Rongorongo n Reirei ni Kakawari, Tebetembwa 2016
TeNakoa ni karo bon te Nakoa ae Tabu
Tataromwaaka ni kamatebwaia te bwai n reirei aei ao ukoukoria ni kan ataia bwa tera ae ko na tibwauaia. E kanga ataakin “Te Utu: Te Katanoata nakon te Aonaaba” ni karikirakea am onimaki iroun te Atua ao ni kakabwaiaiia naake ko tararuaiia rinanon te reirei ni kakawari? Ibukin rongorongona riki tabeua, nakon reliefsociety.lds.org.
Onimaki, Utu, Buoka
Tamara are i Karawa e katei taian utu bwa a na ibuobuoki n reirei tua aika eti n te tabo ae tatangira. Beretitenti Thomas S. Monson e taku: “Anganiia natim taeka ni kakatia ao te inga; ni kangai, ‘I tangiriko’ riki; kakaota am kakaitau n tainako. Tai kataia ni iangoia bwa e kakaawaki riki katokan te kaangaanga nakon tangiran te aomata.”1
Susan W. Tanner, Te beretitenti ni kabuta irouia Kairake n Ataeinnaine, e reirei: “Tamara are i Karawa e anga te baeten are ti riai n iria. E tangiriira, e reireiniira, e tataonannano iroura, ao e anganiira inaomatara. … N tabetai te boaaki, are e nanonaki ‘n reirei,’ e kairuruaki ma te kabuakaka. Ataei—n aroia aomata n roroia nako—a katamaroa anuaia man te tangira ao te kaunganano nakon riki te tiribure.”2
“Ngkana ti kakaonimaki ni karaoa te tataro n utu, kamatebwai ni koroboki aika a tabu, kainutu n te tairiki, kakabwaia n te nakoanibonga, ao ni kawakina te Tabati,” e taku Unimwaane Quentin L. Cook man te Kooram n Abotoro are Tengaun ma Uoman, “natira a na … tauraoi riki n te mweenga ae akea tokina i karawa, n aki tarai kabwakaia n te aonaaba ae kaangaanga.”3
Rakan riki Booki aika Tabu
1 Nibwaai 8:37; 3 Nibwaai 22:13; Doctrine ao Covenants 93:40; 121:41
Karakinaia Aomata n Taai Aikai
“I wareware n te nutibeebwa ngke temanna tibu te mwane e tamwarakeai.” E taku Unimwane Robert D. Hales man te Kooram n Abotoro n te Tengaun ma Uoman. “Ngke I wareware, I kukurei n ongo bwanaana ae karewe mai buki. Iangoa kubanakou ngke, tabeua te miniti imwiina, e karinrakea imarenau ma te beebwa. E taua ubu ni baina ao bwairina iaon bwairiu, n titirakinai ‘Kuraenibwa! Ko mena ikanne?’
“… Menam ikekei nanona ko ota n nanoia am roronrikirake ao ko reitaki ma ngaiia. Ao n reitaki ma ngaiia nanona tiaki ti te maroro ma ngaiia ma ni karaoi naba bwaai ma ngaiia. …
“Ti riai ni babaire ao ni kabonganai bwaai aika a tamaroa n tai n angareirei. …
“… Mwaitin riki maiu, mwaitin riki ataakin taai n reirei inanon kairakeu, riki ake a reke mai irouia au karo, ake a tia ni kanakoraoa maiu ao ni karikai bwa antai Ngai.”4
© 2016 iroun Interllectual Reserve, Inc. A bane n tauaki mwiin taian kariaia ibukin katootongana. Boretiaki i USA. Kariaiakaki n te Ingiriti: 6/16. Kariaiakaki rairana: 6/16. Rairan te Visiting Teaching Message, September 2016. Kiribati. 12869 859
Iangoa Aio
Bukin tera te euangkerio e tamaroa reiakinana n te taetae ao ana banna ni katoto te tangira?