Mensahe sang Unang Panguluhan, Nobyembre 2016
Kapasalamatan sa Adlaw sang Pagsimba
Ni Pangulong Henry B. Eyring
Unang Manuglaygay sa Unang Panguluhan
Para sa mga Santos sa Ulihing mga Adlaw, ang Adlaw sang Pagsimba adlaw sang kapasalamatan kag gugma.
Pinalangga kong mga kauturan nga yara sa nagkalain-lain nga bahin sang kalibutan sa Ang Simbahan ni Jesucristo sang mga Santos sa Ulihing mga Adlaw, nagapasalamat ako nga ginpangabay ako ni Pangulong Thomas S. Monson nga maghambal sa komperensya sa sining Adlaw sang Pagsimba. Nagapangamuyo ako nga ang Balaan nga Espiritu magadala sang akon mga pulong sa inyo tagipusuon.
Karon luyag ko maghambal parte sa mga balatyagon sang akon tagipusuon. Ang akon tutukan amo ang kapasalamatan—ilabi na sa Adlaw sang Pagsimba.
Nagabatyag kita sang kapasalamatan para sa madamo nga mga butang: kaluoy halin sa isa ka estranghero, kalan-on kon ginagutom kita, palasilungan sa tion sang bagyo, nabali nga tul-an nga nagaayo, kag ang mapagros nga paghibi sang bag-ong tawo nga lapsag. Madamo sa aton ang makadumdum sang pagbatyag sang kapasalamatan sa sinang mga tinion.
Para sa mga Santos sa Ulihing mga Adlaw, ang Adlaw sang Pagsimba amo sina nga tion, sa pagkamatuod, adlaw, sang kapasalamatan kag gugma. Ang Ginuo nagpanulin sa mga Santos sa Jackson County, Missouri, sang 1831 nga ang ila mga pangamuyo kag pagpasalamat kinahanglan ipatuhoy palangit. Ang una nga mga Santos ginhatagan sang rebelasyon parte sa kon paano tipigan ang Adlaw sang Pagsimba kag kon paano magpuasa kag magpangamuyo.1
Sila, kag kita, ginhambalan sang Ginuo kon paano magsimba kag magpasalamat sa Adlaw sang Pagsimba. Sa inyo nahibal-an, ang importante sa tanan amo ang gugma nga aton ginabatyag para sa mga manughatag sang mga regalo. Ari ang mga pulong sang Ginuo kon paano magpasalamat kag kon paano maghigugma sa Adlaw sang Pagsimba:
“Ginahatagan ko sila sang kasuguan, nga nagasiling: Higugmaon mo ang Ginuo nga imo Dios sa bug-os mo nga tagipusuon, bug-os mo nga ikasarang, hunahuna, kag kusog; kag sa ngalan ni Jesucristo imo sia alagaran. …
“Magpasalamat ka sa Ginuo nga imo Dios sa tanan nga mga butang.
“Maghatag ka sang halad sa Ginuo nga imo Dios sa pagkamatarong, nga amo ang masinulub-on nga tagipusuon kag mahinulsulon nga espiritu.”2
Kag dayon ang Ginuo nagpadayon sa pagpaandam sang peligro kon indi kita magpasalamat sa Amay nga Langitnon kag kay Jesucristo bilang mga manughatag sang mga regalo: “Kag wala sa bisan ano nga paagi nga ang tawo makasaklaw sa Dios, ukon magadabok sang iya kaakig, magluwas sinang wala nagaako sang iya paghikot sa tanan nga mga butang kag wala nagatuman sang iya mga kasuguan.”3
Madamo sa inyo nga nagapamati ang nakasalapo na sang kalipay sa Adlaw sang Pagsimba bilang adlaw sa pagdumdum kag pagpasalamat sa Dios para sa mga bugay. Madumduman ninyo ang kilala nga kanta:
Kon sa balod sang kabuhi ginahampas ka,
Kon ang pag-asa nagakadula na,
Isipa’ng mga bugay; isa-isaha,
Sa Iya kaayo matingala ka.
Bugay, isipa;
Isa-isaha.
Bugay isipa;
Tamda ang ginhimo Niya. …
Sa problema ginabudlayan ka bala?
Sa krus nga ginapas-an ginabug-atan ka?
