Klumech er a First Presidency August 2016
Sel Lurrungulel a Telungalek el mora Ullebongel lokiu a Beltik el Reng
Mla er a President Henry B. Eyring
Kot el Counselor er a First Presidency
Ma ikel rokui el sengk ra oubeltik el reng el Demad ra Babeluades el blal ngai el mesterir a rengelekel, e sel kot el ngarbab sel diak a ulebengelel klengar (mesa D&C 14:7). Seikid el sengk a sel de kiei lobengkel a Dios el Edam ma Betik er a Rengul Ngelekel el mo cherechar el telungalek. Ngdi ta el sel kot el rengedel a Dios, el celestial, e a ikel lulekdubech el beltik el reng ra telungalek a melemolm.
Kede rokui el di ourreng er sel deurreng el kiei ra elsel a oubeltik el reng el telungalek. A denguu er a re bebil er kid, eng reng el direkak kede chermii—el dodengei el kmong sebechel engdi ng direkak a ta el bo dolchesuar. Kede locha mla mesang er a elsel a klengar ra re bebil ra rechad. E a kuk bebil er kid, a beltik el reng a lmuut el mesisiich sel domelchesiu er ngii e kesiokel sel le kodall a choridid er a ngeleked, ng delad, demad, ngodam, ngochedad, malechub eng ngkel lou beltik el reng e betik er a rengud el delad el mechas malechub eng demad el rubak.
Kede rokui el mla melchesuar e melatk ma tara klebesei e bol sebeched el lmuut el mo melchesiu er sel mekekeald el reng el kirel ngkel chedal a telungalek el kmal betik a rengud er ngii e chelechang e kede semeriar e luetang el mo keseues.
A ou beltik el reng el Demad ra Babeluades a medengei a rengud. A moktek er Ngii a mo meskid a deurreng (mesa 2 Nephi 2:25). Maleuaisei e Ngii a uldersii a Ngelekel el mo dmedesii a rael ra deurreng el somesemii a telungalek me lolemolm el mo cherechar. Leng Osobel el lilechedii sel bombatel er a kodall, me kede mo mekiis er a kodall. Leng Ngii el mlad el kirel a kengtid, eng sebeched, lokiu a klaumerang er kid mesel douuchel a rengud er a kengtid, e kede soiiseb er sel kot el renged, el re telungalek a ulterkokl eldi dmak e lokiu a beltik el reng el mo cherechar.
A Osobel a uldureklii a Profet Elijah el mora Joseph Smith me luut el urrungel a ikel kiis er a priesthood (mesa D&C 110). Ngokiu a ikel kiis eng mlei sel klisichel omerenged, e loldars er a kot el klou el sengk er a Dios el mora rengelekel—ra diak a ullebengelel el klengar ra re telungalek e lultebechel el dmak el mo cherechar.
Ng sengk el bek el ngelekel a Dios el mei er a beluulechad a ngarngii a llemeltir el kirel. Te kesai er a tedobech ra rengelekel a uletngakl er sel sengk er Ngii er sel tara beluulechad. Ngesengesel a mui el klaumerang er tir e mle mesisiich el lomtok, e te millilt el diak el sorir el mo medengelii sel deurreng er sel sengk er a Demad ra Babeluades el kirel a re diak ullebengelel telungalek.
E kid el ngilsechekl er sel chetiteuokel el skeng er sel klengar ruchei ra de mei e mlo ngoriakl el nguu a sengk el likal bedenged, e a klou el techall el melilt er a diak a ullebengelel klengar a medechel el ketmekill er a delongeled. Alsekum me kede ngeltengat el metik er a mla moluut el ebangkelio, eng sebeched el kutmokl e urrekodel a telbiled lobengkel a Dios e likel mekrolid el mora diak a ullebengelel el klengar. Sel dou tekangel el ngarsel klaumerang, e a Chedaol Reng a molterkokl er a urrunguled e klou a rengud el kmo kede ngara rael el mora diak a ullebengelel klengar, el kiei ra telungalek el mo cherechar el ngarsel kot el renged.
A denguu er a re bebil, e tial diak a ulebengelel el deurreng a dikea lesang malechub eng dikea urrungulir el kirel. A roungalk, rengalk, rodam, ma rudos, a kelel blal le ketmokl a uldasu el ngii a sebechel mo melibas er tir el kirel a diak a ullebegnelel el klengar. Ke locha dirrek el melbedebek alsekum eng direkak ke mketmeklau lokiu sel Tngakireng er a Jesus Kristo.
A profet er a Dios a mle ta el lodersii el me er ngak a osisechakl el mileskak a budech. Ak mle bekikl el kmo a ikel bol tib a re bebil a kelel bol rellii mel meringel er a telungalek er kemam el dmak el mo cherechar. Ng dilul kmo, “Kau a bekikl el kirel a ngodech el tekoi. Ke di melemolm el klikiid el kirel sel kot el renged, e a ikel ngerchelel a telungalek a lmuut el meange er sel kuk momtab er ngii.”
Mor tirkel rokui el chad lulsiseb er a blekeradel malechub eng chebechilir ma rengelekir—malechub e te kuk diak le mechesang ra ta ra ikal tekoi—me blam seldii er a uldesuem ra omeletkem, e ak kudersii a sioning er ngak: a Demad ra Babeluades a medengei e betik a rengul er kau le ke ngelekel ra reng. Le sera omkiei lobengkel ma Ngelekel ruchei er tial klengar, e Te dillemii ra elsel a rengum sel lomeletkem el kirel a diak a ullebengelel el klengar. Ngoeak sel klisichel a Tngakireng er a Jesus Kristo el loureor e dmak ngii ma Chedaol Reng e lomtebechel, e kau a sebechem el melchesuar er elechang e mo melchesiu er sel beluulechad el merael mei er a beltik el reng ra telungalek el Demam ma Ngelekel a imis el sorir a bom nguu.
Ak sioning el kmo alsekum e ke kiei el klikiid el kirel sel kot el renged, esel luloachel el telbiil a kmo “a ngerechelel a telungalek a lmuut el meange er sel kuk momtab er ngii” a sebechel lekor kau.
© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei er a oidel: 6/16. Oidel a First Presidency Message, August 2016. Palauan. 12868 881
Osischeklel Tia el Klumech
Molatk el mo omuchel el louchais er tirkel molsisechakl er tir er a taem el kau a mlo ungil a rengum el kirel omeletkem el kirel a diak a ullebengelel el telungalek. Mongedaol er tir me lolbedebek a ikel taem er a lolchesuar ra deurreng el kirel a diak el bol ngemed el telungalek. Moker er tir alsekum eng ngarngii a sorir el louchais. Ng sebechem el siotai er tir el mdasu a teletael el moungil e kiei el klikiid el kirel sel kot el renged mesel luloachel el telbiil el “ngerchelel a telungalek … e lemuut el meang er sel kuk momtab er ngii” a sebechir el mo nguu.