Parau poro’i na te mau tuahine hahaere, Setepa 2016
E mea mo’a te ti’ara’a metua
’A tuatāpapa nā roto i te pure i teie māteria ma te ’imi ’ia ’ite e aha te fa’a’ite atu. nāhea te ta’a-maita’i-ra’a i « Te ’Utuāfare : E poro’i i tō te Ao nei », i te ha’amara’a i tō ’outou fa’aro’o i te Atua ma te ha’amaita’i i te feiā tā ’outou e ha’apa’o ra nā roto i te hāhaerera’a a te mau tuahine ? Nō te mau ha’amāramaramara’a hau atu, ’a haere i ni’a i te reliefsociety.lds.org.
Te Fa’aro’o, Te ’Utuāfare, Te Tōtauturu
’Ua fa’ati’a tō tātou Metua Here i te Ao ra i te mau ’utuāfare nō te tauturu ia tātou ’ia ha’api’i i te mau parau tumu tano i roto i te hō’ē aura’a here. ’Ua parau te peresideni Thomas S. Monson ē : « A hōro‘a i te hō’ē ha’apōpoura’a ’e a tauahi i tā ’outou mau tamari’i : A parau atu ‘’ua here au ia oe’, a fa’a’ite tāmau noa i tō ’outou māuruuru. ’Eiaha e vaiiho i te hō’ē fifi ’ia fa’a’āfarohia ’ia riro ’ei mea faufa’a a‘e i te hō’ē ta’ata ’ia herehia ».1
’Ua ha’api’i Susan W. Tanner, peresideni rahi nō te Feiā ’Āpī Tamāhine o tei ha’amāuruuruhia ē : « ’Ua hāro’a tō tātou Metua i te Ao ra i te hōho’a o te ti’a ia tātou ’ia pe’e. ’Ua here ’Oia ia tātou, ’ua ha’api’i ia tātou, ’ua fa’aoroma’i ia tātou, ’e ’ua hōro’a ia tātou i te ti’amāra’a… I te tahi taime te ha’avīra’a, ’oia ho’i, ‘’ia ha’api’i’ e hapehia ïa e te fa’a’inora’a. Te mau tamari’i—mai te mau ta’ata o te mau matahiti ato’a—e ha’amaita’i rātou i tō rātou huru na roto i te here ’e te ha’apoupou ’eiaha rā na roto i te ’imira’a i tō rātou mau hapehape ».2
’Ua parau o Elder Quentin L. Cook nō te pupu nō te Tino ’Ahuru ma-Piti ’āpōsetolo ē : « Mai te peu e rave tātou i te pure ’utuāfare, te tuatāpapara’a pāpaʻira’a moʻa, te purera’a pō ’utuāfare, te mau ha’amaita‘ira’a autahu‘ara’a ’e te ha’apa‘ora’a i te mahana sābati… e riro tā tātou mau tamari’i… i te fa’aineinehia nō te hō’ē fare mure ’ore i te ra‘i, noa atu ā te ’ohipa e tupu i ni‘a ia rātou i roto i teie ao fifi ».3
Te tahi atu mau pāpa‘ira’a mo’a
1 Nephi 8:37; 3 Nephi 22:13; Te Parau Ha’api’ira’a ’e te mau Parau Fafau 93:40; 121:41
’Ā’amu mau
’Ua parau o Elder Robert D. Hales, nō te Pupu nō te Tino ’Ahuru ma Piti ’āpōsetolo ē : « Te tai’o noa ra vau i te ve’a i haere mai ai hō’ē o tā’u mau mo’otua na’ina’i e pūpuni i roto iā’u ». ’A tai’o noa ai au, ’ua ’oa’oa vau i te fa’aro’ora’a i tōna reo navenave i te paraparaura’a na muri. A feruri na i tō’u māere, tau taime ri’i i muri mai ’ua tomo mai ’oia i roto iā’u ’e te ve’a. ’Ua rave mai i tō’u hōho’a mata i roto i tōna rima, ’e tōna ihu tāpiri i tō’u, ui mai ra, ‘e pāpā ’ū ! Tei ’ō nei ’oe ?’ …
« Te aura’a o te parau ē, tei ’ō nei, o te hāro’aro’ara’a ïa i te ’ā’au o tō tātou feiā ’āpī ’e i te tū’atira’a e ō rātou. ’E te aura’a nō te tū’atira’a e ō rātou, e ’ere i te ’āparau-noa-ra’a ia rātou, o te ravera’a i te tahi ’ohipa e ō rātou […]
« E mea ti’a ia tātou ’ia fa’anaho ’e ’ia ha’afaufa’a i te mau taime ha’api’ira’a […]
« Roa noa atu tō’u ora, rahi noa atu ato’a tō’u ite ē, te mau taime ha’api’ira’a i tō’u ’āpīra’a, te mau taime ihoa ra i hōro’ahia mai e tō’u na metua, ’ua tarai te reira i tō’u orara’a ’e ’ua fa’a’ite o vai ra vau ».4
© 2016 nā Intellectual Reserve, Inc. Fatura’a pāruruhia. Nene’ihia i te Mau Hau ’Āmui nō Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’Īritira’a nō Visiting Teaching Message, September 2016. Tahitian. 12869 895
A feruri i teie
Nō te aha te ’evanelia i ha’api’i maita’i-a’e-hia na roto i te parau ’e te hi’ora’a maita’i o te here ?