຈື່ຈຳໄວ້ວ່າ ເມື່ອເຮົາພັດທະນາຄຸນສົມບັດທີ່ດີ ໃນຕົວເອງ, ເຮົາບໍ່ພຽງແຕ່ໃຫ້ກຽດແກ່ສັດທາ ແລະ ການເສຍສະລະຂອງບັນພະບຸລຸດຂອງເຮົາເທົ່ານັ້ນ, ແຕ່ເຮົາສາມາດເປັນອິດທິພົນໃນທາງທີ່ດີໃຫ້ແກ່ຄົນທີ່ຢູ່ອ້ອມຮອບຕົວເຮົາໄດ້ນຳອີກ.