ຂ່າວສານການຢ້ຽມສອນ, ເດືອນກໍລະກົດ 2016
ຄວາມສາມາດຂອງເຮົາສຳລັບການເປັນພໍ່ແມ່
ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈໃບ “ຄອບຄົວ: ການປະກາດຕໍ່ໂລກ” ເພີ່ມສັດທາຂອງທ່ານໃນພຣະເຈົ້າ ແລະ ເປັນພອນໃຫ້ແກ່ຄົນທີ່ທ່ານດູແລ ຜ່ານການຢ້ຽມສອນ ໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.
ສັດທາ, ຄອບຄົວ, ສົງເຄາະ
“ມັນເປັນສິ່ງຈຳເປັນທີ່ລູກໆທາງວິນຍານຂອງພຣະເຈົ້າ ໄດ້ຮັບການກຳເນີດທາງມະຕະ ແລະ ມີໂອກາດທີ່ຈະກ້າວໜ້າ ໄປສູ່ຊີວິດນິລັນດອນ,” ແອວເດີ ດາລິນ ເອັຈ ໂອກສ໌ ແຫ່ງກຸ່ມອັກຄະສາວົກສິບສອງ ໄດ້ສອນ. “ໃນຈຸດປະສົງອັນສູງສຸດຂອງແຜນແຫ່ງຄວາມສຸກອັນຍິ່ງໃຫຍ່, ຂ້າພະເຈົ້າເຊື່ອວ່າ ຊັບສົມບັດອັນສູງສຸດຢູ່ໃນໂລກນີ້ ແລະ ໃນສະຫວັນ ແມ່ນລູກໆ ແລະ ລູກຫລານທັງຫລາຍຂອງເຮົາ.”1
ແອວເດີ ນຽວ ແອວ ແອນເດີເຊັນ ແຫ່ງກຸ່ມອັກຄະສາວົກສິບສອງ ໄດ້ກ່າວວ່າ:
“ເຮົາເຊື່ອໃນການມີຄອບຄົວ, ແລະ ເຮົາເຊື່ອໃນການມີລູກໆ. …
“‘…ພຣະເຈົ້າໄດ້ສັ່ງ [ອາດາມ ແລະ ເອວາ], ໃຫ້ມີລູກເຕົ້າແຜ່ຂະຫຍາຍທະວີຄູນ, ແລະ ໃຫ້ປົກຄອງແຜ່ນດິນໂລກ’ [ປະຖົມມະການ 1:28]. …
“ພຣະບັນຍັດຂໍ້ນີ້ຍັງບໍ່ໄດ້ຖືກລືມ ຫລື ຖືກປ່ອຍປະລະເລີຍ ໃນສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.”2
ເຖິງແມ່ນ ບໍ່ແມ່ນທຸກຄົນພວກເຮົາ ຈະໄດ້ເປັນພໍ່ແມ່ຢູ່ໃນຊີວິດນີ້, ແຕ່ເຮົາສາມາດຊ່ວຍບຳລຸງລ້ຽງເດັກນ້ອຍໃນທຸກໄວທຸກອາຍຸ. ເຮົາຊື່ນຊົມກັບພອນຂອງການເປັນພາກສ່ວນໃນຄອບຄົວຂອງພຣະບິດາເທິງສະຫວັນ, ແລະ ເຮົາປະສົບກັບຄວາມສຸກ ແລະ ການທ້າທາຍ ໃນຖານະທີ່ເປັນພາກສ່ວນຂອງຄອບຄົວຢູ່ໃນໂລກ. ແລະ ສຳລັບຫລາຍຄົນ, ການເປັນພໍ່ແມ່ຍັງລໍຖ້າເຂົາເຈົ້າຢູ່ ໃນນິລັນດອນ ທີ່ຈະມາເຖິງ.
ຂໍ້ພຣະຄຳພີເພີ່ມເຕີມ
ເພງສັນລະເສີນ 127:3; ມັດທາຍ 18:3–5; 1 ນີໄຟ 7:1; Moses 5:2–3
ເລື່ອງຈິງໃນຊີວິດ
“ຫລາຍສຽງຢູ່ໃນໂລກນີ້ ບໍ່ຄິດວ່າການມີລູກເປັນສິ່ງສຳຄັນ ຫລື ແນະນຳໃຫ້ເລື່ອນເວລາຂອງການມີລູກ ຫລື ກຳນົດການກຳເນີດຢູ່ໃນຄອບຄົວ,” ແອວເດີ ແອນເດີເຊັນ ໄດ້ກ່າວ. “ບໍ່ດົນມານີ້ ພວກລູກສາວຂອງຂ້າພະເຈົ້າ ໄດ້ແນະນຳຂ້າພະເຈົ້າໃຫ້ໄປເບິ່ງບົດຄວາມຢູ່ໃນ blog ກ່ຽວກັບຜູ້ຍິງຄົນໜຶ່ງ (ຊຶ່ງນັບຖືສາດສະໜາຕ່າງຈາກພວກເຮົາ) ທີ່ມີລູກຫ້າຄົນ. ນາງໄດ້ກ່າວວ່າ: ‘[ການເຕີບໂຕ] ຂຶ້ນໃນວັດທະນະທຳນີ້, ມັນເປັນສິ່ງຍາກຫລາຍທີ່ຈະສັງເກດເຫັນການເປັນແມ່ ໃນທາງສາດສະໜາ. … ລູກໆມີລະດັບຕ່ຳກວ່າ ການຮຽນໃນວິທະຍາໄລ. ຕ່ຳກວ່າການໄປທ່ຽວທົ່ວໂລກ ຢ່າງແນ່ນອນ. ຕ່ຳກວ່າຄວາມສາມາດທີ່ຈະອອກໄປທ່ຽວໃນຕອນກາງຄືນ ຢ່າງສະບາຍ. ຕ່ຳກວ່າການເຝິກຮ່າງກາຍຢູ່ສູນອອກກຳລັງກາຍ. ຕ່ຳກວ່າການມີການງານໃດໆທີ່ທ່ານຫວັງ ຫລື ມີ.’ ແລ້ວນາງໄດ້ກ່າວຕື່ມວ່າ: ‘ການເປັນແມ່ ບໍ່ໄດ້ເປັນວຽກທີ່ເຮັດໃນເວລາຫວ່າງ, ມັນເປັນການເອີ້ນ. ການມີລູກ ບໍ່ແມ່ນການພຽງແຕ່ຄິດວ່າ ເພາະເຂົາໜ້າຮັກເທົ່ານັ້ນ. ມັນບໍ່ໄດ້ເປັນບາງສິ່ງທີ່ຈະເຮັດ ເມື່ອທ່ານພໍມີເວລາແບ່ງໃຫ້. ພຣະເຈົ້າໄດ້ປະທານເວລາໃຫ້ທ່ານ ເພື່ອເປັນພໍ່ແມ່ນີ້ແຫລະ.’”3
© 2016 ໂດຍ Intellectual Reserve, Inc. ສະຫງວນລິຂະສິດທຸກປະການ. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/16. ການແປໄດ້ຮັບອະນຸຍາດ: 6/16. ແປຈາກ Visiting Teaching Message, July 2016. Laotian. 12867 331
ໃຫ້ພິຈາລະນາສິ່ງນີ້
ໃນທາງໃດແດ່ ທີ່ຄອບຄົວຢູ່ໃນໂລກຂອງເຮົາ ຄ້າຍຄືກັນກັບຄອບຄົວໃນສະຫວັນຂອງເຮົາ?