iTabagone

Wasei ni Bula Marau Tawamudu

Dua na ka taleitaki me baleta na kosipeli oya na kilaka ni ituvatuva ni veivakabulai. Sa noda na madigi vakaitamera meda tiko tawamudu vata na noda matavuvale. Sa vukei keda na kilaka oya me tiko na inuinui ena gauna cavaga eda vakila kina na veivakadrukai ni vuravura. E vakatavulica o Peresitedi Eyring, “Sa kila tu na lomada na Tamada Vakalomalagi dauloloma. Sa Nona inaki me vakamarautaki keda (raica na 2 Nifai 2:25). Ka sa solia o Koya na isolisoli ni Luvena me rawati kina na reki ni ivau vakamatavuvale ka sa tomani me tawayalani. … E sa dua na isolisoli e dodonu me nona na luve ni Kalou yadua e basika mai ki vuravura.

Na veivakalougatataki oya sa noda oi keda na bula tiko ena gauna oqo kei ira na sa gole yani—ia ena noda veivuke duadua ga. Sa ra tiko na tubuda ena vuravura ni yalo ena gauna oqo, ka waraki keda voli meda vakarautaka na yacadra ki na cakacaka vakalotu ni valetabu me na vakayacori ena vukudra. Ia sa rawa ni dredre ena so na gauna me caka na cakacaka me baleti ira. Eda na rairai ogaoga, se da rairai tiko vakayawa mai na dua na valetabu meda lako vakavuqa kina.

Kalougata, ni tiko na sala tale e so meda vukei ira kina na tubuda, vakataka na qaravi ni cakacaka ni tuva kawa, tuva matanivola, se meimei voli vei rau na noda itubutubu ni rau gole ki na valetabu. Mai na veivukei, eda qarava na Turaga ka kauta mai na inuinui ni matavuvale tawamudu kivei ira ena tai kadua ni ilati.