Klumech er a Oldingel e Olisechakl August 2016

Omtebechel a Telungalek mel Dak

Bom ngara nglunguuch e msuubii tial klumech e mosiik el kmo ngera ke mo ouchais. Ng mekera klemedengei er kau er sel “Telungalek: Chais el mora Beluulechad” a bo le choisisii a klaumera er kau er a Dios e bo lomekngeltengat er tirkel moldingel er tir lokiu odingel me a osisechakl? A lmuut el bebil er a omesodel, e bo er a reliefsociety.lds.org.

Klaumerang, Telungalek, Ngeseu

A “robekel a kmal chedaol a ngerchelir el kirir el kaubeltik el reng e kaukerreu me a dirrek el mo er a rengelekir.”¹ “A blid a mo delmerab er a Dios er a beltik el reng ma omesiou,” ng melekoi a President Russell M. Nelson, President er a Cheldebechel er a re Teruich ma terung el Apostol.

“A Demad ra Babeluades a soal a re kaubuch a le bol kakuul e bo lomecheliu e longetmokl ra rengelekir el dikesir el mlara Rubak.”²

A ngara Babier ra Mormon, e a Jacobus a dilu el kmo a beltik el reng ra re chesmachel el mora re becherir, ma kuk beltik el reng er tirkel redil mora re becherir, ma beltik el reng er tir el mora rengelekir a mle tara uchul e a re Lamanites a mle tara taem e te liluut el mekedung er a re Nephites (mesa Jacobus 3:7).

Sel tara kot lungil rael el de siotai ra beltik el reng ma budech el mera re keblid a sel dungil mengedecheduch el mora re chedal a telungalek. A ungil lomelekoi a siotai ra Chedaol Reng. A sister Linda K. Burton, Relief Society general president, a ulengit er kemam me ki momtab er tial tekoi: “Kid ng blechoel el kse er kid el ‘melekoi a delmedemk el tekoi ra delongeled’?”³

Bebil er a Chedaol llechukl

Romans 12:10; Mosiah 4:15; Doctrine and Covenants 25:5

Meral Cheldecheduch

A Elder D. Todd Christofferson ra Cheldebechel er a re Teruich ma terung el Apostol a uluchais er a blekeradel ra le kekerei el lultebengii ra usbechel a beltik el reng ra telungalek. Sera le mekekerei ngii ma re rudam er ngii, e a derrir el rektel ra mekngit el rakt a ulebotk meng mlo meringel er ngii lousbech er a klisichel a imal. Tial telungalek eldi mle sechal a rengalk er ngii, eng mle mekedekudem e lolabek a bail, mesel lolabek a delal, eng blechoel lolenguul e mora rum el mo lmangel el merkmo el riid sel ringel.

Ma demal a Elder Christofferson ra bo lodengei, eng di mlak louchais el diak lou sueleb el ta el rak el lomatek a udoud me bol betok mel becherar a mesil el rullii a omelabek mel beot. Ngokiu tial beltkil a rengul el mora bechil, eng dillemii a okesiu sel domtebechel a telungalek el mora re ngelekel sechal. Ngulekiu er tial lungil lomeruul, e a Elder Christofferson a dilul kmo, “Ng dimlak kudengelii a le kiltmeklii a demak mesel teletael ra beltik el reng el mlo ra delak er sel taem, engdi elechal bla bo kudengei, e ak melchesuar el kmo, ‘Ngke kid a sechal.’”⁴

Ka Momdasu er Tiang

Ng mekerang a beltik el reng ma domekerreu ra re derta er kid a le siotai ra Reng el mera re keblid?