Mwet Fuhsr

Liyacacng Masap uh ac Luhngse Mwet Sahyac uh

Ke pacl kuht nuhnkuh ke luhngse, kwacna ma se emet ma ac tuhkuh nuh ke nuhnak lasr uh pa petsac romacntik, johklet, ac ros. Tuhsruhk luhngse—luhngse pwacye—el loal liki ac yohk srihpac likina ma ingacn. Jisus Kraist El moul kacsr ac misac kacsr mweyen El luhngse kuht. Ma na pwacye, masap yohk luo uh pa in luhngse God ac luhngse mwet nuh kwewa sahyac (liye Matthew 22:36–40). Tuhsruhk kuht ac ahkkahlwemye fuhkah nuh sin mwet sahyac lah kuht luhngse elos?

Prestuhn Uchtdorf el akacsruhi puhpuhlyuck luhn Kraist ke wen luo ah, sie suc orekma luhn pahpah tuhmwacl ac el suc tiacna. Mwet Lahngo El oruh sie akucl lah wen se na ma ahkos pahpah tuhmwacl pa luhngse na pwacye el uh. Oacpacna, ke kuht ahkos masap luhn God, kuht ahkkahlwemye lah kuht luhngse El ac kena fohlohk nuh Yohrohl.

Tuhsruhk kuht ahkkahlwemye fuhkah lah kuht luhngse mwet nuh kwewa sahyac uh? Prestuhn Uchtdorf el ahkuhtweyac pac lah: “Fin kuht luhngse na pwacye mwet wiyacsr, kuht eiskuhtyang in kahsruh ‘mwet suhkahsruhp ac enenuh, mwet mas ac mwet kweok.’ Nuh selos suc oruh mukwikwi in pahkomuhta ac kuhlwacnsap inge, mwet ingacn pacna pa mwet tuhma lutlut luhn Jisus Kraist.”

Oruh pacl se tok kom liye ninac pahpah tomom, sucu lom, kuh kawuck se, nuhnkuh in kuhlwacnsuhpwaclos in ahkkahlwemye luhngse lom nuh selos. Ac fah tiac oruh eltahl ac kom in engan muhkwena, tuh ac fah oruh Pahpah tomowos Inkuhsrao in engan pac.