Etop eke First Presidency, Ofiong Duopekiet ke isua 2016
Ndino-ekom ke Usen Sabbath
Otode President Henry B. Eyring
Akpa Ono-item ke First Presidency
Sabbath edi usen ekom ye ima ono mbon Latter-day Saints.
Ndima ndito-eka mi irenowo ye iban emi edude eyoho ererimbot ke Ufok Abasi Jesus Christ eke mme Latter-day Saints, ami mmenem esit koro President Thomas S. Monson ama odoho ete yak ami nting-iko ke mbono usen Sabbath emi. Ami mbenge nte yak Edisana Spirit edida iko mmi esin ke esit mbufo.
Ami nyom nditing-iko mfin emi mbanga ekikere ekedude ke esit. Kiet eke ami nditingde-mbanga mfin emi edi—ndinyene esit-ekom akpan-akpan ke usen Sabbath.
Nnyin imeno ekom ke ediwak nkpo: mfon-ido otode esenowo, udia kini biong odongde nnyin, okom ndifuk nnyin kini ofim oyobio etibede, okpo emi obungode ke ndidoro, ye uyo-eyet eke nsekeyen emi amanade atuade. Ediwak nnyin iyeti nte inode ekom ke oruk ini ntem.
Oruk ini oro edi eti ini ono, eke mbon Latter-day Saints esitim ewut ekom ye ima Jehovah ama otot ikot Abasi ke Jackson County, Missouri, ke isua 1831 ete yak mmo ebong-akam ye ekom eno Abasi. Ema eno ikot Abasi eriyarare ke eset ebanga nte ekpekpemede usen Sabbath ye nte ekpetrede-udia enyung ebong-akam.1
Jehovah ama odoho mmo, ye nnyin danga nte ikpetuak-ibuot inyung ino ekom ke usen Sabbath. Nte mbufo ekemede nditing, se itim idi akpan-nkpo edi danga nte nnyin ikere-ibanga mme andino eno oro. Kop mme item Jehovah ke danga ikpeno ekom ye danga ikpeno ima ke usen Sabbath:
“Ami mmeno mmo ibet, nting ete; Afo eyema Jehovah Abasi fo ke ofuri esit fo, ke ofuri ukeme fo, ke ekikere, ye ke odudu; ndien afo enyene ndinam nkpo nno Enye ke enying Jesus Christ. …
“Afo enyene ndikom Jehovah Abasi fo ke kpukpru nkpo.
“Afo eyenam uwa edinen-ido eno Jehovah Abasi fo, kpa uwa mbungo esit ye edimem spirit.”2
Ndien ekem, Jehovah aka-iso ndikpan mbanga nditre ndima nnyung nkom Ete ke Enyong ye Jesus Christ nte mme andino eno oro ete: “iduhe nkpo ndomokiet eke owo eduede Abasi, mme eke obumere iyatesitEesie, ke-sioho mmo eke etrede ndikom Enye ke ofuri nkpo mfon Esie, nnyung ntre ndinim mbet Esie.”3
Ediwak mbufo emi ekopde ema ebebem iso ekop-inem usen Sabbath nte kedi usen ke nditi nnyung nno Abasi ekom ke mme edidiong Esie. Ke anyan-ini nnyin imesikwo ikwo emi nnyin itimde idiongo ete:
Kini uwem isong otode nnyin aka iso ye edem,
Kini nnyin ikopde mmem-idem, ikere ke kpukpru nkpo atak,
Bat ediwak edidiong fo; siak mmo kiet-kiet ke enying,
Ndien eyedu fi ke mkpaidem ke se Jehovah akanamde
Bat Mme Edidiong Mbufo
Siak mmo kiet-kiet ke enying.
Bat Mme Edidiong Mbufo
Kut se Abasi akanamde. …
Nte afo emekere abanga ndodobi mbiomo fo?
Nte nsongo-nkpo emi afo enyenede ndiyo ososong ono fi?
