Fas Presidensi Mesej, Septemba 2015
?Afta long Lav,Wanem?
I Kam long Presiden Dita F. Ukdof
Seken Kaonsela long Fas Presidensi
Profet we yumi lavem tumas, Presiden Tomas S Monson, i tijim se “lav hem i stamba blong gospel ia.”
Lav i impoten tumas mekem se Jisas i bin talem se “hemia nao loa ya we i hae moa long ol narafala loa, mo i nambawan blong folem” mo hem i talem se ol narafala pat blong loa mo ol toktok blong ol profet i hang i stap long hem.2
Lav hem i stamba blong evri samting we yumi mekem insaed long Jos. Evri program, evri miting, evri aksen we yumi pat long hem olsem ol disaepol blong Jisas Kraes i mas kamaot long gudfala fasin ia nao—from we, sapos i no gat jareti “we i stret lav blong Kraes,” yumi nating nomo.3
Taem we yumi andastanem samting ia wetem maen mo hat blong yumi, afta yumi talemaot lav we yumi gat abaot God mo olgeta brata mo sista blong yumi—?afta wanem?
?Blong filim lav mo sore long ol narafala man hem i inaf? ?Taem yumi talemaot lav blong yumi long God mo long ol neiba blong yumi hem i inaf blong soem diuti blong yumi long God?
Parabol blong Tufala Pikinini Boe
Long tempol insaed long Jerusalem, ol jif pris mo ol elda blong ol Jiu oli kam from Jisas blong traem blong trikim hem long ol toktok blong Hem. Sevya hem i kasem gud olgeta , taem hem i talem wan stori long olgeta.
“I gat wan man i gat tu pikinini boe blong hem,” Hem i talem. Papa ia i go luk faswan mo askem hem blong go wok long garen. Be boe blong hem i no wantem. Be biaen, hem i tanem tingting blong hem, nao i go wok long garen.”
Papa ia i go from sekenbon blong hem mo askem hem blong go wok long garen. Nambatu pikinini boe blong hem i talem long hem se bae hem i go, be hem i neva bin go.
Afta Sevya hem i lukluk ol pris mo ol elda mo askem, “Weswan long tufala ya i mekem olsem we papa blong tufala i wantem?”
Olgeta i talem se hem i fasbon—hemia we i bin talem se hem bae i no go, be afta, hem i tanem tingting mo i bin go blong wok long garen.4
Sevya i yusum storian ia blong tijiim wan impotan prinsipol—hem i olgeta we oli stap obei long ol komanmen we oli lavem God wetem ful hat blong olgeta.
From samting ia Jisas i askem ol man blong lisin mo folem ol toktok blong ol Farisi mo ol tija blong loa, be i no blong folem ol eksampol blong olgeta. Olgeta lida blong relijin ia oli no wokbaot folem toktok blong olgeta. Olgeta oli laekem blong tokbaot relijin, be sore tumas olgeta i mestem impoten pat blong hem.
Ol Aksen mo Fasin blong Lod I Sevem Yumi
Long wan long ol las lesen blong Sevya i go long ol disaepol blong Hem, Hem i bin tokbaot las Jajmen. Ol nogud man mo ol gudfala man bae oli seperetem olgeta. Ol gudfala man bae oli kasem laef we i no save finis; ol nogud man bae oli go long panis we i no save finis.
?Wanem hem i defren bitwin tufala grup ia?
Olgeta we oli soem lav blong olgeta tru long aksen, Lod i bin sevem olgeta. Olgeta we oi no soem bae oli kasem panis ia we i no save finis.6 Afta we yumi kam insaed long gospel blong Jisas Kraes wetem ol fasin mo prinsipol we oli stap insaed, bae ol man oli witnesem tru long aksen blong yumi long evridei laef blong yumi se yumi bin tanem tingting tru o no .
Long en, wei we yumi talemaot long evri man abaot lav blong yumi long God mo long ol brata mo sista blong yumi bae i no mekem yumi fit inaf blong kasem fasin blong kam olsem wan god. Jisas i bin tijim se: “I no evriwan we i talem long mi, Lod, Lod, bae i go insaed long kingdom blong heven; be hem we i mekem samting we Papa blong mi we i stap long heven i wantem.”7
?Wanem Nao I Kam afta long Lav?
Ansa long kwestin se: “?Afta long lav, wanem?” Hem i simpol mo isi blong andastanem. Sapos yumi lavem Sevya tru, yumi bae wantem blong givim hat blong yumi long Hem, mo afta, yumi wokbaot long rod blong stap olsem disaepol. Taem yumi lavem God, bae yumi wok had blong kipim ol komanmen blong Hem.8
Sapos i tru se yumi lavem ol brata mo sista blong yumi, bae yumi go aot blong helpem “olgeta we oli pua mo olgeta long nid, olgeta we oli sik mo olgeta we oli gat hadtaem”9 Olgeta we i gat ol fasin blong lukluk long ol narawan wetem lav mo sore be i no fasin blong stap selfis, mo wetem seves,10 olgeta oli ia ol disaepol blong Jisas Kraes.
Hemia hem i wanem we i kam afta long lav.
Hemia hem i stamba blong gospel blong Jisas Kraes.
© 2016 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/16 Oli letem translesen: 6/16 Translesen blong First Presidency Message, September 2016. Bislama. 12869 852
Yusum Mesej Ia blong Tij
Presiden Ukdof hem i talem se ol tru disaepol blong Jisas Kraes hem i olgeta we oli soem lav blong olgeta long Hem mo long ol narawan tru long ol aksen blong olgeta. Hem i tijim yumi se “sapos yumi lavem Sevya tru, yumi bae wantem blong givim hat blong yumi long Hem, mo afta, yumi wokbaot long rod blong disaepol. Askem olgeta we yu stap tijim se long wanem wei nao lav i bin leftemap tingitng blong olgeta blong wokbaot long rod blong disaepol. Yu save serem ol eksperiens blong yu wetem olgeta tu. Yu save invaetem olgeta blong prea from moa lav mo fulpaoa blong tekem aksen folem lav.