Pweng ke Forfor Luti, Julahe 2016
Kuhiyacsr ke Ohiyacn Ninac ac Pahpah
Pruhe in lutlutkihn kuhfa inge ac suk in etuh ma in akacsruhi kac. In etwaclah ke “Sucu: Sie Mwe Fahkwack nuh fin Facluh” ac ahkyohkye fuhkah luhlahlfongi lom ke God ac ahkinsewowoye fuhkah mwet suc kom liyacacng ke forfor luti yohroh uh? Nuh ke kuhtuh pac ma in etuh, som nuh ke reliefsociety.lds.org.
Luhlahlfongi, Sucu, Kahsruh
“Sie ma yohk srihpac tuh nguhn luhn tuhlihk nuhtin God oasr ke elos isuslac ac sie pacl wowo in kapkapwack ke moul ma pahtpaht,” lutiyuck sel Elder Dallin H. Oaks ke U luhn Mwet Sap Singucul Luo. “Ke kahlwem ke sahflahiyacn ma yohk srihpac ke plwacn wolacna ke engan, nga luhlahlfongi lah sahflahiyacn mwe kahsruhp fin facluh ac inkuhsrao uh pa tuhlihk nahtuhsr ac mwet lasr uh.”1
Elder Neil L. Andersen ke U luhn Mwet Sap Singucul Luo el fahk:
“Kuht luhlahlfongi ke sucu, ac kuht luhlahlfongi ke tuhlihk. …
“‘… [God el] fahk [nuh sel Adam and Eve], Kowos in isus fahko in pus, tuh fwilin tulik nutuwos fah fahsrelihk nu fin faclu nufon ac leumi ma inge’ [Genesis 1:28]. …
“Masap se inge tiac kuh in muhlkihnyucklac kuh srisrilac nuh sahyac ke Alu luhn Jisus Kraist luhn Mwet Luhlahlfongi Lal ke Lwen-sahflah.”2
Tuh tiac kuht nohfohn tuhkuh ekihn pahpah kuh ninac se in moul lasr, kuht kuh in tuhfahlah tuhlihk ke oacna sie matwac. Kuht engankihn mwe insewowo in ip ke sucu lal Pahpah Inkuhsrao, ac kuht puhlakihn engan ac mwe srihke in sie ip ke sucu se fin facluh. Ac nuh sin mwet puhs, ninac ac pahpah tuhpanuhlos ke moul wacngihn sahflah kac ingo.
Tahfweyacn Ma Suhmuhslah
Sramsram Moul
“Puhsra puhkantwen fin facluh mihsenge ahksrihkyelah yohk srihpac ke in oasr tuhlihk nahtuh uh kuh ahkkahlwemye tulokihn kuh ahksrihkye pihsen tuhlihk ke sie sucu,” fwack sel Elder Andersen. “Tuhlihk muhtwacn nuhtihk uh furohkma nuh sihk ingena ke sie ma sihmlac sin sie ninac Kristin (te ke luhlahlfongi lasr uh) nahtuh tuhlihk limekohsr. El fahk: ‘[Kapkapwack] ke facsin se inge, upac na pwacye in eis sie nuhnak ke pwacpuhl ke ohiyacn ninac uh. … Tuhlihk uh kapkapwack ac ten liki college. Pwacye in oasr ten likina kena in forfor facluh uh. Ten liki kuhin tufoklac ke fong ke pacl mwesahs lom uh. Ten liki ahkwoyeyacn monum ke gym. Ten liki oacna sie orekma kom kuh in eis kuh finsrak in eis uh.’ Na el sifil fahk: ‘Ohiyacn ninac se el tiac mwe pwacr se, kunohkohn se. Kom tiac orwacni tuhlihk uh mweyen kom konwaclosyak tuh kahto likina ma sasuc uh. Tiac ma na in oruh se ke pacl mwesahs lom uh. Pa ma God El usot pacl uh nuh sum kac uh.’”3
© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/16. Ahkkweyeyucklac ke lweng: 6/16. Lwenglah luhn Visiting Teaching Message, July 2016. Kosraean. 12867 868
Nuhnkuh Ma Se Inge
Ke inkacnek fuhkah ma sucu lasr fin facluh el oacna sucu lasr inkuhsrao uh?