iTukutuku ni Mataveiliutaki Taumada, Sepiteba 2016
Oti na Loloma, Qai Cava?
Mai vei Peresitedi Dieter F. Uchtdorf
Karua ni Daunivakasala ena Mataveiliutaki Taumada
Sa vakavuvulitaka na noda parofita lomani, o Peresitedi Thomas S. Monson, “na loloma sai koya na uto ni kosipeli.”1
Sa rui bibi sara na loloma ka vakatoka kina o Jisu “na imatai ni ivunau oqo ka levu” ka kaya ni sa vu ni vunau taucoko kei ira na parofita na ivunau e rua oqo.2
Na loloma sa itakele ni inaki ni veika kece eda cakava ena Lotu. E dodonu me vu mai na ivakarau ni bula oqo na parokaramu, soqoni, na cakacaka kece sara eda vakaitavi kina ni da tisaipeli i Jisu Karisito—ni sega na loloma cecere, “na loloma savasava i Karisito,” eda sa sega sara ni dua na ka.3
Ni da sa ciqoma oqo ena noda vakasama kei na yaloda, ni da sa vakaraitaka na noda loloma ena vukuna na Kalou kei ira na kainoda—sa qai cava?
Sa rauta beka ga na noda vakila na loloma ena vukudra na tani? Eda sa vakayacora beka na noda itavi vua na Kalou ena noda vakaraitaka na noda loloma ena vukuna na Kalou kei ira na wekada?
Na Vosa Vakatautauvata ni Luvena Tagane e Rua
Ena valetabu mai Jerusalemi, era lako yani vei Jisu na bete levu kei na italatala qase me ra vakacalai Koya ena Nona vosa. A vukica na teveli na iVakabula ena nona talanoataka vei ira e dua na italanoa.
“E dua na tamata sa rua na luvena tagane,” a tekivuna ko Koya. A lako na tamadrau vei koya na imatai ka kerei koya me laki cakacaka ena were ni vaini. A sega ni vinakata na luvena. E muri sa “veivutuni, ka lako.” na luvena ko ya.
Sa qai lako na tamadrau vua na ikarua ni luvena ka kerei koya me laki cakacaka ena were ni vaini. A vakadeitaka vua na ikarua ni luvena ni na lako, ia a sega sara ni lako.
Sa qai vuki na iVakabula vei ira na bete kei ira na qase ka taroga, “O cei vei rau na luvena a vakayacora na lomai tamana?”
Era qai vakadonuya ni o koya na imatai ni luvena—o koya a kaya taumada ni na sega ni lako ia a qai veivutuni e muri ka laki cakacaka ena were ni vaini.4
A vakayagataka na iVakabula na italanoa oqo me vakadreta kina e dua na ivakavuvuli bibi—sai ira era talairawarawa ki na ivunau era lomana vakaidina na Kalou.
Rairai qo beka na vuna a kerei ira kina na tamata o Jisu me ra vakarorogo ka muria na nodra vosa na Farisi kei na vunivola ia me ra kakua ni muria na nodra ivakaraitaki.5 O ira na vakavuvuli vakalotu oqo era sega ni dau cakava na ka era tukuna. Era taleitaka me ra dau veivosakitaka na lotu, ia e ka ni rarawa ni ra dau calata na utona.
Cakacaka kei na Noda Vakabulai
Ena dua na iotioti ni nona lesoni na iVakabula vei iratou Nona tisaipeli, a vosa vei iratou me baleta na iotioti ni Veilewai. Era na veitawasei na daucakaca kei na ivalavala dodonu. Era na rawata na bula tawamudu na cakavinaka; ka ra kau yani ki na veitotogitaki tawamudu na cakaca.
Na cava na kedrau duidui na ilawalawa e rua?
Era vakabulai o ira era vakaraitaka na nodra loloma ena nodra cakacaka. O ira e sega era na vakacacani.6 Na saumaki dina ki na kosipeli i Jisu Karisito kei na yavunilewa kei na kena ivakavuvuli ena vakadinadinataki ena noda cakacaka e veisiga ni noda bula.
Ena kena itinitini, ni da na sega ni vakadonui ki na bula vakacerecerei ena noda tukuna wale tikoga na noda loloma ena vukuna na Kalou kei ira na kainoda. Me kena ivakaraitaki, ena Maciu, a tukuna o Jisu, “Ena sega ni curu ki na matanitu vakalomalagi o ira kecega sa kaya vei au, Turaga, Turaga; ko koya ga sa cakava na lomai Tamaqu sa tiko mai lomalagi.”7
Na Cava e Tarava Mai na Loloma?
Na isau ni taro “Oti na loloma, qai cava?” e rawa ni rawarawa ka vakadodonu. Kevaka eda lomana dina na iVakabula, eda na vagolea na yaloda Vua ka da qai lakova na salatu ni bula vakatisaipeli. Ni da lomana na Kalou, eda na segata me da rokova tiko na nona ivunau.8
Kevaka eda lomana dina na kainoda, eda na soli keda me da vukei ira na “dravudravua kei na luveniyali, na tauvimate kei ira sa vakaleqai tu.”9 O ira era dau vakayacora na cakacaka sega ni nanumi koya oqo ni yalololoma kei na veiqaravi,10 o ira oqo na tisaipeli i Jisu Karisito.
Oqo na ka ena yaco mai ni sa oti na loloma.
Na ivakavuvuli ni loloma e sa usutu ni kosipeli i Jisu Karisito.
© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/16. Vakadonui me vakadewa: 6/16. Vakadewa ni First Presidency Message, September 2016. Fijian. 12869 858
Veivakavulici mai na iTukutuku Oqo
E vakamacalataka o Peresitedi Uchtdorf na tisaipeli dina i Jisu Karisito sai ira era vakaraitaka na nodra lomani Koya kei ira na tani ena nodra cakacaka. E vakavuvulitaka vei keda o Koya “kevaka eda lomana dina na iVakabula, eda na vagoleya na yaloda Vua, ka da qai lakova na salatu ni bula vakatisaipeli.” Vakasamataka mo tarogi ira o vakavulica na sala cava sa vakauqeti ira kina na loloma me ra lakova na sala ni bula vakatisaipeli. E rawa talega ni o wasea vei ira na veika o sa sotava. E rawa talega ni o vakasamataka mo sureti ira me ra masuta me levu cake na loloma cecere kei na igu me ra cakacaka ena dela ni loloma.