Mensahe ti Umuna a Panguluen, Septiembre 2016
Kalpasan ti Ayat, Ania ti Sumaruno?
Ni Presidente Dieter F. Uchtdorf
Maikadua a Mammagbaga iti Umuna a Panguluen
Insuronatayo ti ay-ayatentayo a propeta, ni Presidente Thomas S. Monson, a “ti ayat ti mismo a kaipapanan ti ebanghelio.”1
Napateg unay ti ayat gapu ta inawagan daytoy ni Jesus iti “ti umuna ken naindaklan a bilin” ken kinunana a tunggal sabali pay a paset ti linteg dagiti balikas dagiti propeta ket agpannuray iti daytoy.2
Ti ayat ti kangrunaan a gandat para iti amin nga aramidentayo iti Simbaan. Nasken a ti tunggal programa, tunggal miting, tunggal aramid a pakaipasetantayo kas disipulo ni Jesucristo ket agtaud iti daytoy a kababalin—gapu ta no awan ti asi, “ti natarnaw nga ayat ni Cristo,”awan ti kaes-eskantayo.3
Apaman a maawatantayo daytoy iti panunot ken pusotayo, apaman nga ipeksatayo ti ayattayo para iti Dios ken para iti padatayo a tao—ania kalpasanna?
Umdas kadi ti rikna ti panangngaasi ken ayat para kadagiti dadduma? Ti kadi panangipeksatayo iti ayat para iti Dios ken iti padatayo a tao ket mangpakapnek iti obligasiontayo iti Dios?
Ti Pangngarig maipapan ti Dua nga Annak a Lallaki
Iti templo ti Jerusalem, immasideg ken ni Jesus ti dua a panguluen a saserdote ken panglakayen dagiti Judio tapno mapagsaoda Isuna iti banag nga usarenda a maibusor Kenkuana. Nupay kasta, binaliwan ti Mangisalakan ti situasion kadakuada babaen ti panangisalaysayna iti estoria.
“Maysa a tao ti addaan iti dua nga annak a lallaki,” inrugina. Immasideg ti ama iti umuna nga anak a lalaki ket imbagana kenkuana a mapan agtrabaho iti kaubasan. Ngem nagkedked ti anak a lalaki. Idi agangay “nagbabawi, ket napan.”
Kalpasanna napan ti ama iti maikadua nga anak ket imbagana kenkuana a mapan agtrabaho iti kaubasan. Impanamnama ti maikadua nga anak a lalaki a mapan, ngem saan pulos a napan.
Kalpasanna immasideg ti Mangisalakan kadagiti saserdote ken panglakayen ket nagsaludsod, “Asino kadagitoy dua nga annak a lallaki ti nangaramid iti pagayatan ti amana?”
Nasken nga akuenda a ti umuna nga anak a lalaki—ti nagkuna a saan a mapan ngem idi agangay nagbabawi ket napan nagtrabaho iti kaubasan.4
Inusar ti Mangisalakan daytoy nga estoria a pangyunay-unay iti napateg a pagbatayan—dagiti nagtungpal kadagiti bilin ti pudno nga agayat iti Dios.
Nalabit a daytoy ti gapu no apay a kiniddaw ni Jesus kadagiti tao a dumngeg ken sumurot kadagiti balikas dagiti Fariseo ken eskriba ngem saan a sumurot iti pagwadanda.5 Dagitoy mannursuro iti relihion ket saanda nga aramiden dagiti banag a kunada nga aramidenda. Pagay-ayatda a pagsasaritaan ti maipapan iti relihion, ngem dida ammo ti kaipapananna.
Dagiti Aramid ken ti Pannakaisalakantayo
Iti maysa kadagiti maudi nga adalen ni Jesus kadagiti disipulona, insaritana kadakuada maipapan ti maudi a Panangukom. Agsinanto dagiti nadangkes ken dagiti nalinteg. Tawidento dagiti nalinteg ti agnanayon a biag, maipanto dagiti nadangkes iti agnanayon a pannakadusa.
Ania ti pagdumaan dagiti dua a grupo?
Naisalakan dagiti nangipakita iti ayatda babaen ti aramid. Nakondena dagiti saan a nangaramid.6 Ti pudno a konbersion wenno pannakapasurot iti ebanghelio ni Jesucristo ken kadagiti ik-ikkan pateg ken pagbatayan ket maipakitanto babaen dagiti aramidtayo iti inaldaw a panagbiagtayo.
Iti udina, ti panangipeksa laeng iti ayat para iti Dios ken kadagiti padatayo a tao ket saan a mangpaikari kadatayo para iti pannakaitan-ok. Gapuna, kas iti insuro ni Jesus, “saan a tunggal maysa nga agkuna kaniak, Apo, Apo, sumrekto iti pagarian ti langit; ngem tinto mangaramid iti pagayatan ti Amak nga adda sadi langit.”7
Ania ti Sumaruno kalpasan ti Ayat?
Ti sungbat iti saludsod a “Kalpasan ti ayat, ania ti sumaruno?” ket mabalin a simple ken natarus. No pudno nga ay-ayatentayo ti Mangisalakan, itunostayo dagiti puspusotayo Kenkuana ket kalpasanna magnatayo iti dalan ti kinadisipulo. No ay-ayatentayo ti Dios, ikarigatantayo a tungpalen dagiti bilinna.8
No pudno nga ay-ayatentayo dagiti padatayo a tao, idiayatayo ti bagbagitayo a tumulong “kadagiti napanglaw ken agkasapulan, dagiti masaksakit ken agsagsagaba.”9 Gapu ta isuda nga agaramid kadagitoy naayat nga aramid ti panangngaasi ken serbisio, 10 isuda met laeng dagiti disipulo ni Jesucristo.
Daytoy ti sumangbay kalpasan ti ayat.
Daytoy ti pudno a kaipapanan ti ebanghelio ni Jesucristo.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, September 2016. Ilokano. 12869 864
Panangisuro manipud iti Daytoy a Mensahe
Ilawlawag ni Presidente Uchtdorf a dagiti pudno a disipulo ni Jesucristo ket isu dagiti mangipakita iti ayatda para Kenkuana ken para kadagiti dadduma babaen kadagiti aramidda. Isuronatayo a “no pudno nga ay-ayatentayo ti Mangisalakan, itunostayo dagiti pusotayo Kenkuana ket kalpasanna magnatayo iti dalan ti kinadisipulo.” Saludsodenyo dagiti sursuruanyo no ania dagiti wagas a nakaparegtaan kadakuada ti ayat tapno magna iti dalan ti kinadisipulo. Mabalinyo met ti mangisalaysay kadagiti padasyo kadakuada. Mabalinyo nga awisen ida nga agkararag para iti ad-adu pay a panangngaasi ken pigsa nga agtignay nga addaan iti ayat.