Feiā ’āpī

Te ha’apa’ora’a i te mau fa’auera’a ’e te herera’a ia vetahi ’ē.

’Ia feruri ana’e tātou i te here, te mau ’ohipa mātāmua e tupu mai i roto i te ferurira’a maori rā, te mau hōho’a teata nō te here, te totora, ’e te mau tiare. ’Āre’a rā te here—te here mau—e mea hau atu ïa i te hōhonu ’e e mea hau atu i te ’orera’a e ’imi i tō ’oe iho maita’i i te reira. ’Ua ora o Iesu Mesia nō tātou ’e ’ua pohe nō tātou nō Tōna here ia tātou. Tera ïa na e piti ture rahi roa a’e, te here i te Atua ’e te here i te mau ta’ata ato’a. (hi’o Mataio 22:36-40) Nāhea rā tātou i te fa’a’ite ia vetahi ’ē, te here nei tātou ia rātou ?

’Ua hōro’a te peresideni Uchtdorf i te parabole o na tamari’i tamāroa to’opiti, te tahi o tei rave i te ’ohipa nō tōna metua tāne ’e te tahi, ’aita ïa. ’Ua ha’apāpū te Fa’aora ē, o te tamaiti ana’e o tei ha’apa’o i te fa’aue a tōna metua tāne o ’oia tei here iāna. Hō’ē ā huru, ’ia ha’apa’o ana’e tātou i te mau ture a te Atua, te fa’a’ite ra ïa tātou ē, te here nei tātou Iāna ’e te hina’aro nei tātou e ho’i atu i piha’i iho Iāna.

Nāhea rā tātou i te fa’a’ite e te here nei tātou i te mau ta’ata ato’a ? ’Ua fa’ata’a ato’a mai o peresideni Utchtdorf i te reira : « Mai te mea e here mau tātou i tō tātou ta’ata tupu, e hōro’a tātou i te tauturu ‘i te ta’ata veve ’e tei ’ere ho’i, te feiā ma’i ’e tei ro’ohia i te ’ati.’ O rātou o te rave nei i teie mau ’ohipa ma te ’imi ’ore i tō rātou iho maita’i na roto i te aroha mau ’e te tāvini, o rātou ïa te mau pipi a Iesu Mesia ».

Maori ra i te taime i mua nei, ’ia ’ite ’outou i tō ’outou mau metua, te hō’ē taea’e ’e ’aore rā te hō’ē hoa, a ha’amana’o i te tāvini ia rātou nō te fa’a’ite i tō ’outou aroha ia rātou. E ’ere o rātou ’e o ’outou ana’e te ’oa’oa, e ’oa’oa ato’a rā tō ’outou Metua i te Ao ra.