2016
Pwacye ke Luhlahlfongi luhn Pahpah Tuhmasr
July 2016

Pweng sin Prestuhnsi Se Met, Julahe 2016

Pwacye nuh ke Luhlahlfongi luhn Pahpah Tuhmasr

Sel Prestuhn Thomas S. Monson

Prestuhn Thomas S. Monson

John Linford el yac 43 ke pacl se el ac muhtwacn kiyacl, Maria, ac tolu sin tuhlihk mukul nahtuhlos orwaclah sulaclah in som liki lohm selos Gravely, England, in fuhfahsryucsr ke tausin mael in ohsun nuh sin Mwet Luhlahlfongi ke fahlfahl Great Salt Lake ah. Elos som sahyacn mukul ahkahkosr nahtuhlos, suc kuhlwacnsap ke misin, kuhkwackuhnlah ma lalos, ac fuhfahsryucsr ut Liverpool ac oacyak ke oak soko Thornton.

Fuhfahsryucsr fin kof nuh New York City, ac nuh Iowa, ahkkahlwemyeyuck tiac yohk srihpac. Mwe sensen uh muhtwacwacack, tuhsruhk, pacl fototo tohkoh Linfords ac kuhtuh Mwet Luhlahlfongi suc wi kalkal ke Thornton som liki acn Iowa City ke Julahe 15, 1856, pa sie ip tiac wo ke un handcart luhn James G. Willie ac.

Puhlan pacl upac ac fuhfahsryucsr sensen sang elyah yohk ke orekma laltahl, weluhlwacng John. Sahflahiyac sikyak tuh el arlacna mas ac muhnahs oruh el enenuh in utuck ke handcart ah. Ke pacl se u sac sun acn Wyoming, kuhiyacl kahlwem na pwacye lah muhnahslah. U in molwelah se fin acn Salt Lake ai ke Ohktohpa 21, ao na tukun fuhfahsryucsr in ikoac lal John sahflah ah. El misac ke lotutacng se ingacn apkuhran nuh Infacl Sweetwater ah.

Kuh John el puhla ahsor ke el sang moniyuck ac ahkfihsracsrye ke mwe srihke, ma enenuh, ac ma upac in us sucu lal nuh fin acn Saion?

“Moh, Maria,” el fahk nuh sin muhtwacn kiyacl met liki na el misac ah. “Nga engan lah kuht tuhkuh. Nga fah tiacna moul in sun acn Salt Lake, tuhsruhk kom ac tuhlihk mukul an ac sun, ac nga tiacna auli ke ma nuhkwewa kuht fahfahsruh kac fin tuhlihk mukul nahtuhsr uh kuh in kapkapwack ac tuhfahlah sucu lalos uh ke Saion.”1

Maria ac wen nahtuhl ah ahksahfyelah fuhfahsryucsr lalos. Ke Maria el misac pakuhran in yac 30 tohkoh, el ac John esamyucki ke sie mwe sang ke luhlahlfongi, ke kuhlwacnsap, ke moniyuck, ac ke kihsackuhnlah.

In ekihn sie Mwet Luhlahlfongi ke lwen-sahflah pa in sie payonir, tuh kalmacn payonir pa “sie suc som met in ahkolah kuh ikucslah inkacnek nuh sin mwet sahyah in ukwe.”2 Ac in ekihn sie payonir pa in akihlenyuck ke kihsackuhnlah uh. Finne mempucr ke Alu uh tiac sifil siyuckyuck in som liki lohm selos uh in oruh fuhfahsryucsr nuh Saion uh, elos kwacna enenuh in fihliyac ohiyac mahtuh, facsin ke pacl somlah, ac luhngse kawuck lalos. Kuhtuh oraclah sulaclah elyah in som liki mwet ke sucu lalos suc tiac insese nuh ke mempucrlac lalos ke Alu uh. Mwet Luhlahlfongi ke Lwen-sahflah uh fahsr na nuh met, tuhsruhk, pruhe tuh elos suc sacohk fah kahlwem kac ac insese.

