Klumech er a First Presidency, Ongetiu el Buil 2016
A uriul er a Beltikelreng, E ng kuk Ngerang?
Mla er a President Dieter F. Uchtdorf
Ongerung el Counselor er a First Presidency
A betik er a rengud el profet er kid, el President Thomas S. Monson, a mla olsisechakl el kmo a “beltikelreng a rengul a ebangkelio.”1
A beltikelreng a kot el klou a ultutelel ma Jesus a millekoi er ngii “el kot e ngarbab el llach” e dilu el kmo a ikel rokui el telengtengil a llach ma tekingir a re profet a di mo ultuil er ngii.2
A beltikelreng a uchul e kede meruul aikal doruul er a chelsel a Ikelesia. A bek el prokuram, ma bek el miting, ma bek el omeruul el kid a ulsiseb er ngii le kid loltirakl er a Jesus Kristo a kirel mengai er tial blekeradel—e le sel diak a dmolech el beltikerreng, “el ngii a bliochel el beltikelreng er a Kristo,” e ng diak de ngerang.3
Me sel lesiseb tiang er a uldesued ma rengud, me sel tal dochotii a beltkil a rengud el mora Dios ma re bebil er kid—e ke de kuk mo mekerang?
A omelchesiu er a klechubechub ma beltikereng el mora rebebil ngungiang? A olechotel a beltkil a rengud el mora Dios ma ngar bita er kid ng domedemii sel ngercheled el mora Dios?
Cheldechedechal a re Terung el Ngalek el Sechal
Ngar a templo er a Jerusalem, ea rengarbab el priest ma remeklou el chad er a Jews a mlo duum er a Jesus el mo melibas er ngii e ra tekoi el bo lolekoi. E ng di, a Osobel, a mileltii tial omeruul el bedul tir er a bocha louchais ra cheldecheduch.
“Ng mla er ngii a imol chad el mle terung a rengelekel el sechal,” Ng ulemuchel el melekoi. Ng ka el chedam a mlo ra kot el ngelekel e ulengit er ngii me lebo loureor ra sers. E ng di ngikal ngelekel a mle kotouar. A uriul e ngkal ngelekel el sechal a “mlo ouuchel ra rengul, meng mlong.”
Ng kal chedam a kuk mlo er ngikal ongerung el ngelekel el sechal e ulengit er ngii me bo loureor er a sers. Ng kal ongerung el sechal a kmal dilu er ngii el kmo ngmong, e ng di ngmlo diak lebong.
Seikid ea Osobel a mileltii el bedul tirkal priest ma remeklou el chad e uleker, “Ng techa er tirka el terung el ngelekel sechal a rirelii sel mle soal a demerir?”
Te mocha kirir el kongei el kmo ngkel kot el ngalek—ngkel dilu ng diak lebong e ng di ng mlo ouuchel a rengul meng mirrael el mocha oureor ra sers.4
A Osobel a uleba tial cheldecheduch el mlo omeketakl er a tara klou a belkul el suobel—el tiang a kmo tirkel olengesenges a llach a meral betik a rengrir ra Dios.
Al tang e tia ea uchul ea Jesus a ulengit ra rechad me bo lorrenges e loltirakl a tekingir a re Pharisi ma re meluches a llach e ng di mo diak loltirakl aikel loruul.5 Tirka el chad ra klechelid lolisechakl a dimlak loltirakl a tekoi el lulsisechakl. Ng mle sorir el mesaod a klechelid, e ng di ng mekngit a rengud le te mla choitii sel ngii a meral belkul.
Omeruul me a Osobeled
A tara ikel ulebongel losisecheklel a Osobel el mora rulbengkel, e ng mlo melekoi er tir el kirel sel mong me ngulebongel el Kerekeriil. A remedengerengel ma remelemalt a mo obii. Tirkel lungil a mo nguu a diak a ulebengelel klengar; a re medengerengel a mo mengai el morsel diak a ulebengelel el kelebus.
Ngera sel mle klekakerous er a ika lerung el chelechad?
Tirkel mle ochotii a beltkil a rengrir lokiu a omerellir a silobel. Tirkel dimlak a mildebeakl.6 A meral beltel a reng el mora ebangkelio er a Jesus Kristo me a klou el ultutelel ma osisecheklel a mo moues lokiu a omerelled er a bek el sils ra klengar er kid.
M sel mocha ulebongel, ea cholechotel a bltkil a rengud lokiu a ngor el mora Dios ma rebebil rekid a diak bol beskid a diak a ulebengelel klengar. E, le a Jesus a ulsisechakl, “ng diak el bek el chad el kmu er ngak el kmo, Rubak, Rubak, a mo soiseb er a rengedel a babeluades; ng bai ngkel ngii a meruul er a soal a Demak el ngii a ngara babeluades.”7
Ngera Mei ruriul er a Beltikelreng?
Ma nger el mora ker “A uriul er a beltikelreng, e ng kuk ngerang?” a sebechel beot e bleketakl. Al sekum e ng meral betik a rengud ra Osobel, e kede ngmai a rengud el bedul Ngii e okor e mo merael er sel rolir a meral loltirakl. Sel le betik a rengud ra Dios, e ng meral blak a rengud el loltirakl a llechul.8
Al sekum meng meral betik a regud er a rebebil er kid, e kede meral mo olngeseu ra “chebuul, olngesonges, smecher ma ngara ringel.”9 Tirkel chemoit a temir lolngeseu lokiu a klechubechub ma omesiou,10 tirka ikid a chedal a Jesus Kristo.
Tiaikid ea mei ruriul er a beltikelreng.
Tiaikid a rengul a ebangkelio er a Jesus Kristo.
© 2016 by Intellectual Reserve, Inc. All rights reserved. Milluches er a USA. Kengei er a English: 6/16. Kengei er a oidel: 6/16. Oidel a First Presidency Message, September 2016. Palauan. 12869 881
Osischeklel Tia el Klumech
A President Uchtdorf a olecholt ra belkul a meral chedal a Jesus Kristo el ngii tirkel lolecholt a beltkil a rengrir el mo er Ngii me a rebebil ra rechad lokiu a omerellir. Ng olsisechakl er kid el kmo “sel sekum me kede meral betik a rengud er a Osobel, e kede ngmai a rengud el bedul Ngii e okor e mo merael er sel rolir a roltirakl.” Momdasu a mo oker er tirkal molisechakl er tir a ikel teletael el beltikelreng a mla odbecheterir el mo merael er sel rolir a roltirakl. Ng dirrek el sebechem louchais aikel mla dubech el mei er kau el teletael. Ng sebechem lolengit er tir el mo meluluuch me bol mui er a dmolech el beltikelreng el mesisiich el meruul a tekoi lultuil ra beltikelreng.