2016
Sucu uh ma Ahkkweyeyucklac sin God
October 2016

Pweng ke Forfor Luti, Ohktohpa 2016

Sucu uh ma Ahkkweyeyucklac sin God

Pruhe in lutlutkihn kuhfa inge ac suk in etuh ma in akacsruhi kac. In kahlwem ke “Sucu: Sie Mwe Fahkwack nuh fin Facluh” ac ahkyohkye fuhkah luhlahlfongi lom ke God ac ahkinsewowoye mwet kom karihngihn ke forfor luti uh? Nuh ke kuhtuh pac ma in etuh, som nuh ke reliefsociety.lds.org.

Luhlahlfongi, Sucu, Kahsruh

“Ke kahs luhn [on ke U luhn Tuhlihk Srihsrihk], ‘The Family Is of God,’ [Sucu pa Ma luhn God] … kuht ahkacsmakihnyeyuck ke mwe luti pwacye,” fahk lal Carole M. Stephens, Mwet in Kahsruh Se Met ke Prestuhn Luhlahp ke Rilif Sosaiti. “Kuht tiac lotwelah muhkwena muh sucu pa ma luhn God tuhsruhktuh kuht kais sie oacyacpac ip ke sucu luhn God. …

“… Plwacn luhn Pahpah nuh sin tuhlihk Nahtuhl pa plwacn ke luhngse. Pa plwacn se in oracni tuhlihk Nahtuhl—Sucu Lal—Yohrohl.”1

Elder L. Tom Perry (1922–2015) ke U luhn Mwet Sap Singucul Luo el fahk: “Kuht oacyacpac luhlahlfongi lah sucu ke ohiyac mahtuh uh tiac u fihsracsr muhkwena ke un mwet wo, kasrpac wo, ac facsin wo ke ma yohk kalmeyac—tuhsruhk elos pa u fihsracsr ke ma pahtpaht ac ke tohkohsrahi ac kafucrmacn luhn God.

“Kuht luhlahlfongi lah ohiyacn u ac kafucrmacn luhn inkuhsrao orekweni ke sucu ac sucu luhlahp.”2

“Mwet nuh kwewa, finne elos pahyuck kuh tiac kuh fin oasr tuhlihk, kuh in ahkkweye plwacn luhn Leum oacna ahkuhtweyac ke fahkwack luhn sucu,” fahk lal Bonnie L. Oscarson, Prestuhn Luhlahp ke Muhtwacn Fuhsr. “Fin plwacn uh ma luhn Leum, el ma pac lasr!” 3

Tahfweyacn Ma Suhmuhslah

Liye Doctrine and Covenants 2:1–3; 132:19

Mwe Luti luhn Sucu

Tahmtahel Julie B. Beck, Prestuhn Luhlahp mah luhn Rilif Sosaiti, luti lah mwe luti ke sucu tuhkuh ke Oraclah sac, Puhtatlac sac, ac Iwaclah luhn Jisus Kraist:

“Oreklac luhn facluh sang acn se ma sucu an kuh in moul kac. God El oraclah mukul se ac muhtwacn se suc pa ip yohk ke sucu se. Pa ip se ke plwacn luhn Pahpah Lucng tuh Adam ac Eve in siliyucki ac oraclah sucu ma pahtpaht.

“… Puhtatlac sac oruh elos in muh kuh in isus tuhlihk mukul ac muhtwacn.

“Iwaclah [luhn Kraist] lwelah sucu in siliyucki nuh sie ma pahtpaht. El oacyacpac lwelah sucu uh in kapwack ma pahtpaht ac sun suwohswohs. Plwacn luhn engan, pahngpahng pac plwacn in molwelah, pa plwacn se oreklac luhn sucu uh. …

“… Pa inge mwe luti luhn Kraist. … Fin wacngihn sucu, wacngihn plwacn; wacngihn srihpac ke moul luhn facluh.”4

© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/16. Ahkkweyeyucklac ke lweng: 6/16. Lwenglah luhn Visiting Teaching Message, October 2016. Kosraean. 12870 868

Mwe kahsruh

  1. Carole M. Stephens, “Sucu uh Ma sin God,” Liahona, Mei 2015, 11, 13.

  2. L. Tom Perry, “Why Marriage and Family Matter—Everywhere in the World,” Liahona, Mei 2015, 41.

  3. Bonnie L. Oscarson, “Defenders of the Family Proclamation,” Liahona, Mei 2015, 15.

  4. Julie B. Beck, “Teaching the Doctrine of the Family,” Liahona, Mahs 2011, 32, 34.

Nuhnkuh Ma Inge

Efuh sucu an u yohk srihpac emet ke pacl ac ma pahtpaht?