Kairake

Kawakinan Tuua ao Tangiraia Tabeman

Ngkana ti iangoa te tangira, n tabetai te moan bwai are ti iangoia bon tamnein te tangira, te kanree, taian uee. Ma te tangira—ni koaua te tangira—e nano riki ao kabatiaakin riki iangoakiia tabeman nakon anne. Iesu Kristo e maiu ibukira ao e mate ibukira ibukin Ana tangira Ibukira. Ni koauana, tuua aika uoua aika a korakora bon tangiran te Atua ao tangiraia aomata ni kabane (taraa Mataio 22:36–40). Ma ti na kanga ni kaotia nakoia tabeman bwa ti tangiriia?

Beretitenti Uchtdorf e tibwa ana taetae ni kaikonaki Kristo ibukiia naati aika uoman, temanna are e mwakuri ibukin tamana ao temanna ae e aki. E kamatata te Tia Kamaiu bwa bon tii te nati are e ongotaeka nakon tamana ae e bon tangiria ni koaua. N aekan aei, ngkana ti ongotaeka nakon ana tua te Atua, ti kaotia bwa ti tangiria ao ti kan oki Nakoina.

Ma ti na kanga ni kaotia ae ti tangiriia aomata nako? Beretitenti Uchtdorf e kabwarabwara naba anne: “Ngkana ti tangiriia raora ni koaua, ti anga ngaira bwa ti na buokiia ‘rarikin ao kainnano, aoraki ao aika rawawata.’ Bwa naake a karaoi mwakuri n akoi ao n ibuobuoki, bon ngaiia naba ana reirei Iesu Kristo.”

Bwa n taai aika a na roko ngkana ko nooria am karo, tarim ao mwanem, ke raraom, iangoia bwa ko na buokiia ao ko na kaota am tangira nakoia. E aki tii kakukureia ao ngkoe, ma e kakukureia naba Tamara are i Karawa.