Isipa’ng mga bugay, duda madula
Kag sa adlaw-adlaw magakanta ka.4
Nagabaton ako sang mga sulat kag pagbisita halin sa tampad nga mga Santos sa Ulihing mga Adlaw nga nabug-atan sang ginapas-an nga mga problema. Ang iban malapit na lang sa pamatyagan nga, para sa ila, nadula na ang tanan. Nagalaum ako kag nagapangamuyo nga ang ihambal ko parte sa kapasalamatan sa Adlaw sang Pagsimba makabulig sa pagtabog sang mga pagpangduhaduha kag sa pagsugod sang pagkanta sa inyo mga tagipusuon.
Isa sang mga bugay nga mahimo kita magpasalamat amo nga ara kita sa sinang pangsakramento nga miting, nga nagatipon upod ang masobra sa isa ukon duha sang Iya mga disipulo sa Iya ngalan. May ara sang iban sa ila balay nga indi makabangon sa ila mga hiligdaan. May ara sang iban nga luyag mangin yara sa kon diin kita pero sa baylo nagaalagad sa mga ospital kag nagatipig sang kaluwasan sang pumuluyo ukon nagapangapin sa aton wala sapayan sang peligro sa ila kaugalingon nga mga kabuhi sa kon diin nga disyerto ukon kagulangan. Ang kamatuoran nga sarang kita magtipon upod ang bisan isa pa ka Santos kag mag-ambit sang sakramento makabulig sa aton nga magsugod sa pagbatyag sang kapasalamatan kag gugma para sa kaayo sang Dios.
Tungod kay Propetang Joseph Smith kag sa ginpanumbalik nga ebanghelyo, isa pa gid ka bugay nga mahimo naton isipon amo nga may oportunidad kita nga mag-ambit sang sakramento kada semana—nga ginahanda, ginabendisyunan, kag ginapanagtag sang mga awtorisado nga mga alagad sang Dios. Mahimo kita mangin mapasalamaton kon ang Balaan nga Espiritu nagapamatuod sa aton nga ang mga pulong sa pangsakramento nga mga pangamuyo, nga ginahatag sang awtorisado nga mga nagakapot sang priesthood, ginapamatian sang aton Amay nga Langitnon.
Sa tanan nga mga bugay nga aton maisip, ang pinakadaku sa tanan amo ang balatyagon sang pagpatawad nga nagaupod sa aton pag-ambit sang sakramento. Makabatyag kita sang mas daku nga gugma kag pagdayaw para sa Manluluwas, nga paagi sa iya wala’y katapusan nga sakripisyo nangin posible nga matinloan kita sang aton mga sala. Sa aton pag-ambit sang tinapay kag tubig, madumduman naton nga nag-antos Sia para sa aton. Kag kon magbatyag kita sang kapasalamatan para sa Iya ginihimo sa aton, makabatyag kita sang Iya gugma para sa aton kag sang aton gugma para sa Iya.
Ang bugay sang gugma nga aton ginabaton magapahapos sang aton pagtuman sang kasuguan nga “dalayon nga magdumdum sa iya.”5 Mahimo gani kamo magbatyag sang gugma kag kapasalamatan, pareho sa akon, para sa Balaan nga Espiritu, nga ginpromisa sang Amay nga Langitnon nga mangin kaupod naton pirme samtang nagatinguha kita nga mangin tampad sa mga kasugtanan nga aton ginhimo. Mahimo naton isipon ang tanan sinang mga bugay kada Domingo kag magbatyag sang kapasalamatan.
Ang Adlaw sang Pagsimba perpekto man nga tion agud dumdumon ang kasugtanan nga aton ginhimo sa bunyag nga higugmaon kag alagaran ang mga anak sang Amay nga Langitnon. Ang pagtuman sinang promisa sa Adlaw sang Pagsimba magalakip sang pagpartisipar sa klase ukon korum nga may bug-os nga katuyuan sang tagipusuon sa pagpatubo sang pagtuo kag gugma sa aton mga kauturan nga kaupod naton dira. Inang promisa magalakip sang pagtuman sang aton mga palangakuan sa simbahan sing masinadyahon.
Nagapasalamat ako sa madamo nga mga Domingo nga nagtudlo ako sa isa ka korum sang mga deacon sa Bountiful, Utah, kag amo man sa isa ka klase sa Sunday School sa Idaho. Kag madumduman ko pa ang mga tiyempo nga nag-alagad ako bilang kabulig sang akon asawa sa nursery, sa diin ang akon mayor nga buluhaton amo ang managtag sang mga hampanganan kag manghimos sang mga ini.
