Mensahe sa Visiting Teaching, Septyembre 2016
Ang Pagkaginikanan Isa ka Sagrado nga Katungdanan
Tun-i sing mainampuon ining materyal kag magpangamuyo agud mahibaloan kon ano ang ipaambit. Paano ang paghangop sang “Ang Pamilya: Isa ka Proklamasyon sa Kalibutan” makapadugang sang inyo pagtuo sa Dios kag magabugay sa ila nga inyo ginabantayan paagi sa visiting teaching? Para sa dugang nga impormasyon, maglog-on sa reliefsociety.lds.org.
Pagtuo, Pamilya, Bulig
Ang aton Amay nga Langitnon nagpasad sang mga panimalay agud buligan kita sa pagtudlo sang husto nga mga prinsipyo sa isa ka mahigugmaon nga kapalibutan. Si Pangulong Thomas S. Monson nagsiling: “Dayawa kag haksa ang inyo anak; magsiling, ‘Palangga ‘ta ka’ sing mas masunson; pirme ipahayag ang inyo pagpasalamat. Indi gid pagtugoti ang isa ka problema nga pagalubaron nga mangin mas importante sangsa tawo nga pagapalanggaon.”1
Si Susan W. Tanner, anay pangkabilugan nga pangulo sang Young Women, nagtudlo: “Ang aton Amay sa Langit maathag nga nagpakita sang sulundan nga aton dapat nga sundon. Palangga Niya kita, ginatudloan Niya kita, pasensyoso sa aton, kag nagatugyan sa aton sang aton kahilwayan sa pagpili. … Kon kaisa ang pagdisiplina, nga nagakahulugan nga ‘magtudlo,’ nagakasal-an nga kritisismo. Ang mga kabataan—subong man mga katawhan sa tanan nga kaidaran—mas naganami ang pamatasan tungod sa gugma kag pagpaisog labaw sangsa pagpangita-sing-sala.”2
“Kon matutom kita nga nagahiwat sang pagpangamuyo upod sa pamilya , pagtuon sang balaan nga kasulatan, family home evening, mga pagpakamaayo sang priesthood, kag pag-obserbar sang Adlaw nga Balaan,” siling ni Elder Quentin L. Cook sang Napulo’g Duha ka mga Apostoles, “ang aton mga kabataan mangin …handa para sa isa ka puluy-an nga wala’y katapusan sa langit, wala’y sapayan sang kon ano man ang magkalatabo sa ila sa isa ka mabudlay nga kalibutan.”3
Dugang nga Balaan nga mga Kasulatan
1 Nefi 8:37; 3 Nefi 22:13; Doctrine and Covenants 93:40; 121:41
Istorya Gikan sa Matuod-tuod nga Kabuhi
“Nagabasa ako sang peryodiko sang isa sang akon mga apo nga lalaki ang nagpasabak sa akon,” siling ni Elder Robert D. Hales sang Napulo’g Duha ka mga Apostoles. “Samtang nagabasa ako nanamian ako magpamati sang iya maugdang nga tingug nga nagahuluhambal sa palibot. Hunahunaa ang akon kakibot sang pagkadugaydugay nagdas-ok sia sa tunga nakon kag sang peryodiko. Gin-uyatan sang iya mga kamot ang akon guya kag gin-nunu ang iya ilong sa akon ilong, kag namangkot, ‘Lolo! Ara ka bala dira?’
“…Ang pagkayara dira nagakahulugan sang paghangop sa mga tagipusuon sang aton mga lamharon kag makig-angot sa ila. Kag ang pagpakig-angot sa ila indi lamang paagi sa pagpakigsugilanon sa ila kundi paghimo man sang mga butang nga ginahimo nila. …
“Kinahanglan naton nga magplano kag panginpuslan ang mga tion sa pagtudlo. …
“…Samtang nagadugay ako nga nagakabuhi, mas labi ko nga nahangpan nga ang mga tion sa pagtudlo sang ako lamharon pa, ilabi na yadtong ginhatag sang akon mga ginikanan, nagporma sang akon kabuhi kag naghimo sa akon kon ano ako karon.”4
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, September 2016. Hiligaynon. 12869 861
Binagbinaga Ini
Ngaa ang ebanghelyo ginatudlo sing pinakamaayo paagi sa lengguahe kag halimbawa sang gugma?