ຂ່າວສານຈາກຝ່າຍປະທານສູງສຸດ, ເດືອນຕຸລາ 2016
ພອນແຫ່ງການເຊື່ອຟັງ
ໂດຍປະທານທອມມັສ ແອັສ ມອນສັນ
ປະທານທອມມັສ ແອັສ ມອນສັນ ໄດ້ສອນວ່າ, “ບົດຮຽນທີ່ຍິ່ງໃຫຍ່ທີ່ສຸດ ທີ່ເຮົາສາມາດຮຽນຮູ້ໄດ້ ໃນຊ່ວງມະຕະ ແມ່ນຕອນທີ່ ພຣະເຈົ້າກ່າວ ແລະ ເຮົາເຊື່ອຟັງ, ແລ້ວເຮົາຈະຖືກຕ້ອງສະເໝີ.”1
ເຮົາຈະໄດ້ຮັບພອນນຳອີກ. ດັ່ງທີ່ປະທານມອນສັນໄດ້ກ່າວ ຢູ່ໃນກອງປະຊຸມໃຫຍ່ສາມັນ ເມື່ອບໍ່ດົນມານີ້ ວ່າ: “ເມື່ອເຮົາຮັກສາພຣະບັນຍັດ, ຊີວິດຂອງເຮົາຈະມີຄວາມສຸກກວ່າ, ສົມບູນກວ່າ, ແລະ ຫຍຸ້ງຍາກໜ້ອຍກວ່າ. ການທ້າທາຍ ແລະ ບັນຫາຂອງເຮົາ ຈະງ່າຍຂຶ້ນ ທີ່ຈະທົນຕໍ່, ແລະ ເຮົາຈະໄດ້ຮັບພອນທີ່ [ພຣະເຈົ້າ] ໄດ້ສັນຍາໄວ້.”2
ໃນບົດຄວາມຕໍ່ໄປນີ້ທີ່ເອົາມາຈາກຄຳສອນຂອງປະທານມອນສັນ ໃນຖານະທີ່ເປັນປະທານຂອງສາດສະໜາຈັກ, ເພິ່ນເຕືອນເຮົາວ່າ ພຣະບັນຍັດເປັນ ຄຳແນະນຳທີ່ແນ່ນອນທີ່ສຸດ ທີ່ນຳໄປສູ່ຄວາມສຸກ ແລະ ຄວາມສະຫງົບ.
ຂໍ້ແນະນຳສຳລັບການເດີນທາງ
“ພຣະບັນຍັດຂອງພຣະເຈົ້າ ບໍ່ໄດ້ຖືກມອບໃຫ້ເພື່ອເປັນສິ່ງເຮັດໃຫ້ເຮົາທໍ້ຖອຍໃຈ ຫລື ເປັນສິ່ງກີດກັນເຮົາ ຈາກການມີຄວາມສຸກ. ແຕ່ມັນກົງກັນຂ້າມ. ພຣະອົງຜູ້ໄດ້ສ້າງເຮົາ ແລະ ຮັກເຮົາຢ່າງແນ່ນອນ ຮູ້ວ່າເຮົາຕ້ອງມີຊີວິດແນວໃດ ກ່ອນຈະມີຄວາມສຸກທີ່ສຸດເທົ່າທີ່ຈະເປັນໄປໄດ້. ພຣະອົງໄດ້ຈັດຫາຄຳແນະນຳໄວ້ໃຫ້ເຮົາ, ຖ້າເຮົາປະຕິບັດຕາມ, ມັນຈະນຳພາເຮົາໄປຢ່າງປອດໄພ ໃນການເດີນທາງຊ່ວງມະຕະທີ່ກັນດານຫລາຍນີ້. ເຮົາຈື່ຈຳຂໍ້ຄວາມຂອງເພງສວດ ທີ່ຮູ້ຈັກກັນດີ ທີ່ວ່າ: ‘ຈົ່ງຮັກສາພຣະບັນຍັດ! ໃນນີ້ຄືຄວາມປອດໄພ, ໃນນີ້ຄືຄວາມສະຫງົບ’ [ເບິ່ງ “Keep the Commandments,” Hymns, no. 303].”3
ຄວາມເຂັ້ມແຂງ ແລະ ຄວາມຮູ້
“ການເຊື່ອຟັງເປັນລັກສະນະຂອງສາດສະດາທັງຫລາຍ; ມັນໃຫ້ຄວາມເຂັ້ມແຂງ ແລະ ຄວາມຮູ້ ແກ່ພວກເພິ່ນໃນທຸກຍຸກທຸກສະໄໝ. ມັນສຳຄັນຕໍ່ເຮົາທີ່ຈະຮູ້ວ່າ, ເຊັ່ນດຽວກັນ ເຮົາສາມາດໄດ້ຮັບແຫລ່ງແຫ່ງຄວາມເຂັ້ມແຂງ ແລະ ຄວາມຮູ້ເຫລົ່ານີ້. ມັນມີໄວ້ໃຫ້ເຮົາແຕ່ລະຄົນໃນເວລານີ້ ເມື່ອເຮົາເຊື່ອຟັງພຣະບັນຍັດຂອງພຣະເຈົ້າ. …
