Parau poro’i nā te Peresidenira’a Mātāmua, Tiurai 2016
Mau māite i te fa’aro’o o tō tātou hui tupuna
Nā te peresideni Thomas S. Monson
E 43 matahiti tō John Linford, i te taime ’a fa’aoti ai ’oia ’e tāna vahine ’o Maria ’e e tōru o tā rāua mau tamaiti, e fa’aru’e i tō rātou fare i Gravely, Peretāne, e rave rahi tauatini maile nō te tere e ’āmui atu i te mau feiā mo’a i roto i te ’āfa’a nō Roto Miti. ’Ua vaiiho rāua i te maha o tā rāua tamaiti, tē tāvini ra i te hō’ē misioni, ’ua ho’o i tā rātou faufa’a ’e ’ua rave i te pahi Thornton i Liverpool
’Ua fano nā ni’a i te moana ’e tae atu i te ’oire nō New York, ’e nā te fenua ’e tae atu i te ’oire nō Iowa, ’aita roa i fifi. ’Ua hāmata rā te mau fifi ’aita i maoro roa i muri noa mai i tō te ’utuāfare Linford ’e te tahi mau feiā mo’a i te mau mahana hope’a nei tei rātere mai nā ni’a i te Thornton, fa’aru’era’a i te ’oire nō Iowa, i te 15 nō tiurai 1856, nō te haere atu na roto i te pupu pere’o’o huti rima iti a James G. Willie.
Nō te ’ino o te reva ’e te tere fifi rahi, ’ua māuiui maita’i te mau ta’ata o te pupu, ’oia ato’a ’o John. Nō tōna ma’i rahi ’e te paruparu, ’ua nā-ni’a-roa-hia ’oia i te pere’o’o pūtō i te hutihia. I te taime ’a tae ai te pupu i Wyoming, ’ua ’ino roa ’ōna. I te 21 nō ’ātopa, ’ua tae mai te hō’ē pupu ta’ata fa’aora nā Roto Miti mai, tau hora noa i muri mai i te hopera’a te tere tahuti o John. ’Ua pohe ’oia i taua po’ipo’i ra i pīha’i iho i te ’ānāvai pape Sweetwater.
’Ua tātarahapa ānei o John i tōna tauira’a i te fāna’o ’e te ’ohie nō te mau ’arora’a, te mau ’erera’a ’e te mau fifi rahi nō te ’āfa’i i tōna ’utuāfare i Ziona ?
« ’Aita, e Maria », ’ua parau ’oia i tāna vahine nā mua a’e ’oia ’a pohe ai. « ’Ua ’oa’oa vau i tō tātou haerera’a mai. ’Eita vau e ora mai nō te tāpae i Roto Miti, ’o ’oe rā ’e te mau tamaroa, ’aita roa vau e tātarahapa noa a’e i te mau mea tā tātou i ora mai na, mai te peu e pa’ari te mau tamaroa ’e e fa’atupu ho’i i tō rātou ’utuāfare i Ziona ».1
’Ua fa’a’oti ’o Maria ’e tāna mau tamaiti i tō rātou tere. I te pohera’a ’o Maria fātata e 30 matahiti i muri mai, ’ua vaiiho mai ’oia ’e ’o John i te hō’ē faufa’a ’āi’a nō te fa’aro’o, nō te tāvini, nō te itoito ’e nō te tūsia.
Te rirora’a ’ei feiā mo’a nō te mau mahana hope’a nei ’o te rirora’a ïa ’ei pionie, te aura’a o te hō’ē pionie ’o te « hō’ē ïa ta’ata e haere nā mua nō te fa’aineine ’e ’aore rā nō te ’īriti i te ’ē’a nō vetahi ’ē ia ’ape’e atu ».2 ’E te rirora’a ’ei pionie ’o te ha’amātaura’a ïa i te tūsia. ’Ātīrā noa atu ’aita te mau melo o te ’Ēkālesia e ani-fa’ahou-hia ’ia fa’aru’e i tō rātou nohora’a nō te tere i Ziona, pinepine i te tītauhia ia rātou ’ia vaiiho i te mau peu tahito, te mau ravera’a tau maoro ’e te mau hoa herehia. Vetahi e rave nei i te fa’a’otira’a māuiui rahi e vaiiho i muri ’ia rātou i te mau melo o te ’utuāfare e pāto’i ra i tō rātou rirora’a ’ei melo o te ’Ēkālesia. Teie rā, e tāmau noa te feiā mo’a i te mau mahana hope’a nei i te nu’u i mua ma te pure ē, e hāro’aro’a mai ’e e fari’i mai rātou.