Bat ediwak edidong fo; ofuri eyighe eyefehe osop,
Ndien afo edikwo-ikwo ke nte usen ebede.4
Ami mmesibo leta ye edidise nto nti ikot Abasi emi ekopde edidobi mbiomo ke uwem. Ubak mmo ekpere ndikere ete, ke eke mmo, ke kpukpru nkpo atak. Ami mmenim nnyung mbenge yak se ami nditing anwam man eyighe ebe efep ndien ndikwo-ikwo otongo ke esit mbufo.
Edidiong kiet emi nnyin ikemede ndino ekom edi ke nnyin imedu do ke sacrament meeting oro, emi mbet ewakde ekan mbet Esie kiet mme iba eboho ke enying Esie. Odu ubak owo ke ufok emi mikemeke ndidaha-nda ke bed mmo. Odu ubak owo eke ekpemade ndidu ke ebiet emi nnyin idude edi mmo enam-utom ke ufokibok enyung ekpeme obio ye ndibem nnyin ke ndida afanikong nno uwem mmo ke desert ye odu-isong. Sia nnyin ikemede ndiboho ye eyen Abasi kiet nnyung ndia udia-Obong eyenwam nnyin nditongo ima nno Abasi ke mfonido Esie.
Oto ke Prophet Joseph Smith ye mfiak-nda-ndi iko Abasi, edidiong efen emi nnyin ikemede ndibat edi ke nnyin imenyene ufang ndidia udia-Obong kpukpru udua—emi mme enyene-unen isung-utom Abasi enamde, ediong, ndien edeme eno nnyin. Nnyin imekeme ndino ekom kini Edisana Spirit osongoke ono nnyin ete ke mme iko akam udia-Obong, emi enyene-unen akama itie-oku oro obongde, ke Ete nnyin ke Enyong okop.
Ke ofuri edidiong eemi nnyin ikemede ndibat, anditim mkpon-nkan edi ndibo mfen-nno emi edide ke nte nnyin idiade udia-Obong. Nnyin iyenyene akamba ima ye ekom ino Andinyanga, emi uwa ufak Esie anamde eyet idioknkpo nnyin esio. Nte nnyin ibuanade ke uyo ye mmong, nnyin iditi ete ke Enye okobo ndutuho ono nnyin. Ndien kini nnyin inode ekom ke se Enye akanamde ono nnyin, nnyin iyekop ima emi Enye enyenede ono nnyin ye ima emi nnyin inyenede ino Enye.
Edidiong ima emi nnyin ibode eyenam emem ono nnyin ke ndinim mbet man “iti Enye ke kpukpru ini.”5 Afo emekeme edikop ima ye ekom, nte ami nkopde, koro Edisana Spirit, emi Ete ke Enyong okonwongode eyedu ye nnyin kpukpru ini ke nte nnyin inimde ediomo emi nnyin ikanamde. Nnyin imekeme ndibat edidiong oro kpukpru usen Ederi inyung ino ekom.
Usen Sabbath edi eti ini nditi ediomo emi nnyin ikenamde ke itie uduok-mmong man ima inyung inwam ndito Abasi. Ndinam enwongo oro ekeme ndisine edibuana ke class ye eboho ke ofuri esit man osongo mbuotidem ye ima kotu ndito-eka irenowo ye iban emi edude ye nnyin do. Enwongo oro eyesine ndinem-esit nnam ikoot nnyin.
Ami mmenem esit ke mme ediwak usen Ederi eke mi nkekpebde eboho eke deacon ke Bountiful, Utah, ye class eke Sunday School ke Idaho. Ndien ami edikem mmeti ini eke ami nkenwamde nnwan-ndo mi nte udiana andikpeb ke nursery, emi akpan utom mi ekesidide ndideme mkpo-mbre nnyung ntang mmo nnim.
Ekedi ediwak isua mbemiso ami ndifiok nto Spirit nte ke mmem-mmem utom emi nnamde nno Abasi enyene-ufon ke uwem ndito eke Ete ke Enyong. Ke mkpaidem mi, ubak mmo editi ke ediwak isua mme mkpri ukeme mi ke ndinwam mmo nno Andikpeb ke mme usen Sabbath oro.
