Visiting Tijing Mesej, Septemba 2015
Wok Blong Papa mo Mama I Wan Tabu Wok
Stadi long toktok ia wetem prea mo luklukgud blong kasem insperesen blong save wanem blong serem. ?Olsem wanem nao taem yu andastanem wanem i stap insaed long “Famle Ofisol Toktok i Go long Wol” i leftemap fet blong yu long God mo blesem olgeta we yu stap lukaotem olgeta tru long visiting tijing? Blong kasem moa infomesen, go long reliefsociety.lds.org.
Papa blong yumi long Heven i putum ol famli blong helpem yumi tijim stret prinsipol long ples we i gat lav. Presiden Tomas S. Monson i talem se: “Talem wan naesfala toktok blong leftemap tingting blong pikinini blong yu mo putum han raon long hem; mo talem se ‘Mi lavem yu;’ oltaem talemaot ol tangkyu blong yu. Neva letem se blong stretem wan problem i kam moa impoten bitim blong lavem wan man.”1
Susan W. Tana, we i bin jeneral presiden blong Ol Yang Woman, i talem se: “Papa blong yumi long Heven i bin givim wan eksampol we yumi mas folem. Hem i lavem yumi, tijim yumi, Hem i gat fasin ia blong wet longtaem wetem yumi mo Hem i givim long yumi fridom blong joes. … Samtaem disiplin, we i minim ‘blong tij,’ oli miksimwetem fasin blong tokbaot nogud wan man folem mistek we hem i mekem. Ol pikinini—semmak long ol pipol long ol defren yia—oli stap mekem fasin blong olgeta i kam gud moa taem oli filim lav mo kasem toktok blong leftemap tingting, i bitim we taem oli harem toktok we i poenem rong blong olgeta.”2
Elda Kwentin L. Kuk blong Kworom blong Olgeta Twelef Aposol i talem se: “spos yumi fetful blong gat famli prea, skripja stadi, famli haos naet, ol prishud blesing mo kipim Sabat dei i tabu,” ol pikinini blong yumi bae … oli rere from hom long heven we i no save finis, nomata long ol samting nogud we i hapen long olgeta long wan wol we i fulap long hadtaem.”3
Sam Moa Skripja
1 Nifae 8:37; 3 Nifae 22:13; Doctrine and Covenants 93:40; 121:41
Ol Stori we Oli Tru
“Mi stap ridim niuspepa taem wan long ol yangfala apu pikinini blong mi i muv i kam kolosap long mi,” Elda Robet D. Hels blong Kworom blong Olgeta Twelef Aposol i talem. “Taem mi bin stap rid, mi bin glad blong harem swit voes blong hem i stap toktok long bakgraon. Traem tingbaot sapraes blong mi taem, sam minit i pas, hem i pusum hemwan bitwin mi mo pepa ia. Hem i tekem fes blong mi long han blong hem mo mekem nus blong hem i fas long nus blong mi, hem i askem ‘!Bubu man! ?Yu stap insaed ia?’
“… Blong stap insaed ia i minim blong andastanem hat blong ol yut mo joen wetem olgeta. Mo joenem wetem olgeta i no minim nomo blong toktok wetem olgeta be mekem ol samting wetem olgeta tu. …
“Yumi mas plan mo mekem yus long ol taem blong tij olsem. …
“… Moa mi laef, moa mi luksave se ol taem blong tijing long yut taem blong mi, moa nao olgeta we papa mo mama blong mi i bin givim long mi, hem i ol tijing blong olgeta we i mekem mi kam wan man olsem we mi stap tedei.”4
© 2016 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/16 Oli letem translesen: 6/16 Translesen blong Visiting Teaching Message, September 2016.Bislama. 12869 852
Tingting long Hemia
?From wanem nao hem i wan gudfala wei blong tijim gospel tru long lanwis mo eksampol blong lav?