“ຄວາມຮູ້ທີ່ເຮົາສະແຫວງຫາ, ຄຳຕອບທີ່ເຮົາຢາກໄດ້ຮັບ, ແລະ ຄວາມເຂັ້ມແຂງທີ່ເຮົາປາດຖະໜາໃນເວລານີ້ ເພື່ອຈະສາມາດປະເຊີນກັບການທ້າທາຍຢູ່ໃນໂລກທີ່ສັບສົນ ແລະ ປ່ຽນແປງນີ້ ສາມາດເປັນຂອງເຮົາໄດ້ ເມື່ອເຮົາເຕັມໃຈທີ່ຈະເຊື່ອຟັງພຣະບັນຍັດຂອງພຣະຜູ້ເປັນເຈົ້າ.”4
ເລືອກທີ່ຈະເຊື່ອຟັງ
“ທ່າທາງທົ່ວໄປໃນວັນເວລາຂອງເຮົາ ຄືທີ່ຈະເຮັດຕາມອຳເພີໃຈ. ວາລະສານ ແລະ ໂທລະພາບ ສະແດງຮູບຂອງ ດາລາໜັງ, ຮູບຂອງນັກກິລາທີ່ເກັ່ງກ້າ—ບຸກຄົນທີ່ຄົນໜຸ່ມນັບຖືເອົາເປັນແບບຢ່າງ—ເຮັດໃຫ້ເຂົາລະເມີດກົດຂອງພຣະເຈົ້າ ແລະ ຫລົງໄປເຮັດສິ່ງທີ່ເປັນບາບ ຄືກັບວ່າ ບໍ່ມີຜົນສະທ້ອນແນວໃດເລີຍ. ຢ່າເຊື່ອ! ຈະມີເວລາຂອງການຄິດ—ແມ່ນແຕ່ເວລາຄິດໄລ່ບັນຊີ. ເຊັ່ນດຽວກັບນາງ ຊິນເດີເຣລາ ທຸກຄົນຈະມີທ່ຽງຄືນ—ຖ້າບໍ່ແມ່ນໃນຊີວິດນີ້ ມັນກໍຈະເປັນໄປໃນຊີວິດໜ້າ. ວັນພິພາກສາ ຈະມາເຖິງທຸກຄົນ. … ຂ້າພະເຈົ້າຂໍອ້ອນວອນພວກທ່ານໃຫ້ເລືອກທີ່ຈະເຊື່ອຟັງ.”5
ຄວາມຊື່ນຊົມ ແລະ ຄວາມສະຫງົບ
“ມັນອາດປະກົດຕໍ່ທ່ານເປັນບາງຄັ້ງວ່າ ຜູ້ຄົນທີ່ອອກໄປໃນໂລກ ມີຄວາມມ່ວນຊື່ນຫລາຍກວ່າທ່ານ. ພວກທ່ານບາງຄົນອາດຮູ້ສຶກຖືກຈຳກັດດ້ວຍກົດຂອງສາດສະໜາຈັກ ທີ່ເຮົາຍຶດໝັ້ນ. ອ້າຍເອື້ອຍນ້ອງຂອງຂ້າພະເຈົ້າ, ເຖິງຢ່າງໃດກໍຕາມ, ຂ້າພະເຈົ້າຂໍປະກາດຕໍ່ທ່ານວ່າ ບໍ່ມີ ສິ່ງໃດ ທີ່ຈະນຳຄວາມສຸກ ຫລື ຄວາມສະຫງົບມາສູ່ຈິດວິນຍານຂອງທ່ານ ຫລາຍກວ່າພຣະວິນຍານ ຊຶ່ງສາມາດມາສູ່ເຮົາ ເມື່ອເຮົາເຮັດຕາມພຣະຜູ້ຊ່ວຍໃຫ້ລອດ ແລະ ຮັກສາພຣະບັນຍັດ.”6
ເດີນໄປຢ່າງທ່ຽງທຳ
