Mensahe sang Unang Panguluhan, Septyembre 2016

Pagkatapos sang Gugma, Ano Dayon?

Ni Pangulong Dieter F. Uchtdorf

Ikaduhang Manuglaygay sa Unang Panguluhan

Ang aton pinalangga nga propeta, si Pangulong Thomas S. Monson, nagtudlo nga “ang gugma amo ang pinakaimportante nga elemento sang ebanghelyo.”¹

Ang gugma importante kaayo nga gintawag ini ni Jesus nga “ang pinakauna kag dako nga sugo” kag nagsiling nga ang tagsa ka magamay nga parte sang layi kag mga pulong sang mga propeta nasandig sa sini.²

Ang gugma amo ang sentro nga motibo sa tanan naton nga ginahimo sa Simbahan. Ang tagsa ka programa, tagsa ka miting, tagsa ka aksyon nga kabahin kita bilang mga sumulunod ni Jesuscristo magahalin sining maayong kinaiya—kay kon wala sing gugma sa isigkatawo“ang putli nga gugma ni Cristo” wala gid kita sing bili.³

Pagkatapos nga aton ini mahangpan sa aton panghunahuna kag tagipusuon, pagkatapos nga aton mapabutyag ang aton gugma sa Dios kag sa aton isigkatawo—ano dayon?

Ang balatyagon sang kaluoy kag gugma para sa iban nga tawo husto na bala? Ang pagpabutyag sang aton gugma sa Dios kag sa aton kaingod nagatuman bala sang aton obligasyon sa Dios?

Ang Paanggid sang Duha ka Anak

Sa templo sang Jerusalem, ang mga pinuno sang mga pari kag ang mga tigulang sang mga Judio nagpalapit kay Jesus agud buniton Sia sa Iya mga pulong. Ang Manluluwas, sa pihak nga bahin,nagbaliskad sang sitwasyon paagi sa pag-istorya sa ila sang isa ka sugilanon.

“May isa ka tawo nga may anak nga duha ka lalaki,” panugod Niya. Ang amay nagpalapit sa nahauna nga anak kag ginpangabay nga magpangabudlay sa iya ulubasan. Apang ang anak nagbalibad. Sang ulihi, ang anak “naghinulsol, kag nagkadto.”

Dayon ang amay nagpalapit sa ikaduha nga anak kag ginpangabay nga magpangabudlay sa iya ulubasan. Ang ikaduha nga anak nagpasalig sa iya nga makadto, apang wala gid magkadto.

Nian ang Manluluwas nagbalikid sa mga pari kag mga tigulang kag nagpamangkot, “Sin-o bala sa ila nga duha ang naghimo sang kabubut-on sang iya amay?”

Napilitan sila nga akuon nga amo atong nahauna nga anak—ang isa nga nagsiling nga indi magkadto apang sang ulihi naghinulsol kag nagkadto sa pagpangabudlay sa ulubasan.⁴

Ang Manluluwas naggamit sini nga sugilanon sa pagdagmit sang isa ka importante nga prinsipyo—sila nga nagatuman sang mga kasuguan ang matuodtuod nga nagahigugma sa Dios.

Ayhan amo ini ang rason kon ngaa ginpangabay ni Jesus ang katawhan nga magpamati kag sundon ang mga pulong sang nga Fariseo kag mga escriba apang indi magsunod sa ila ehemplo.⁵ Ining relihiyoso nga mga manunudlo wala nagapangabuhi sang ila mga ginapanghambal. Maluyagon sila maghambal parte sa relihiyon, apang sa masubo wala nila makuha ang kahulugan sini.

Mga Binuhatan kag ang Aton Kaluwasan

Sa isa sa pinakaulihi nga mga leksyon sang Manluluwas para sa Iya mga sumulunod, Sia naghambal sa ila parte sa katapusan nga Paghukom. Ang mga malaut kag mga matarong pagapainon. Ang mga matarong magaagom sang kabuhi nga wala’y katapusan; ang mga malaut magaantos sang wala’y katapusan nga silot.

Ano ang kinalin sa tunga sang duha ka grupo?

Sila nga nagpakita sang ila gugma paagi sa buhat naluwas. Sila nga wala, ginpakamalaut.⁶ Ang matuodtuod nga pagkahaylo sa ebanghelyo ni Jesucristo kag sa iya sini mga panindugan kag mga prinsipyo masaksihan sa aton mga buhat sa adlaw-adlaw naton nga pagpangabuhi.

Sa katapusan, ang pagpabutyag lamang sang gugma sa Dios kag isigkatawo indi makadala sa aton sa pangkahitaasan. Kay, si Jesus nagtudlo, “indi tanan nga nagasiling sa akon, Ginuo, Ginuo, makasulod sa ginharian sang langit; kundi sia nga nagahimo sang kabubut-on sang akon Amay nga yara sa langit.”⁷

Ano ang Masunod pagkatapos sang Gugma?

Ang sabat sa pamangkot “Pagkatapos sang gugma, ano dayon?” mahimo nga simple kag diretso. Kon matuodtuod naton nga ginahigugma ang Manluluwas, ginapatuon naton ang aton tagipusuon sa Iya kag dayon nagalakat kita sa dalan sang pagkasumulunod. Kon ginahigugma naton ang Dios, magatinguha kita nga tumanon ang Iya mga kasuguan.⁸

Kon kita matuodtuod nga nagahigugma sa aton mga isigkatawo, kita nagatanyag sang aton mga kaugalingon sa pagbulig “sa pigado kag nagakinahanglan, sa may balatian kag may kapipit-an.”⁹ Kay sila nga nagahimo sining maalwan nga mga buhat sang kaluoy kag pag-alagad,¹⁰ sila amo ang mga sumulunod ni Jesucristo.

Amo ini ang nagasunod pagkatapos sang gugma.

Amo ini ang kahulugan sang ebanghelyo ni Jesucristo.

© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, September 2016. Hiligaynon. 12869 861

Pagtudlo gikan sa Sining Mensahe

Si Pangulong Uchtdorf nagalaragway sang matuodtuod nga mga sumulunod ni Jesucristo bilang sila nga nagapakita sang ila gugma para sa Iya kag sa iban paagi sa ila mga buhat. Sia nagatudlo sa aton nga “kon kita matuodtuod nga nagahiguma sa Manluluwas, ginatuon naton ang aton mga tagipusuon sa Iya kag dayon kita nagalakat sa dalan sang pagkasumulunod.” Binagbinaga ang magpamangkot sa ila nga inyo ginatudloan kon sa ano nga paagi ang gugma nagganyat sa ila sa paglakat sa dalan sang pagkadisipulo. Mahimo man kamo magpaambit sang inyo mga eksperiyensya. Mahimo man ninyo sila agdahon nga magpangamuyo sang dugang pa nga gugma sa isigkatawo kag kusog sa paggiho tungod sa paghigugma.