Tinuig ang nagligad antes ko nahibaloan paagi sa Espiritu nga ang akon simple nga pag-alagad para sa Ginuo importante sa mga kabuhi sang mga anak sang Amay nga Langitnon. Sa wala ko ginapaabot, ang pila sa ila nakadumdum kag nagpasalamat sa akon sa panugod ko nga mga pagtinguha nga mag-alagad sa ila para sa Manunudlo sadtong mga Adlaw sang Pagsimba.
Pareho nga kon kaisa indi naton makita ang mga resulta sang aton kaugalingon nga mga pag-alagad sa Adlaw sang Pagsimba, indi man naton makita ang tingob nga epekto [sang pagserbisyo] sang iban nga mga alagad sang Ginuo. Pero ang Ginuo nagapasad sang Iya ginharian sing malinong paagi sa Iya tampad kag mapainubuson nga mga alagad, nga wala nagapasundayag, pakadto sa iya sini mahimayaon nga palaabuton sa milenya. Ginakinahanglan ang Balaan nga Espiritu agud makita ang nagatubo sini nga kahimayaan.
Nagdaku ako nga nagatambong sang pangsakramento nga mga miting sa isa ka magamay mga branch sa New Jersey nga may pila lang ka mga miyembro kag isa ka pamilya, nga amo ang akon. Setenta’y singko ka tuig ang nagligad, ginbunyagan ako sa Philadelphia sa nagaisahanon nga kapilya nga ginpatindog sang Simbahan nga makita sa Pennsylvania ukon New Jersey. Pero sa diin nga may isa lang ka magamay nga branch sa Princeton, New Jersey sang una, karon may duha na ka dalagku nga mga ward. Kag mga pila pa lang ka adlaw ang nagligad, linibo ka mga lamharon ang nagpasundayag sa isa ka selebrasyon antes sang paghalad sang Templo sa Philadelphia Pennsylvania.
Sang lamharon pa ako, gintawag ako bilang district missionary sa diin nagasimba kami kon Domingo sa nagaisahanon nga kapilya sa Albuquerque, New Mexico. Karon, may templo na kag apat ka mga stake.
Nagbiya ako sa Albuquerque agud mag-eskwela sa Cambridge, Massachusetts. May isa lang ka kapilya kag isa ka district nga nagasakop sang daku nga bahin sang Massachusetts kag Rhode Island. Nagmaneho ako sa mga bungyod sinang matahum nga lugar pakadto sa mga sacrament meeting sa magagmay nga mga branch, kalabanan sa magagmay nga ginrentahan nga mga pasilidad ukon magagmay nga ginliwat nga mga balay. Karon may isa na ka sagrado nga templo sang Dios sa Belmont, Massachusetts, kag mga stake sa palibot sang lugar.
Ang indi ko makita sing maathag sadto amo nga ang Ginuo nagbubo sang Iya Espiritu sa mga tawo sa sadtong magagmay nga mga sacrament meeting. Mabatyagan ko ini, pero indi ko makita ang kalaparon kag ang nagakaigo nga tiyempo sang mga katuyuan sang Ginuo sa pagpasad kag paghimaya sang Iya ginharian. Isa ka propeta, paagi sa rebelasyon, ang nakakita kag nagsulat sang kon ano ang makita naton mismo sa karon. Si Nefi nagsiling nga ang aton kadamuon indi mangin tuman kadaku pero ang natingob nga kasanag sini mangin talalupangdon.
“Kag natabo ini, nga nakita ko ang simbahan sang Cordero sang Dios, kag diutay lang ang kadamuon sini. …
“Kag natabo ini, nga ako, si Nefi, nakakita sang gahum sang Cordero sang Dios, nga nagpanaog ini sa mga santos sang simbahan sang Cordero, kag sa katawhan sang kasugtanan sang Ginuo, nga nag-alaplaag sa bug-os nga kadaygan sang duta; kag ang ila hinganiban amo ang pagkamatarong kag kaupod ang gahum sang Dios sa dako nga himaya.”6
Sa sining dispensasyon, isa ka kapareho nga paglaragway sang isa ka propeta sang aton kahimtangan kag mga oportunidad sa palaabuton ang nasulat sa Doctrine and Covenants:
“Wala pa kamo nakahangop kon ano kadalagko sang mga bugay nga yara sa mga kamot mismo sang Amay kag nahanda para sa inyo;
“Kag indi ninyo mabatas ang tanan nga mga butang sa karon; wala’y sapayan, magkalipay, kay tuytuyan ko kamo. Ang ginharian inyo kag ang mga bugay sini inyo, kag ang mga manggad sang kabuhi nga wala’y katapusan inyo.