Ukem nte nnyin isiwakde nditre ndikut iboro ke utom emi nnyin inode ke usen Sabbath, nnyin idikemeke ndikut ofuri iboro eke isungutom Abasi efen. Edi Jehovah ke obop obio-ubong Esie sung-sung oto nti ye osuhore-idem isungutom Esie, ye ekpri ntot, kabanga ubong uyoho ini-iso Esie. Oro oyom Edisana Spirit man ekut uyai Esie.
Ami nkekori ke ndika sacrament meetings ke ekpri nkok New Jersey emi esisit ibat mbon ufok Abasi ye ufokemana kiet ekedude, ekedi eke mi. Ke isua Ata-ye-efut emi ekebede, ami nkeduok-mmong ke nkokure-ufok Abasi emi ekebopde ke Pennsylvania ye New Jersey. Edi ebiet emi ekpri nkok ufok Abasi okodude ke Princeton, New Jersey, akamba wards iba odu do mfin emi. Ndien ke mme usen ifang emi ebede, mme tosin iwaad ekenam usoro mbemiso edidiong Temple ke Philadelphia Pennsylvania.
Ini emi nkedide akparawa, ema ekot mi nte district missionary ke ebiet emi nnyin ikesikade Ederi ke nkokure ufok Abasi emi okodude Albuquerque, New Mexico. Temple kiet ye stake inang odu do mfin emi.
Ami mma mkpong Albuquerque man nka ufoknwed ke Cambridge, Massachusetts. Ufok Abasi kiet ye district kiet okodu do ke ofuri Massachusetts ye Rhode Island. Ami nkesiwat ke mme obot eke ediye idut oro nka sacrament meeting eke mkpri nkok ufok Abasi, ediwak odude ke mkpri ufok emi ekpede-kpe okuk ye ekpri ufok emi efiakde ediong. Idahaemi edisana temple Abasi odu do ke Belmont, Massachusetts, ndien mme stakes odu oyoho isong idung oro.
Nkpo se ami mme nkekutke ofon idahaoro ekedi ke Jehovah ama anwan-ga Spirit Esie oduok mme owo ke mme mkpri sacrament meetings oro. Ami mma nkeme ndikop oro, edi ami nkekutke nte awakde ye edikem-ini uduak Abasi ke ndikop nnyung mmenede obio-ubong Esie. Prophet kiet, oto ke eriyarare, ama okut onyung ewet nkpo se nnyin ikemede ndise nnyung nkut nno idem nnyin. Nephi odoho ete ke akpakip ibat mbon nnyin idiwakke, edi eti ndaha odudu oro edi-di inem nkpo ndikut ete:
“Ndien ekedikem ami nkokut ufok Abasi eke Eyen-erong Abasi, ndien ibat esie ekedi esisit. …
Ndien ekedikem ami, Nephi nkokut odudu eke Eyen-erong Abasi nte oro okosuhorede edidori ndisana mbon ufok Abasi eke Eyen-erong ke idem, ye mbon ediomo eke Abasi, emi ekesuanade ke ofuri iso isong, ndien mmo ekeyoho ye edinen-ido ye odudu Abasi ke akwa ubong.”6
Ke eyo emi, ema ewet ukem editing-nwut iko prophet oro kabanga ndaha nnyin ye ifet emi odude ke nwed Doctrine ye Covenants ete:
“Mbufo itimke ifiok adanga akamba edidiong emi Ete enyenede ke ubok Esie emi ekenimde eno mbufo;
“Ndien idahaemi mbufo ikemeke ndiyo ofuri nkpo; nte ededi, esong esit, koro Ami nyeda mbufo usung nka. Obio-ubong edi eke mbufo ndien mme edidiong ekedude do edi eke mbufo, ndien inyene nsinsi edi eke mbufo.
Ndien owo eke obode kpukpru nkpo ye oyoho-ekom eyenam enye ada-ubong; ndien eyedian nti-nkpo isong emi eno enye, ke itie ikie, ihn, ediwak.”7
Ami mmekop edikpuho oro ke ndino ekom mbanga mme edidiong ye ima Abasi ndiwak nyoho ufok Abasi. Oro awak nditibe kotu mbon ufok Abasi kini ye ebiet emi edomode mbuotidem mmo, ebiet emi anade mmo ekpe Abasi ubok eyom unwam man eka-iso enam ofon.
