Klumech er a First Presidency, Ongeteruich el Buil 2016
A ikel Klengeltengat sel Dolngesenges
“Sel kot el klou el osisechakl el de subii er tial klengar,” el President Thomas S. Monson a ulsisecheklii, “a sel sekum a Dios a melekoi e kid a orenges, e kede blechoel el di ungil.”1
Kede dirrek el mo ngeltengat. El di uai kel dilung a President Monson ra dirk mlo merek el klou longdibel: “Sel doltirakl a llach, e kede mo ngara deurreng, el bekerredechel, e diak el sal chetiteuokel. A ongarm ma chetiteuokel el tekoi el me rekid a mo beot el doltekau, e kid a mong mai a ikel telbiil el klengeltengat ra Dios.”2
A ika kid el mekedeb el tekoi el mlengai ra osisecheklel a President Monson el President er a Ikelesia, e ngii a omeklatk er kid el kmo a llach a ultebechel el rael el mora deurreng ma budech.
Olkael el kirel Omerael
“A llechul a Dios a diak el beskid el mo mengesang er kid malechub e ng molibesongel er a mo deurreng er kid. Ng bai kmal rullid el mo ungil. Ngkal milebid e ngii el meral lou beltikelreng el me rekid a ungil medengei el kmo ngera ke dousbech er a klengar er kid me bol sebeched el nguu sel kot el klou el deurreng. Ngii a mla meskid a ikel lolkael el sekum, e kede oltirakl, e ng sobecheklid el mo ungil er tial ktekudel e lomeroled er a klechad. Ke de medengei a ikel tekoi er sel dodengelii el chelitakl: ‘Keep the commandments! Le ke de mo selbechakl; leng ngar ngii a budech er ngii’ [mesa “Keep the Commandments,” Hymns, no. 303].”3
Klisiich ma Klemedengei
“A blekongesenges a teletelir a reprofet; el uchul a klisiich me a llomes el mor tir er a chelsel a reksi. Ng klou a belkul bo dodengei el kmo kid, a dirrek, el sebeched el nguu tial uchul a klisiich me a llomes. Ng keltmokl el medechel el mo ra dersta er kid er chelechal sils sel dolngesenges a llechul a Dios. …
“A llomes el kid osiik, a nger el kmal soad, me a klisiich el kid a soad el mo olab er chelechal sils el mo sobecheklid er tial chetituokel e ngeldengodech el beluulechad a sebeched el mo ngmai alsekum e ng ngar ngii er a rengud el mo olngesenges a llechul a Rubak.”4
Molilt el Molngesenges
“A teletael er chelechal taem a sel chad mesel soal. A babier ma ues e ra tibi a olecholt er tirkel chad el ngara katsudo, me tirkel smiich el chad er a klekool—e betok el mekerei el chad el sorir el mo uai tir—el diak a uldesuir el kirel a llechul a Dios e meruul a sibai el di delengerengel, e ka lolechesuar a kengtil. Ke le bo moumerang! Ngar ngii a taem e ke de mora kerekeriil el bol longetiit a rokui el doruul. A re bekl el Cinderella a di telkael a temir, a lak el ngar tial klengar, e ng morsel merael mei. Sel Sils ra Klou el Kerekeriil a di merkid el rokui. … Ak kulengit er kemiu me molilt el mo olngesenges.”5
Deurreng ma Budech
“A bebil er a taem e ke locha mo omelchesiu el kmo tirkel meruul a tekoi er a beluulechad a lmuut el ngara klou el deurreng el om ngar ngii. A rebebil er kemiu a mo omelchesiu el kmo a ikal llach er a blekerdelel a klechad el Ikelesia a omeskemiu a locha kmal meringel. Rodam ma rodos er ngak, a kuchais er kemiu, el kmo, ng diak a ngii dil ngerang el meskemiu a deurreng er a klengar malechub a budech er a reng el uai a Chedaol Reng el ngii a mei er kid sel doltirakl a llechul Osobel.”6
Morael el Klikiid
“A kuchais er kemiu el kmo a ikel miltib el klengeltengat a diak el meues a ulebengelel. Ma ikel meringel el chetau a mo mechudel, me a chull a ruebet er kid, e a klemedengei er kid er a ebangkelio ma beltkil a rengud el mora Demad er Babeluades ma Osebeled a mo mengelaod e oltekau er kid e meskid a deurreng sel dorael el klikiid e oltirakl a llach. Ng mo diak a ngii di el ngerang er tial beluulechad el sebechel mo mesisiich er kid.”7
Moltirakl ra Osobel
“Ng techang ngikal chad el ngara klengit el reng, el medengelii a chelebuul? Ng techa ngkel King er a klebkall, ngikal Rubak er a re delebechel? Ngii a Mastang er kid. Ngii a Osebeled. Ngii a Ngelekel a Dios. Ngii a Uchul a Diak a Ulebengelel Klengar a mei er Kid. Ngii olengit, ‘Moltirakl er ngak.’ Ngii olisechakl, ‘Morael, e bo moruul ra osisiu.’ Ngii olengit, ‘Moltirakl a llechuk.’
“Mei e doltirakl er Ngii. Mei e dosuub ra Okesiul. Mei e dolngesenges a Tekingel. Me sel bo de uai sei, e ke de Msang a chedaol sengk ra omereng el saul.”8
© 2016 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/16. Kengei er a oidel: 6/16. Oidel a First Presidency Message, October 2016. Palauan. 12870 881
Osischeklel Tia el Klumech
A President Monson a olsisechakl er kid el kirel a ikel betok el klengeltengat el sebeched el ngmai sel doltirakl, luldimukl a klisiich, klemedengei, deurreng, ma budech. Molatk e loker er tirkel molsisechakl er tir el kmo ngua ngerang ra le mukngeltengat le toltirakl a llach. Ke locha mo omeksemeriar er tir me lolemolem el melatk a ikel klengeltengat el le ngilai e lluches a uldesuir ma ikel blekeradel el kirel er a babilngir. Ke locha dirrek el mo omeksemeriar er tir me lochotii ra rengrir el mora Dios el kirel a ikel klengeltengat el melemolem el lolengesenges.