ຂ່າວສານການຢ້ຽມສອນ, ເດືອນຕຸລາ 2016

ຄອບຄົວແມ່ນຖືກແຕ່ງຕັ້ງຂຶ້ນໂດຍພຣະເຈົ້າ

ໃຫ້ສຶກສາຂ່າວສານນີ້ດ້ວຍການອະທິຖານ ແລະ ສະແຫວງຫາການດົນໃຈ ເພື່ອຈະໄດ້ຮູ້ຈັກສິ່ງທີ່ຄວນແບ່ງປັນ. ການເຂົ້າໃຈໃບ “ຄອບຄົວ: ການປະກາດຕໍ່ໂລກ” ເພີ່ມສັດທາຂອງທ່ານໃນພຣະເຈົ້າ ແລະ ເປັນພອນໃຫ້ແກ່ຄົນທີ່ທ່ານດູແລ ຜ່ານການຢ້ຽມສອນ ໄດ້ແນວໃດ? ສຳລັບລາຍລະອຽດເພີ່ມເຕີມ, ໃຫ້ເປີດເບິ່ງທີ່ reliefsociety.lds.org.

ສັດທາ, ຄອບຄົວ, ສົງເຄາະ

“ໃນເນື້ອເພງ [ຂອງຊັ້ນປະຖົມໄວ] ຊື່ວ່າ ‘The Family Is of God,’… ເຮົາໄດ້ຖືກເຕືອນໃຈ ເຖິງຄຳສອນທີ່ບໍລິສຸດ,” ແຄໂຣ ເອັມ ສະຕີບເວັນສ໌, ທີ່ປຶກສາທີໜຶ່ງໃນຝ່າຍປະທານສະມາຄົມສະຕີສົງເຄາະສາມັນໄດ້ກ່າວ. “ເຮົາບໍ່ພຽງແຕ່ຮຽນຮູ້ວ່າ ຄອບຄົວມາຈາກພຣະເຈົ້າເທົ່ານັ້ນ, ແຕ່ເຮົາຍັງເປັນພາກສ່ວນໃນຄອບຄົວຂອງພຣະເຈົ້າຄືກັນ. …

“… ແຜນຂອງພຣະບິດາສຳລັບລູກໆຂອງພຣະອົງ ແມ່ນແຜນແຫ່ງຄວາມຮັກ. ມັນເປັນແຜນທີ່ເຕົ້າໂຮມລູກໆຂອງພຣະອົງເຂົ້າກັນ—ຄອບຄົວຂອງພຣະອົງ—ນຳພຣະອົງ.”¹

ແອວເດີ ແອວ ທອມ ແພຣີ (1922–2015) ແຫ່ງກຸ່ມອັກຄະສາວົກສິບສອງ ໄດ້ກ່າວວ່າ: “ເຮົາເຊື່ອອີກວ່າ ຄອບຄົວທີ່ມີສາມີພັນລະຍາ ແລະ ລູກໆນັ້ນ ບໍ່ພຽງແຕ່ເປັນໜ່ວຍພື້ນຖານຂອງສັງຄົມ ທີ່ໝັ້ນຄົງ, ເສດຖະກິດທີ່ໝັ້ນຄົງ ແລະ ມາດຕະຖານທາງສິນທຳທີ່ໝັ້ນຄົງເທົ່ານັ້ນ—ແຕ່ວ່າມັນຍັງເປັນໜ່ວຍພື້ນຖານຂອງຊົ່ວນິລັນດອນ ແລະ ຂອງອານາຈັກ ແລະ ການປົກຄອງຂອງພຣະເຈົ້ານຳອີກ.

