iVaqa ni Veisiko, Sepiteba 2016
E Dua na iTavi Tabu na Bula Vakaitubutubu
Vulica ena masumasu na itukutuku oqo ka vakasaqara na veivakauqeti mo kila na ka me wasei. Ena rawa ni vakalevutaka vakacava na nomu vakabauta na Kalou na kena kilai vakamatata “Na Matavuvale: Ai Vakaro ki Vuravura Raraba” ka vakalougatataki ira o dau qarava ena gauna ni veisiko? Me ikuri ni itukutuku, lako ki na reliefsociety.lds.org.
A tauyavutaka na Tamada Vakalomalagi na matavuvale me vukea noda vakavuvulitaka na ivakavuvuli dodonu ena dua na draki ni loloma. E kaya o Peresitedi Thomas S. Monson: “Vakacaucautaka na luvemu ka mokota; ka kaya, ‘Au lomani iko vakalevu cake’; dau vakaraitaka tikoga nomu vakavinavinaka. Kakua ni laiva me bibi cake na leqa me wali mai na tamata me lomani.”1
E vakavuvulitaka vaqo o Susan W. Tanner, e dua na peresitedi raraba ni Goneyalewa: “E vakaraitaka na Tamada Vakalomalagi na ivakarau e dodonu me da muria. E lomani keda o Koya, vakavulici keda, dau waraki keda, ka vakabauti keda ena noda galala ni digidigi. … Ena so na gauna na veivakadodonutaki, ka kena ibalebale ‘na veivakavulici,’ e dau tauricala me veivakacacani. O ira na gonelalai—vakakina na tamata ena itabayabaki kecega—e dau vinaka cake nodra itovo ena vuku ni loloma kei na veivakayaloqaqataki mai na dusi ni nodra cala.”2
“Kevaka eda dau masumasu ena yalodina, vuli ivolanikalou, lotu vakamatavuvale, veivakalougatataki vakabete, ka vakarokorokotaka na Siga ni Vakacecegu,” e kaya o Elder Quentin L. Cook ena Kuoramu ni iApositolo Le Tinikarua, “era sa na vakarautaki tu … na noda gonelalai me baleta e dua na vuvale tawamudu mai lomalagi, veitalia na ka era na sotava ena dua na vuravura dredre.”3
iKuri ni iVolanikalou
1 Nifai 8:37; 3 Nifai 22:13; Vunau kei na Veiyalayalati 93:40; 121:41
Veitalanoa Bula
Au a wilika tiko na niusipepa ena nona kabiti au yani e dua na makubuqu tagane,” e kaya o Elder Robert D. Hales ena Kuoramu ni iApositolo Le Tinikarua. “Niu wiliwili tiko, au marau ena rorogo ni domona mai muri. Vakasamataka noqu kidacala, ni oti e dua na gauna lekaleka, a usumaki koya cake mai ena keirau maliwa kei na pepa. Taura na baluqu ruarua e ligana ka reguca na ucuqu e ucuna, qai taroga, ‘Tutu! O tiko i loma qori?’
“… Mo tiko e kea e kena ibalebale mo kila na yalodra na noda itabagone ka veikilai yalo kei ira. Kei na veikilai yalo e sega ni kena ibalebale ga na veivosaki kei ira ia me da cakacaka vata talega kei ira. …
“E dodonu me da tuvalaka ka vakayagataka vinaka na veigauna ni veivakavulici. …
“… Na balavu ga ni noqu bula, na levu ni noqu vakadinadinataka ni veigauna ni veivakavulici ena noqu gauna vakaitabagone, vakauasivi mai vei rau noqu itubutubu, e sa tara cake na noqu bula au tu kina nikua.”4
© 2016 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/16. Vakadonui me vakadewa: 6/16. Vakadewa ni Visiting Teaching Message, September 2016. Fijian. 12869 858
Vakasamataka Oqo
Cava na vuna e dau vakavulici vakavinaka duadua kina na kosipeli mai na vosa kei na ivakaraitaki ni loloma?