Inkacnek luhn sie payonir tiac fihsrwacsr, tuhsruhk kuht ukwe falken niyac sahflah luhn Payonir—finne Mwet Lahngo—suc som met, ahkkahlwemye nuh sesr inkacnek in ukwe.

“Fahsru fahsr tukuk,”3 El suli.

“Nga pa inkanek,ac pwaye, ac moul,”4 El fahkwack.

“Tuku nu yuruk.”5 El pang.

Sie inkacnek kuh in srihkeyuck. Kuhtuh upackihn in kutong isrucnyuck ac sramsram in ahkkoluk luhn mwet lahlfon ma ahkkolukye moul nwacsnwacs, orekma suwohs, ac ahkostwen nuh ke masap luhn God uh. Facluh nuhnkuh muh wacngihn srihpac in ahkostwen nuh ke ip yohk uh. Ke suhpweyuck Noah in muhsahi soko oak ah, mwet lahlfon pucspucs liye nwacsnwacsiyacn kuhsrao na isrucn ac lwesrihk—ne ke na af ah tuhkuh.

Fin acn Macrike ke pacl loeloes somlah ah, mwet uh suhlahlahlfongi, tahfuh luo, ac seahkos nuh ke sie e fuhrreack Zarahemla, facluh afuhnlah Moronihah, ac kof uh raunwelah acn Moroni. Ahksruhksruhk, ahkkoluk, ahksrihkyactwen, ac koluk uh tuh wacngihnlac. Ma inge tuh ayaollac ke puhsra na mihslac, lohsrmahtoltol. Mongfihsrwacsr luhn God wacngihnlac, pacl Lal fohnlah.

Tiacna wacngihnlac luhlahlfongi lal Maria Linford finne ma upac fin acn England, upac ke fuhfahsryucsr lal nuh ke acn se suc God … El ahkolah,”6 ac sikyak ke mwe srihke el muhtwacnglah luhn sucu lal ac ke Alu uh.

Ke sie tuhkweni in ahkkahlwemye ke kuclyuck in mwe acsmakihn lal Maria ke 1937 ah, Elder George Albert Smith (1870–1951) el siyuck sin fihl nahtuhl: “Yac kowos fah moul pwacye nuh sin mwet luhlahlfongi mahtuh lowos? … Oruh insacnweacng in fal nuh ke kihsac nuhkwewa [elos] oraclah nuh suwos.”7

Ke kuht suk in muhsahi Saion ke insiyacsr, ke lohm sesr, ke mura lasr, ac ke acn sesr uh, lwelah kuht in esam ke insacnweacng puhlaik ac luhlahlfongi sahflah lalos suc sang kwewa kuhiyaclos kuht in muh kuh in engankihn mwe insewowo ke fohlohkyak luhn wosasuc uh, wi finsrak la ac wuhlwelah ke Iwaclah luhn Jisus Kraist.

© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/16. Ahkkweyeyucklac ke lweng: 6/16. Lwenglah luhn First Presidency Message, July 2016. Kosraean. 12867 868

Mwe kahsruh

  1. Liye Andrew D. Olsen, The Price We Paid (2006), 45–46, 136–37.

  2. The Compact Edition of the Oxford English Dictionary (1971), “pioneer.”

  3. Luke 18:22.

  4. John 14:6.

  5. John 7:37; oacyacpac liye 3 Nephi 9:22.

  6. Liye “Fahsruh Mwet Wo,” Hymns, no. 30.

  7. Liye Olsen, The Price We Paid, 203–4.

Luti ke Pweng Se Inge

Nuhnkuh in siyuck selos suc kom luti in nuhnkuh ke mwet in moul lalos suc wacngihnlac met ac oacna payonir nuh selos an. Na siyuck selos ke pacl elos ke ekihn payonir se ac ahkolah inkacnek luhn mwet sahyac uh. Solwaclos in nuhnkuh ke kihtin pacl ma elos enenuh in kihsackuhnlah ac efuh yohk srihpac. Na kom kuh in srihkaclos in suhmuhslah fahkwack luhlahlfongi lalos ke “kuhiyacn Payonir uh,” pa Mwet Lahngo.