Rongorongo man te Moan Beretitentii, Tebetembwa 2016
Tera ae Roko, Imwiin te Tangira?
Iroun Beretitenti Dieter F. Uchtdorf
Te Kauoman ni Kauntira n te Moan Beretitentii
Ara Burabeti ae tangiraki, Beretitenti Thomas S. Monson, e reirei bwa “te tangira bon aan te euangkerio ae moan te kakaawaki.”1
Te tangira e bon rang kakaawaki are e aranna Iesu bwa “te moantua aei ae korakora” ao n taku bwa e bane te tua ao aia taeka burabeti ni katan iaona.2
Te tangira bon te iango ae boboto ni bwaai ni kabane ake ti karaoi n te Ekaretia. Ni katoa burokuraem, katoa bootaki, katoa mwakuri ake ti riki iai bwa ana reirei Iesu Kristo a riai n nako man te anua aei—n akean te tangira, “ana tangira Kristo ae itiaki,” bon akea uaara.3
N te tai are ti ota n aei n ara iango ao inanora, n te tai are ti kaota iai ara tangira ibukin te Atua ao ibukiia raora—tera imwiina?
E tau namakinan te tangira ke e tau ara tangira nakoia tabeman? Tao kaotan ara tangira ibukin te Atua ao katokan kainnanoia tabeman e kakoroi bukin tabera nakon te Atua?
Te Taetae ni Kaikonaki ibukiia Nati Mwane aika Uoman
N te tembora i Ierutarem, mataniwiia ibonga ao unimwane n Iutaia a nakon Iesu bwa a na kamwanea n Ana taeka. Te Tia Kamaiu, e karanga te taibora nakoia man ana karaki are e karakinna.
“Temanna te aomata ae uoman natina mwaane,” E waaki. Te karo e nakon te karimoa ao e tuangnga bwa e na nako ni mwakuri n ana nne ni kureebe. Ma e rawa te nati. Imwiina te nati arei e “rairananona, ao e nako.”
Te karo e a manga nakon te karimwi ao n tuangnga naba bwa e na nako ni mwakuri n ana nne ni kureebe. Te nati te karimwi e taku nakoina bwa e na nako, ma e bon aki nako.
Ngkanne te Tia Kamaiu e rairaki nakoia ibonga ao unimwane man titiraki, “Antai mai irouia nati aikai ae karaoa nanon tamana?”
A taekinna bwa te karimoa— e taku temana bwa e aki nako ao imwiina e rairananona ao e nako ni mwakuri n te nneni kureebe.4
Te Tia Kamaiu e kabongana te karaki aei ni kabwarabwara te reirei ae kakaawaki—bon naake a ongeaba nakon tuua a bon tangira te Atua.
Tao aio bukina ngkai e tuangiia aomata bwa a na kakauongo ao n irii aia taeka Baretaio ao taan koroboki ma a na aki irii aia banna ni katooto.5 Taan reirei n aro aikai a aki karaoa te bwai are a taekinna. A tatangiria bwa a na taekina te aro, ma te kananokawaki bwa aki ira nanona.
Mwakuri ao Kamaiuakira
N teuana ana kabanea n reirei te Tia Kamaiu nakoia Ana reirei, E taetae nakoia iaon te kabanea ni motikitaeka. Naake a buakaka a na kamaenakoaki mai irouia naake a raoiroi. Naake a raoiroi a na karekea te maiu ae akea tokina, naake a buakaka a na anganaki te katuaeaki ae akea tokina.
Tera te kaokoro imarenan kurubu aika uoua?
Naake a kaota aia tangira rinanon te mwakuri a na kamaiuaki. Naake aki, a na kamaunaaki.6 Te rairaki ni koaua nakon ana euangkerio Iesu Krito ao tamaroana ao reirei a na kaotaki man ara mwakuri ni maiura ni katoabong.
N tokina, ti kaotan ara tangira ibukin te Atua ao raora e na bon aki tau ibukin te karietataaki. Bwa, ngke e reirei Iesu “tiaki ni kabane ake a kangai nakoiu, Te Uea te Uea, a na rin n aban uean karawa; ma teuare e karaoa nanon Tamau are i karawa.”7
Tera ae e na Roko imwiin te Tangira?
Te kaeka nakon te titiraki “Tera imwiin te tangira? e kona ni beebete ao n ineti. Ngkana ti tangira te Tia Kamaiu ni koaua, ti na kananorinanoi nanora nakoina ao imwiina ti na nakonako ni kawaia ana reirei. Ngkana ti tangira te Atua, ti na kataia ni kawakin Ana tua.8
Ngkana ti tangiriia raora ni koaua, ti reitiira ni buokiia “rarikin ao kainnano, aoraki ao aika rawawata.”9 Bwa naake a karaoa te mwakuri n aki iangoiia i bon irouia n tangira ao n ibuobuoki,10 ti te arona ma aroia ana reirei Iesu Kristo.
Aio te bwai ae roko imwiin te tangira.
Aio bon aan ana euangkerio ae moan te kakaawaki Iesu Kristo.
2016 iroun Interllectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/16. Kariaiakaki rairana: 6/16. Rairan te First Presidency Message, September 2016. Kiribati. 12869 859
Reirei man te Rongorongo Aei
Beretitenti Uchtdorf e kabwarabwara aroia ana reirei Iesu Kristo ni koaua n aroia naake a kaota aia tangira ibukina ao ibukiia tabeman man aia mwakuri. E reireiniira bwa “ngkana ti tangira te Tia Kamaiu ni koaua, ti na kananorinanoi nanora nako Ina ao n nakonako ni kawaia ana reirei.” Iangoia n titirakiniia naake ko reireiniia bwa a kanga ni kaungaaki n te tangira n nakonako ni kawaia ana reirei. Ko kona n tibwa am namakin naba ma ngaiia. Ko na bae n iangoia ni kaoia bwa a na tataro ibukin riki te tangira ao te korakora ni mwakuriia te tangira.