Feiā ’āpī

Mau māite i tō rātou fa’aro’o

’Ua fa’ati’a te peresideni Monson i te hō’ē ’ā’amu nō te hō’ē pionie ’e ’ua fa’ahiti i te parau a te peresideni George Albert Smith : « Hina’aro ānei ’outou e mau māite i te fa’aro’o o tō ’outou tupuna ? … Tūtava i te fa’aea ti’amā noa nō te mau tusia ato’a tā [rātou] i rave nō ’outou ». E tupuna pionie anei tō ’outou ’e ’aore rā ’o ’outou te u’i mātāmua melo nō te ’Ēkālesia, tē hi’o anei ra outou i te mau hi’ora’a nō te fa’aro’o ’ei arata’i ’e ’ei pūai ? Teie te hō’ē rāve’a maita’i nō te ha’amata :

1. Hāmani i te hō’ē tāpura nō te feiā tā ’outou e fa’ahiahia nei. E melo ānei nō tō ’outou iho ’utuāfare (tei ma’iri ’e ’aore rā nō teie nei), te mau hoa, te feiā fa’atere o te ’Ēkālesia, ’e ’aore rā te mau ta’ata i roto i te mau pāpa’ira’a mo’a.

2. ’A pāpa’i i tō rātou mau maita’i ’o tā outou e au roa. E mea fa’a’oroma’i roa ānei tō ’outou metua vahine ? E mea maita’i paha tō ’outou hoa i ni’a i te ta’ata. Penei a’e mea au roa nā ’outou te itoito o te tāpena Moroni.

3. ’A rave mai hō’ē maita’i nō roto mai i tā ’outou tāpura ’e ’a ui ’ia ’outou iho, « Nāhea e roa’a ai iā’u i teie maita’i ? E aha tei ti’a ia’u ’ia rave nō te fa’atupu i te reira i roto i to’u orara’a ? »

4. ’A pāpa’i i tā ’outou fa’anahora’a nō te fa’atupura’a i teie maita’i ’e ’a vaiiho i te reira i te hō’ē vāhi ’o tā ’outou e ’ite pinepine, nō te fa’aha’amana’o ia ’outou i tā ’outou ’ōpuara’a. ’A pure nō te tauturu a te Metua i te Ao ra ’e ’a hi’opo’a tāmau i tō ’outou nu’ura’a i mua. I te taime ’a ’ite ai ’outou ē ’ua nava’i tō ’outou fa’arahira’a i teie maita’i, e nehenehe ’outou e mā’iti i te hō’ē fa’ahou maita’i ’āpī nō te rave.

’A ha’amana’o ē ’a fa’arahi ai tātou i teie mau maita’i rarahi i roto ia tātou iho, ’aita tātou e fa’ahanahana noa nei i te fa’aro’o o tō tātou tupuna ’e te mau tusia tā rātou i rave, e nehenehe ato’a rā tātou e riro ’ei fa’auru nō te maita’i o te feiā e hā’ati ra ia tātou.