Ini eke nnyin idude mi enyene mkposong idomo ke idem mmo ke ukem usung nte ekedide ono mbon Alma emi okodude ke-idak Amulon, owo-ibak, emi akanamde mbiomo mmo odobi akan nte mmo ekpekemede ndiyo:
“Ndien ekedikem uyo Jehovah edi etiene mmo ke itie ukut mmo ete: Emenede ibuot mbufo ke enyong enyung ebo ndongesit, koro Ami mmediongo ediomo emi mbufo ekanamde eno Mi; ndien Ami nyediomo ye ikot Mi nnyung ntat mmo nsio ke ufin.
“Ndien Ami nyenam mbiomo mmo efere emi ekedoride ke afara mbufo, mbak mbufo edikop udobi mmo ke idem mbufo, kpa ke nte edude ke ufin; ndien Ami ndinam oro man mbufo edida nte ntiense eno Mi ke emi ebede, man mbufo edidiongo ete ke Ami, Jehovah Abasi, mma ndise ikot Mi ke itie ukut mmo.
“Ndien idahaemi ekedikem nte ke ema enam mbiomo emi ekedoride Alma ye ndito-ete esie efere; ihn, Jehovah ama osongo mmo idem man mmo edikeme ndimen mbiomo ye emem, ndien mmo ekeyak idem mmo ke inemesit ye ime eno ofuri uduak Abasi.”8
Ami ye afo idi ntiense ete ke ini ekededi emi nnyin ikenimde mbet Abasi, akpan-akpan kini mbet oro osongde, Enye ama okop akam ekom nnyin ye se Enye ama ekebem-iso anam ono nnyin onyung oboro akam nnyin ono nsongo-nda ke nditim nyo. Ndien Enye anam mbufo ekop-inem enyung enyene osongo ekan kini kiet.
Mbufo emekeme nditim nkere se mbufo ekpenamde man edu-uwem enyung etuak-ibuot ke usen Sabbath emi man ewut ekom mbufo enyung esongo idem mbufo ye mbon efen ke mme idomo emi odude ke iso.
Mbufo emekeme nditongo ye akam-ekom ke idem mbufo ye ke ufokemana ke se Abasi akanamde ono mbufo. Mbufo emekeme ndibong-akam man ediongo se Jehovah oyomde ete mbufo enam man enwam Enye ye mbon efen. Akpan-akpan, mbufo emekeme ndibong-akam man enyene Edisana Spirit editeme mbufo abanga owo eke odude ke ndobi-ikpong mme unana emi Abasi oyomde ete mbufo eka ekenwam.
Ami mmenwongo nte ke eyeboro akam mbufo, ndien nte mbufo enamde nkpo ke iboro emi mbufo ebode, mbufo eyekut idaresit ke usen Sabbath, ndien esit mbufo eyeyoho ye ekom oduoi.
Ami nno iko ntiense nte ke Abasi Ete odiongo onyung ama mbufo. Andinyanga, Obong Jesus Christ, okosio-isop ke ntak idioknkpo mbufo oto ke ima emi Enye amade mbufo. Mmo, Ete ye Eyen ediongo enying mbufo ukem nte Mmo ekediongoke enying Prophet Joseph Smith kini Mmo ekewutde enye idem. Ami nno iko ntiense nte kemi edi ufok Abasi Jesus Christ ndien ke Enye eyekpono ediomo emi mbufo ekenamde onyung afiak anam obufa ye Abasi. Uduot-obot mbufo eyekpuho man ekabare ebiet Andinyanga. Mbufo eyebo osongo ekan idomo ye ekikere eyighe kabanga akpaniko. Mbufo eyekut idaresit emi odude ke usen Sabbath. Ami nting iko ntiense nte kemi edi akpaniko ke enying Obong Jesus Christ, amen.
© 2016 eketode Intellectual Reserve, Inc. Ekpan kpukpru unen ndiming nwed emi. Ekeming ke USA. Enyime edikabare ke Iko Mbakara: 6/16. Enyime edikabarel: 6/16. Edikabare Etop eke First Presidency Message, November 2016. Efik. 12871 553