Parau poro’i a te Peresidenira’a Mātāmua, Setepa 2016
I muri mai i te here, e aha ïa ?
Nā te peresideni Dieter F. Uchtdorf
Tauturu piti i roto i te Peresidenira’a Mātāmua
’Ua ha’api’i tō tātou peropheta here, peresideni Thomas S. Monson ē, « ’o te here te mana’o tumu o te ’evanelia. »1
Nō te faufa’a rahi o te here, ’ua pi’i Iesu i te reira « te ture mātāmua teie ’e te hau i te rahi » e ’ua parau ē, te tā’āto’ara’a o te tahi mau tuha’a o te ture ’e te mau parau a te mau peropheta, ’ua ha’amauhia ïa i ni’a iho.2
Tei rotopū te here i te mau ’ohipa ato’a tā tātou e rave nei i roto i te ’Ēkālesia. Te fa’anahonahora’a tāta’itahi, te apo’ora’a tāta’itahi, te ’ohipa tāta’itahi tō roto tātou ’ei mau pipi na Iesu Mesia, e nehenehe e matara mai na roto mai i teie taipe—inaha ho’i, ’ia ’ore te aroha, ’oia ho’i—« te hina’aro mau o te Atua », faufa’a ’ore tātou.3
’Ia ’ite pāpū ana’e tātou i te reira na roto i tō tātou ferurira’a ’e tō tātou ’ā’au, ’a fa’aite ai tātou i tō tātou here i te Atua ’e i tō tātou ta’ata tupu—e aha ïa ?
’Ua nava’i ānei ’ia fa’a’ite i te aroha ’e i te here ia vetahi ’ē. ’Ia fa’a’ite tātou i tō tātou here i te Atua ’e ’ia vetahi ’ē, ’ua hope ānei tā tātou hōpoi’a i te Atua ?
Te parabole o na tamari’i tamāroa to’opiti.
I roto i te hiero i Ierusalema, ha’afātata mai ra te mau tahu’a rarahi ’e te mau feiā pa’ari o te mau Ati Iuda ia Iesu nō te ha’amārei Iāna i roto i Tāna mau parau. Tera rā, ’ua huri te Fa’aora i te mau ti’ara’a ma te fa’a’ite atu ia rātou i te hō’ē ’ā’amu.
Ha’amata ihora ’Oia : « I te hō’ē ta’ata to’opiti āna pu’e tamari’i tamāroa ». Haere atu ra te metua tāne i te matahiapo, ani atu ra ’ia haere e rave i te ’ohipa i roto i te ’ō vine ra. Pāto’i atu ra te tamaiti. I muri a’era, « tātarahapa ihora te tamaiti e haere atu ra ’oia ».
’Ua haere atu ra te metua tāne i te paraura’a atu i te teina ’ia na reira ato’a i te rave i te ’ohipa i roto i te ’ō vine ra. Ha’apāpū atu ra te tamāroa teina e haere ’oia, e ’aita rā i haere.
Fāriu atu ra te Fa’aora i te mau tahu’a ’e i te mau feiā pa’ari ma te ani, « o vai na tamaiti to’opiti i ha’apa’o i te hina’aro o tō rāua metua ra ? »
’Ua ti’a ia rātou ’ia fa’ari’i ē, o te matahiapo ïa—tei parau ē, ’āita ’oia e haere e rave i te ohipa ’e i muri iho, tātarahapa iho ra e haere atu ra e rave i te ohipa i roto i te ’ō vine ra.4
’Ua fa’a’ohipa te Fa’aora i teie ’ā’amu nō te ha’apūai i te hō’ē parau tumu faufa’a—o rātou tei ha’apa’o i te mau fa’auera’a o tei here pāpū i te Atua.
Pene’i a’e nō reira Iesu i ani ai i te mau ta’ata ’ia fa’aro’o ’e ’ia pe’e i te mau parau a te mau Pharisea ’e a te mau pāpa’i parau ma te ’ore ’e pe’e i tō rātou hi’ora’a.5 ’Aita te reira mau ’orometua nō te ha’apa’ora’a ’e ora nei i tā rātou mau a’ora’a. E mea au na rātou ’ia ’āparau nō ni’a i te ha’apa’ora’a, ’āre’a rā te ’ere nei rātou i toōna mana’o tumu.