“ເຮົາເຊື່ອວ່າການຈັດຕັ້ງ ແລະ ການປົກຄອງຂອງສະຫວັນ ຈະຖືກສ້າງຂຶ້ນຈາກຄອບຄົວ ແລະ ຍາດຕິພີ່ນ້ອງທັງຫລາຍ.”²

“ທຸກຄົນ, ບໍ່ວ່າສະພາບການເລື່ອງການແຕ່ງງານຂອງເຂົາເຈົ້າຈະເປັນແນວໃດກໍຕາມ ຫລື ມີລູກຈັກຄົນ, ກໍສາມາດປົກປ້ອງແຜນຂອງພຣະຜູ້ເປັນເຈົ້າໄດ້ ຊຶ່ງໄດ້ບັນຍາຍໄວ້ຢູ່ໃນໃບປະກາດກ່ຽວກັບຄອບຄົວນັ້ນ,” ບອນນີ ແອວ ໂອສະກາສັນ, ປະທານອົງການຍິງໜຸ່ມສາມັນ ໄດ້ກ່າວ. “ຖ້າມັນເປັນແຜນຂອງພຣະຜູ້ເປັນເຈົ້າ, ມັນກໍຄວນເປັນແຜນຂອງເຮົາຄືກັນ!”³

ຂໍ້ພຣະຄຳພີເພີ່ມເຕີມ

Doctrine and Covenants 2:1–3; 132:19

ຄຳສອນກ່ຽວກັບຄອບຄົວ

ຊິດສະເຕີ ຈູລີ ບີ ແບັກ, ອະດີດປະທານສະມາຄົມສະຕີສົງເຄາະສາມັນ, ໄດ້ສອນວ່າ ທິດສະດີກ່ຽວກັບຄອບຄົວແມ່ນອີງຕາມການສ້າງ, ການຕົກ, ແລະ ການຊົດໃຊ້ຂອງພຣະເຢຊູຄຣິດ:

“ການສ້າງແຜ່ນດິນໂລກ ໄດ້ຈັດສະຖານທີ່ ໃຫ້ຄອບຄົວມາອາໄສຢູ່. ພຣະເຈົ້າໄດ້ສ້າງຜູ້ຊາຍ ແລະ ຜູ້ຍິງ ຊຶ່ງທັງສອງຝ່າຍກໍມີຄວາມສຳຄັນເຄິ່ງໜຶ່ງ ໃນຄອບຄົວ. ມັນເປັນພາກສ່ວນໜຶ່ງໃນແຜນຂອງພຣະບິດາເທິງສະຫວັນ ທີ່ອາດາມ ແລະ ເອວາ ຕ້ອງຜະນຶກເຂົ້າກັນ ແລະ ສ້າງຄອບຄົວນິລັນດອນ.

“… ການຕົກໄດ້ເຮັດໃຫ້ເຂົາເຈົ້າສາມາດມີລູກຊາຍ ແລະ ລູກສາວ.

“ການຊົດໃຊ້ [ຂອງພຣະຄຣິດ] ຊ່ວຍໃຫ້ຄອບຄົວໄດ້ຜະນຶກເຂົ້າກັນຊົ່ວນິລັນດອນ. ມັນຊ່ວຍໃຫ້ຄອບຄົວມີຄວາມເຕີບໂຕນິລັນດອນ ແລະ ດີພ້ອມທຸກຢ່າງ. ແຜນແຫ່ງຄວາມສຸກ, ຍັງຖືກເອີ້ນອີກວ່າ ແຜນແຫ່ງຄວາມລອດ, ເປັນແຜນທີ່ໄດ້ຖືກສ້າງຂຶ້ນສຳລັບຄອບຄົວ. …

“… ນີ້ຄືຄຳສອນຂອງພຣະຄຣິດ. … ປາດສະຈາກຄອບຄົວ, ກໍບໍ່ມີແຜນ; ບໍ່ມີເຫດຜົນສຳລັບຊີວິດມະຕະ.”⁴

© 2016 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ Visiting Teaching Message, October 2016. Laotian. 12870 331

ໃຫ້ພິຈາລະນາສິ່ງນີ້

ເປັນຫຍັງຄອບຄົວຈຶ່ງເປັນໜ່ວຍທີ່ສຳຄັນທີ່ສຸດ ໃນການເວລາ ແລະ ໃນນິລັນດອນ?