Mensahe iti Visiting Teaching, Septiembre 2016
Maysa a Sagrado a Pagrebbengan ti Panagbalin a Nagannak
Nainkararagan nga adalenyo daytoy a material ken kalikagumanyo nga ammuen no ania ti ibinglayyo. Kasano a ti pannakaawat iti “Ti Kaamaan: Maysa a Waragawag iti Lubong” ket mangpadakkel iti pammatiyo iti Dios ken mangparabur kadagiti ay-aywananyo babaen ti visiting teaching? Para iti ad-adu pay nga impormasion, mapan iti reliefsociety.lds.org.
Pammati, Pamilia,Tulong
Impasdek ti Nailangitan nga Amatayo dagiti pamilia a makatulong kadatayo a mangisuro kadagiti umno a pagbatayan iti naayat nga aglawlaw. Kinuna ni Presidente Thomas S. Monson: “Ikkam ti anakmo iti maysa a pammadayaw ken maysa nga arakup; kunam, ‘Ay-ayatenka’ unay; kanayon a yebkasmo ti panagyamanmo. Dimo pulos bay-an nga agbalin a napatpateg ti masolbar a problema ngem iti tao a maayat.”1
Ni Susan W. Tanner, sigud a Young Women general president, insurona: “Impagwadan ti Amatayo iti Langit ti pagtuladan a nasken a surotentayo. Ay-ayatennatayo, isursuronatayo, naanus kadatayo, ket intalekna kadatayo ti kinawaya a panagpili. … No dadduma ti disiplina, a kayatna a sawen ti ‘mangisuro,’ ket mapagbiddutan iti panagdillaw. Dagiti annak—kasta met ti amin a tao ania man ti edadda—ket mapasayaatda ti ugalida manipud iti ayat ken panangparegta a nagnangruna ngem iti panagpabasol.”2
“No sipupudnotayo a maaddaan iti panagkararag a sangapamiliaan, panagadal iti nasantuan a kasuratan, family home evening, pammendision ti priesthood, ken panagtulnog iti aldaw ti Sabbath,” kinuna ni Elder Quentin L. Cook ti Korum dagiti Sangapulo-ket-dua nga Apostol, “dagiti annaktayo ket … maisaganadanto para iti agnanayon a pagtaengan iti langit, ania man ti mapasamak kadakuada iti narikut a lubong.”3
Dagiti Mainayon a Nasantuan a Kasuratan
1 Nephi 8:37; 3 Nephi 22:13; Doktrina ken Katulagan 93:40; 121:41
Dagiti Estoria ti Tattao a Sibibiag Pay
“Basbasaek ti pagiwarnak idi maysa kadagiti ubbing nga appokok a lallaki ti nakitugaw kaniak,” kinuna ni Elder Robert D. Hales ti Korum dagiti Sangapulo-ket-dua nga Apostol. “Bayat ti panagbasbasak, naragsakanak a dumngeg iti nasam-it a timekna nga agsarsarita a makigiddan kaniak. Nasdaawak idi, kalpasan ti sumagmamano a kanito, insadagna ti bagina kaniak ken ti pagiwarnak. Inaprosanna ti rupak ken indeppelna ti agongna iti agongko, insaona ti, ‘Lelong! Dengdenggennak kadi?’
“… Ti kaadda idiay ket kayatna a sawen a pannakaawat iti puspuso dagiti agtutubotayo ken pannakipulapol kadakuada. Ket ti pannakipulapol kadakuada ket kayatna a sawen a saan laeng a pannakisarsarita kadakuada ngem panangaramid pay kadagiti banag a kadua ida. …
“Nasken a planuentayo ken ikkan iti gundaway dagiti kanito iti panangisuro. …
“… Iti nabaybayag a panagbiagko, ad-adda met a mabigbigko a dagiti gundaway a panangisuro iti kinaagtutubok, nangnangruna kadagiti insuro dagiti nagannak kaniak, ken nagsukog iti biagko ken namangbalin kaniak no asinoak.”4
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti Visiting Teaching Message, September 2016. Ilokano. 12869 864
Ibilang Daytoy
Apay a kasayaatan a maisuro ti ebanghelio iti pagsasao ken pagwadan ti ayat?