Pweng sin Prestuhnsi Se Met, Ohktohpa 2016
Mwe Insewowo ke Ahkostwen
Sel Prestuhn Thomas S. Monson
“Lesin yohk emet kuht kuh in lotwelah ke moul fin facluh,” Prestuhn Thomas S. Monson el luti, “pa ke God El sramsram ac kuht ahkos, kuht ac suwohs pacl nuh kwewa.”1
Kuht fah oacyacpac ahkinsewowoyeyuck. Oacna Prestuhn Monson el fahk ke toeni luhlahp se tari ah: “Ke kuht karihngihn masap uh, moul lasr fah engan, sesseslah, ac tiac upac. Mwe upac ac elyah lasr fah fihsracsrlah in us, ac kuht fah eis mwe insewowo luhn [God].”2
Ke ip luhn mwe luti lal Prestuhn Monson ke Prestuhn luhn Alu, el ahkacsmakihnye kuht lah masap pa mwe kolyuck suwohs nuh ke engan ac mislac.
Mwe Kolyuck luhn Fuhfahsryucsr
“Masap luhn God tiac utuckuh in ahkfohsye kuht kuh oraclah ma in kosrwaclah engan lasr. Ma siena liki an pwacye. El suc orwekuhtlac ac suc luhngse kuht na pwacye etuh ohiyac ma kuht enenuh in moulkihn moul lasr kuht in muh kuh in eis mwe engan yohk emet. El use nuh sesr mwe kol ma, kuht fin ukwaclos, ac fah kol kuht ahluhkwelah fuhfahsryucsr ma sensen ke moul lasr uh. Kuht esam kahs ke on soko ma kuht etuh: ‘Karihngihn masap uh! Oasr ma sef kac; oasr mislac kac’ [liye “Keep the Commandments,” Hymns, no. 303].”3
Kuh ac Etwacack
“Ahkostwen pa atac wowo se luhn mwet pahluh; ohiyac se sang kuh ac etwacack nuh selos ke sramsram mahtuh uh me. Yohk na pwacye nuh sesr in akihlen lah kuht, pac, pa luhlahlfongiyuck nuh ke mwe kahsruh ke kuh ac etwacack se inge. Fihsrwacsr in oasr lasr kais sie mihsenge ke kuht ahkos masap luhn God uh. …
“Etwacack ma kuht suk, top ma kuht kuh in eis, ac kuh ma kuht kena mihsenge in ohsun nuh ke ma upac luhn facluh upac ac eklac kuh in sikyak ke kuht kena ahkohs masap luhn Leum uh.”4
Sulaclah in Ahkos
“Atac yohk ke pacl lasr uh pa sukohsohk in mukwikwi. Magazine ac television ahkkahlwemye mwet eye ke petsac, mwet kuhtanglah ke sritacl—elos suc mwet fuhsr uh kena tuh in oacna elos—tiac ahkos masap luhn God ac ahkfuhlwactye mukwikwi koluk, ac luhma muh oacna in wacngihn ma koluk sikyak. Tiac luhlahlfongi ma sacn! Oasr pacl kuhte muh nuhnuhnkweyuck—oacna balance account se. Cinderella nuh kwewa sun infulwacn fong lal—fin tiac ke moul se inge, na ke moul se tok. Lwen in Nuhnuhnkuh fah tuhkuh nuh sin mwet nuh kwewa. … Nga kwacfe kowos in sulaclah in ahkos.”5
Engan ac Mislac
“Kuhtuh pacl uh kom e luhma muh ma fin facluh uh pwacr liki na oruh lom an. Kuhtuh suwos kuh in puhla ikolyucki ke ohiyacn oruh ma oasr lasr ke Alu uh. Tamuhlwel ac tahmtahel wiyuck an, nga fahkoht nuh suwos, tuhsruhk, lah ac wacngihn ma kuh in use pwacr yohk nuh ke moul lasr uh kuh mihslac wo nuh ke nguhna lasr uh liki na Nguhn ma tuhkuh nuh sesr ke kuht ukwe Mwet Lahngo ac karihngihn masap uh.”6
Fahsr Suwohs
“Nga fahkwack nuh suwos lah mwe insewowo uliyuck nuh sesr uh ahluhkwelah srihkasrak. Finne pahkah an tuhkweni, finne af puhtatlac nuh facsr, mwe etuh lasr ke wosasuc ac luhngse lasr nuh sin Pahpah tuhmasr Inkuhsrao ac nuh sin Mwet Lahngo lasr fah ahkmihsye ac ahkkweye kuhtlac ac us mwe engan nuh ke insiyacsr ke kuht fahsr suwohs ac karihngihn masap uh. Wacngihn ma ke facluh se inge kuh in kuhtang kuhtlac.”7
Ukwe Mwet Lahngo
“Suc Mukul sacn ke mwe ahsor, ac wi pac mwe kweok? Suc pa Tohkohsrah luhn wolacna, Leum se inge ke u? El pa Mwet Kol lasr. El pa Mwet Lahngo lasr. El pa Wen nuhtin God. El pa Mwet Sihm ke Molwelah lasr. El suli kuht, ‘Ukwe yuc.’ El luti, ‘Som, ac oruh oacna.’ El siyuck, ‘Karihngihn masap luhk.’
“Lwelah kuht in Ukwacl. Lwelah kuht in ukwe srihkasrak Lal. Lwelah kuht in ahkos kahs Lal. Ke kuht oruh, kuht sang nuh Sel mwe sang wolacna ke tarilacna.”8
© 2016 sel Intellectual Reserve, Inc. Kuh ac suwohs nuh kwewa fihliyucki. Sihmlac fin acn USA. Ahkkweyeyucklac ke kahs English: 6/16. Ahkkweyeyucklac ke lweng: 6/16. Lwenglah luhn First Presidency Message, October 2016. Kosraean. 12870 868
Luti ke Pweng Se Inge
Prestuhn Monson el luti kuht ke mwe insewowo pucspucs ma kuht kuh in eis ke kuht ahkostwen uh, weacng pacna kuh, lahlmwetmwet, engan, ac mihslac. Nuhnkuh in siyuck selos suc kom luti elos ahkinsewowoyeyuck fuhkah ke elos karihngihn masap uh. Sahp kom ac kuh in ahkkweyaclos in kalweni in motko ke mwe insewowo lalos ac suhmuhslah nuhnak ac mukwikwi lalos ke sie journal. Sahp kom kuh in oacyacpac kwacfelos in ahkkahlwemye tarilacna nuh sin God ke mwe insewowo lalos ke elos kalweni in ahkostwen uh.