Te mau ohipa ’e tō tātou fa’aorara’a
I roto i te hō’ē o te mau ha’api’ira’a hope’a a te Fa’aora, ’ua parau atu ’Oia ia rātou nō ni’a i te ha’avara’a hope’a. E fa’ata’ahia te feiā parau ’ino i te feiā parau ti’a. E fāri’i te feiā parau ti’a i te ora mure ’ore, e haere atu te feiā parau ’ino i te fa’autu’ara’a mure ’ore.
E aha te ta’a-’ē-ra’a i rotopū i teie na pupu e piti ?
Te feiā tei fa’a’ite i tō rātou here na roto i tā rātou mau ohipa, e fa’aorahia. Te feiā tei ’ore i na reira, ’ua fa’ahapa-’ē-hia ïa.6 E ’itehia te fa’afāriura’a mau i te ’evanelia a Iesu Mesia ’e i tāna mau parau faufa’a ’e mau parau tumu na roto i tā tātou mau ’ohipa i roto i tō tātou orara’a o te mau mahana tāta’itahi.
I te hope’a, ’aita te fa’a’ite-noa-ra’a i te here nō te Atua ’e i te ta’ata tupu e ha’ama’iti ia tātou nō te ora mure ’ore. ’Ua ha’api’i mai Iesu, « e ’ore te feiā e parau mai iā’u ra ē, e te Fatu, e te Fatu, e hope pā’āto’a i te tae i te bāsileia ra o te ao, o te ta’ata rā i ha’apa’o i te hina’aro o tā’u Metua i te ao ra » 7.
E aha tō muri iho i te here ?
E nehenehe te pāhonora’a i te uira’a : « I muri mai i te here, e aha ïa ? » e riro ’ei mea ’ōhie ’e te ’āfaro. Mai te mea ’ua here mau tātou i te Fa’aora, e hōro’a pā’āto’a ïa tātou i tō tātou māfatu Iāna ’a haere atu ai na ni’a i te ’ē’a nō te ti’ara’a pipi. ’Ia here tātou i te Atua, e tūtava tātou i te ha’apa’ora’a i Tāna mau fa’auera’a.8
Mai te mea e here mau tātou i tō tātou ta’ata tupu, e fa’atae ato’a ïa tātou i te tauturu « i te ta’ata veve e tei ’ere ho’i, te feiā ma’i ’e tei ro’ohia i te ’ati ».9 O rātou o te rave nei i teie mau ’ohipa ma te ’imi ’ore i tō rātou iho maita’i na roto i te aroha mau ’e te tāvini,10 o rātou ia te mau pipi a Iesu Mesia.
Te reira ïa te haere mai i muri iho i te here.
O te reira te mana’o tumu mau o te ’evanelia a Iesu Mesia.
© 2016 na Intellectual Reserve, Inc. Fatura’a pāruruhia. Nene’ihia i te fenua Marite. Parau fa’ati’a nō te reo peretāne : 6/16. Parau fa’ati’a nō te ’īritira’a : 6/16. ’īritira’a nō First Presidency Message, September 2016. Tahitian. 12869 895
Ha’api’ira’a nō roto mai i teie parau poro’i
’Ua tātara mai te peresideni Uchtdorf i te aura’a o te mau pipi mau a Iesu Mesia, o rātou ïa o te fa’a’ite i tō rātou here Iāna ’e ia vetahi ’ē na roto i tā rātou mau ’ohipa. ’Ua ha’api’i mai ’oia ia tātou ē, « mai te mea ’ua here mau tātou i te Fa’aora, e hāro’a pā’āto’a ïa tātou i tō tātou māfatu Iāna ’a haere atu ai na ni’a i te ’ē’a nō te ti’ara’a pipi ». A ha’amana’o ’ia ani atu i te ta’ata o tā ’outou e ha’api’i ra, e mea nāhea te here i fa’aitoito ia rātou ’ia haere na ni’a i te ’ē’a nō te ti’ara’a pipi. E nehenehe ’outou e fa’a’ite atu ia rātou i te tahi mau ’ohipa o tā ’outou i ora. A feruri ato’a ’ia ani ia rātou ’ia pure ia rahi atu te aroha ’e te pūai nō te ’ohipa ma te here.