Ngeasek

Ngau ma Osisecheklel a Blekongesenges

A President Thomas S. Monson ra tara taem e ng uluchais e ra le subii a ultutelel a blekongesenges. Sera le eiai a rekil, e a rechad er a blil a mlo oldingel er a blirir el ngara rois. Ngii ma sechelil a mle sorir el dmedesii a basio el di chemull me bo longumel ra ngau er ngii. Te millasem el meledaes a ikal chemull, el mengurs e oltamt el mora a ikel sebecherir, e ng di a le ngilai a di dersta el udel. Ma President Monson a mlo smodii el kmo, “Ea kumdesuang el renguk a kmo ng mle ungil luldasu tial siliseb er a uldesuel a eiai a rekil. Ak dula er a Danny, ‘Ng kmal kired el di metutii a ngau er a ikal udel. Kerdi sosebii a ua klungel a chaibibeob ra blengel tial udel!’”

Meng mle medengei el kmo ngdiak el kirel lousbech a mases, ng riruret el mora blai meng ngmai, e ngii ma Danny a metutii a kekerei el ngau er tial chelludel el udel. Te omdasu el kmo ng di ngii el mol modiak, e ng di lechub e ng bai milngai el merael el mo klou e mocha ktekudel el seseb. Ngii ma Danny a riruret el mo osiik a ngeseu, e telkib e a re meklou el chad a ruretang el mocha omekeuad er ngii el seseb ruchei er a le bora oreomel.

A President Monson a milemolem, “Danny me ngak a siluub a bebil er a meringel e ng di meklou a belkul suobel er tial sils—ea klou er ngii a sel ultutelel a blekongesenges.” (See “Obedience Brings Blessings,” Liahona, May 2013, 89–90.)

El di ua President Monson, kau ke mlo subii a subelem el kirel a blekongesenges e lulekiu a meringel el teletael? Ngera a ikel tekoi el sebechem el kutmokl el mo sobecheklau lokiu a blekongesenges ra ngarmedad el taem?