“ຂ້າພະເຈົ້າຂໍເປັນພະຍານຕໍ່ທ່ານວ່າ ພອນທີ່ສັນຍາໄວ້ ແມ່ນເກີນກວ່າ ທີ່ຈະວັດແທກໄດ້. ເຖິງແມ່ນມໍລະສຸມຈະຫລັ່ງໄຫລມາ, ເຖິງແມ່ນຟ້າຝົນຈະຖອກເທລົງມາເທິງເຮົາ, ແຕ່ຄວາມຮູ້ຂອງເຮົາເຖິງພຣະກິດຕິຄຸນ ແລະ ຄວາມຮັກຂອງເຮົາທີ່ມີຕໍ່ພຣະບິດາເທິງສະຫວັນ ແລະ ພຣະຜູ້ຊ່ວຍໃຫ້ລອດຂອງເຮົາຈະປອບໂຍນ ແລະ ຄ້ຳຊູເຮົາ ແລະ ນຳຄວາມຊື່ນບານ ແລະ ຄວາມຊື່ນຊົມມາໃຫ້ຫົວໃຈຂອງເຮົາ ໃນຂະນະທີ່ເຮົາເດີນໄປຢ່າງທ່ຽງທຳ ແລະ ຮັກສາພຣະບັນຍັດ. ບໍ່ມີສິ່ງໃດຢູ່ໃນໂລກນີ້ ຈະສາມາດເອົາຊະນະເຮົາໄດ້.”7
ຕິດຕາມພຣະຜູ້ຊ່ວຍໃຫ້ລອດ
“ຜູ້ມີຄວາມໂສກເສົ້າ ແລະ ລຶ້ງເຄີຍກັບຄວາມທຸກທໍລະມານ ຄົນນີ້ເປັນໃຜ? ກະສັດແຫ່ງລັດສະໝີພາບ, ຈອມໂຍທາອົງນີ້ເປັນໃຜ? ພຣະອົງເປັນພຣະອາຈານຂອງເຮົາ. ພຣະອົງເປັນພຣະຜູ້ຊ່ວຍໃຫ້ລອດຂອງເຮົາ. ພຣະອົງເປັນພຣະບຸດຂອງພຣະເຈົ້າ. ພຣະອົງເປັນແຫລ່ງກຳເນີດແຫ່ງຄວາມລອດຂອງເຮົາ. ພຣະອົງບອກວ່າ, ‘ຈົ່ງຕາມເຮົາມາ.’ ພຣະອົງແນະນຳວ່າ, ‘ຈົ່ງໄປ, ແລະ ເຮັດເຊັ່ນດຽວກັນ.’ ພຣະອົງອ້ອນວອນວ່າ, ‘ຈົ່ງຮັກສາພຣະບັນຍັດຂອງເຮົາ.’
ຂໍໃຫ້ເຮົາຈົ່ງຕິດຕາມພຣະອົງໄປ. ຂໍໃຫ້ເຮົາຈົ່ງເຮັດຕາມແບບຢ່າງຂອງພຣະອົງ. ຂໍໃຫ້ເຮົາຈົ່ງເຊື່ອຟັງພຣະຄຳຂອງພຣະອົງ. ໂດຍການເຮັດເຊັ່ນນັ້ນ, ເຮົາຈະມອບຂອງຂວັນທີ່ສູງສົ່ງ ທີ່ເປັນຄວາມກະຕັນຍູໃຫ້ແກ່ພຣະອົງ.”8
© 2016 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/15. ການແປໄດ້ຮັບອະນຸຍາດ: 6/15. ແປຈາກ First Presidency Message, October 2016. Laotian. 12870 331
ການສອນຈາກຂ່າວສານນີ້
ປະທານມອນສັນສອນເຮົາເຖິງພອນຫລາຍຢ່າງ ທີ່ເຮົາສາມາດໄດ້ຮັບ ໂດຍການເປັນຄົນເຊື່ອຟັງ, ຮ່ວມທັງຄວາມເຂັ້ມແຂງ, ຄວາມຮູ້, ຄວາມສຸກ, ແລະ ຄວາມສະຫງົບ. ໃຫ້ຖາມຄົນທີ່ທ່ານສອນ ເຖິງວິທີທີ່ເຂົາເຈົ້າໄດ້ຮັບພອນ ໂດຍການຮັກສາພຣະບັນຍັດ. ທ່ານສາມາດຊຸກຍູ້ເຂົາເຈົ້າໃຫ້ຄິດເຖິງພອນຂອງເຂົາເຈົ້າຕໍ່ໄປ ແລະ ຂຽນຄວາມຄິດ ແລະ ປະສົບການເຫລົ່ານັ້ນ ໄວ້ໃນປຶ້ມບັນທຶກສ່ວນຕົວ. ທ່ານສາມາດຊຸກຍູ້ເຂົາເຈົ້າ ໃຫ້ສະແດງຄວາມກະຕັນຍູຕໍ່ພຣະເຈົ້ານຳອີກ ສຳລັບພອນຂອງເຂົາເຈົ້າ ໂດຍການເປັນຄົນເຊື່ອຟັງເລື້ອຍໄປ.