Lamharon

Pagtuman sang mga Kasuguan kag Paghigugma sa Iban

Kon magpamensar kita sang gugma, sa masami ang una naton madumduman amo ang romantiko nga mga sine, tsokolate, kag mga bulak. Apang ang gugma—matuodtuod nga gugma—mas madalom pa kag mas di-maiyaiyahon sangsa sina. Si Jesucristo nagkabuhi para sa aton kag namatay para sa aton bangud sang Iya gugma para sa aton. Sa pagkamatuod, ang duha ka dalagko nga sugo amo ang higugmaon ang Dios kag higugmaon ang tanan nga katawhan (tan-awa sa Mateo 22:36–40 Apang paano bala naton sarang mapakita sa iban nga ginahigugma naton sila?

Si Pangulong Uchtdorf nagapaambit sang paanggid sang duha ka anak, isa nga nagapangabudlay para sa iya amay kag isa nga wala. Ang Manluluwas nagapakita sang punto nga ang anak lamang nga nagatuman sa iya amay ang matuodtuod nga nagahigugma sa iya. Sa amo man, kon kita nagatuman sang mga kasuguan sang Dios, ginapakita naton nga ginahigugma naton Sia kag luyag naton nga makabalik sa Iya.

Apang paano naton mapakita nga ginahigugma naton ang tanan nga iban pa? Ginpahayag man ina ni Pangulong Uchtdorf: “Kon matuodtuod naton nga ginahigugma ang aton mga isigkatawo, ginatanyag naton ang aton mga kaugalingon sa pagbulig sa ‘mga pigado kag nagakinahanglan, sa may balatian kag may kapipit-an.’ Kay sila nga nagahimo sining mga buhat kag nagaalagad nga di-maiyaiyahon, sila amo ang mga sumulunod ni Jesucristo.”

Gani sa madason nga makita ninyo ang inyo ginikanan, utod,ukon abyan, hunahunaa ang pag-alagad sa ila agud inyo mapakita ang inyo pagpalangga sa ila. Indi lamang ini magapahalipay sa inyo kag sa ila, kundi ini magapahalipay man sa inyo Amay sa Langit.