Ngeasek

Oltirakl a Llach e Oubeltikelreng el mo er a Rebebil

Sel domdasu er a beltikelreng, e ng blechoel el sel kot el me soiseb ra uldesued a movie ra beltikelreng, chocolate, ma re ua bung. E ng di a beltikelreng—meral beltikelreng—a lmuut el dmolech e ngarbab er a ikang. A Jesus Kristo a mle chad el kired e mlad el kired ele Ngii el betik a rengul er kid. E merang, e le ikel erung el ngarbab el llach a kmo ng kired el loubeltikelreng el mora Dios me a rokui el chad (mesa Mateus 22:36–40). E ng di kid kede mekerang e chochotiira rebebil el kmo ng betik a rengud er tir?

A President Uchtdorf a chouchais er a cheldechedechal a Kristo er a reteru el odam, a tang a oureor el mora demal ea tang a dimlak. A Osobel a chochotii el mei er kid el kmo ngkel ngalek el mle olngesenges er a demal a meral betik a rengul er ngii. Tia di osisiu, sel dolngesenges a llechul a Dios, e ke de ochotii el kmo ng betik a rengud er Ngii meng soad el lemuut el mo er Ngii.

E ng di ng kuk mekerang a dochotii a beltkil a rengud el mora re bek el chad? A President Uchtdorf a mileketeklii tiang el dirrek: “Al sekum meng meral betik a rengum ra rebebil, e ke de odersid el mo olngeseu ‘ra chebuul ma olngesonges, smecher ma ngara ringel.’ E le tirkel chemoit a temir el kirel a klechubechub ma omesiou, tirka ikid ea chedal a Jesus Kristo.”

Me sel omluut el mesa delam, demam, ta er kau, adang sechelim, e momdasu el mo mesiou er tir el mo chochotii a beltkil a rengum el mo er tir. Tia diak el dil rellemiu el mo ungil a rengmiu, ngbai rullii a Demam er a Babeluades meng moungil a rengul el dirrek.