E ’ere te ’ē’a ’o te hō’ē pionie i te mea ’ōhie, tē pe’e nei rā tātou i te mau ta’ahira’a o te pionie hō’ē roa—’o te Fa’aora—tei nā mua mai ’ia tātou, tei fa’a’ite mai i te ’ē’a e pe’e.
« Mai pe’e mai »,3 te ani manihini nei ’Oia.
« ’O vau te ’ē’a, te parau mau, ’e te ora »,4 ’ua parau ’Oia.
« Mai pe’e mai »,5 tē pi’i mai nei ’Oia.
I te tahi taime, e mea teimaha ato’a rā te ’ē’a. E mea fifi roa nō vetahi ’ē ’ia fa’a’oroma’i i te fa’ao’ō’ora’a ’e te mau parau ma’au au ’ore a te feiā ’o tē tāhitohito nei i te vi’ivi’i ’ore, te ha’avare ’ore ’e te ha’a’pa’ora’a i te mau fa’auera’a a te Atua. I ha’afaufa’a ’ore noa na te ao i te ’apora’a i te mau parau tumu. I tō Noa arata’ira’ahia ’ia hāmani i te hō’ē pahi, ’ua hi’o te mau ta’ata ma’ama’a i te ra’i ata ’ore ’e i muri iho ’ua fa’ao’ō’o ’e ’ua ’ata—ē topa mai nei te ua.
I te fenua Marite e rave rahi tenetere i teie nei, ’ua fē’a’a te mau ta’ata, ’ua tama’i, ’e ’ua ha’apa’o ’ore ē ura mai nei te ’oire o Zarahemela i te auahi, ’ua tāpo’ihia te ’oire o Moroniha i te repo fenua, ’e ’ua horomi’ihia te ’oire o Moroni i te pape. ’Aita fa’ahou te ’atara’a, te fa’ao’ō’ora’a, te vi’ivi’i ’e te hara. ’Ua monohia te reira e te māmū rumaruma, te pōiri ta’ota’o. ’Ua hope te fa’a’oroma’ira’a o te Atua, ’ua fa’a’oti Tāna tārena.
’Ua vai noa te fa’aro’o o Maria Linford noa atu te mau rave-’ino-ra’a i Peretāne, te mau tāfifira’a o tōna tere i « te vāhi tā te Atua… i fa’a’ineine »,6 ’e te mau tāmatara’a tu’utu’u ’ore ’o tāna i fa’aruru nō tōna utuāfare ’e te ’Ēkālesia.
I te matahiti 1937, i te hō’ē ’oro’a mēnema ha’amana’ora’a ia Maria, ’ua ani o Elder George Albert Smith (1870–1951) i tōna huā’ai : « Hina’aro ’anei ’outou e mau māite i te fa’aro’o o tō ’outou tupuna ? … ’A tūtava i te fa’aea ti’amā noa nō te mau tusia ato’a tā [rātou] i rave nō ’outou ».7
’A ’imi ai tātou i te fa’ati’a ia Ziona i roto i tō tātou ’ā’au, i roto i tō tātou fare, i roto i tō tātou mau ’oire ’e i rotō i tō tātou mau fenua, ’ia ha’amana’o tātou i te itoito pāpū ’e te fa’aro’o ’aueue ’ore o te feiā tei hōro’a i te tā’āto’ara’a nō rātou, ’ia nehenehe ’ia tātou ’ia ’oa’oa i te mau ha’amaitaira’a o te Evanelia tei fa’aho’i-fa’ahou-hia mai, ’e tō te reira ti’aturi ’e te parau fafau, nā roto i te Tāra’ehara a Iesu Mesia.
© 2016 na Intellectual Reserve, Inc. Fatura’a paruruhia. Nene’ihia i te Mau Hau ’Āmui nō Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’Īritira’a nō First Presidency Message, July 2016. Tahitian. 12867 895
Ha’api’ira’a nō roto mai i teie parau poro’i
’A ’ōpua i te ani i te feiā tā ’ōutou e ha’api’i ra ’ia feruri i te mau ta’ata i roto i tō rātou orara’a ’o tei haere nā mua atu ia rātou ’e ’o tei riro ’ei pionie nō rātou. I muri iho ’a ani ’ia rātou i te hea taime rātou i te rirora’a ’ei pionie ’e ’ua fa’aineine rātou i te ’ē’a nō vetahi ē. ’A ani ia rātou ’ia feruri i te mau taime ’a fa’atusia ai rātou ’e nō te aha ’ua riro ’ei mea maita’i ’ia rave. I muri iho ’a ani manihini ’ia rātou ’ia pāpa’ipa’i i tō rātou itera’a pāpū nō « te pionie hō’ē roa », ’oia ho’i te Fa’aora.