“Kag sia nga nagabaton sang tanan nga mga butang nga may pagpasalamat pagahimayaon; kag ang tanan nga mga butang sa sining kalibutan igadugang sa iya, bisan pa isa ka gatus ka beses, huo, masobra pa.”7
Nabatyagan ko inang pagbag-o sang nagatubo nga kapasalamatan para sa mga bugay kag paghigugma sa Dios nga nagadugang sa bilog nga Simbahan. Daw mas madasig ini sa mga miyembro sang Simbahan sa tinion kag mga lugar sa diin ginatilawan ang ila pagtuo, nga sa diin kinahanglan nila mag-ampo sa Dios para sa bulig bisan lang sa pagpadayon.
Ang mga panahon nga aton agyan may mabudlay nga mga pagtilaw, pareho sa katawhan ni Alma sa idalom sang mapintas nga si Amulon, nga nagbutang sang mga palas-anon sa ila mga abaga nga tuman kabug-at para sa ila nga dalhon:
“Kag natabo ini nga ang tingug sang Ginuo nag-abot sa ila sa ila mga kapipit-an, nga nagasiling: Ibayaw ang inyo mga ulo kag magmangin malipayon, kay nahibal-an ko ang kasugtanan nga inyo ginhimo sa akon; kag magapakighisugot ako sa akon katawhan kag hilwayon ko sila gikan sa pagkaulipon.
“Kag pahapuson ko man ang mga lulan nga ginbutang sa inyo mga abaga, nga bisan indi gani ninyo mabatyagan ang mga ini sa inyo mga likod, bisan samtang yara kamo sa pagkaulipon; kag ini akon pagahimuon agud nga mahimo kamo nga magtindog bilang mga saksi para sa akon pagkatapos sini, kag nga mahimo ninyo nga mahibal-an sing pat-od nga ako, ang Ginuong Dios, nagaduaw sa akon katawhan sa ila mga kapipit-an.
“Kag karon natabo ini nga ang mga lulan nga ginpahamtang kanday Alma kag sa iya mga kauturan ginhimo nga mamag-an; huo, ginpakusog sila sang Ginuo agud nga madala nila ang ila mga lulan sing mahapos, kag nagpaidalom sila sing masinadyahon kag may pagpaumod sa tanan nga kabubut-on sang Ginuo.”8
Kamo kag ako mga saksi nga sa tagsa ka tion nga ginatuman naton ang aton mga kasugtanan sa Dios, ilabi na kon ini mabudlay, ginapamatian Niya ang mga pangamuyo naton sang pagpasalamat sa Iya mga nahimo na sa aton kag nagsabat sang aton mga pangamuyo para sa kabakod agud magpadayon sing tampad. Kag sobra sa makaisa nga ginhimo Niya kita nga malipayon kag subong man nga mabakod.
Ayhan nagapamangkot kamo kon ano ang inyo sarang mahimo sa pagpangabuhi kag pagsimba sa sining Adlaw sang Pagsimba agud ipakita ang inyo kapasalamatan kag pabakuron ang inyo kaugalingon kag ang iban nga mga tawo para sa mga pagtilaw nga magaabot.
Mahimo kamo magsugod sini nga adlaw sa pangamuyo sang pagpasalamat nga nagaisahanon kag upod sa pamilya para sa tanan nga nahimo sang Dios para sa inyo. Mahimo kamo magpangamuyo agud mahibaloan kon ano ang luyag sang Ginuo nga himuon ninyo agud alagaran Sia kag ang iban nga mga tawo. Labaw sa tanan, mahimo kamo magpangamuyo sa pag-angkon sang Balaan nga Espiritu nga magtudlo sa inyo sa iban nga nagaisahanon ukon nagakinahanglan nga sa diin luyag sang Ginuo nga inyo kadtuan.
Makapromisa ako sa inyo nga ang inyo mga pangamuyo pagasabton, kag sa inyo pag-akto sa mga sabat nga inyo mabaton, masalapuan ninyo ang kalipay sa Adlaw sang Pagsimba, kag ang inyo tagipusuon magaalalawas sa kapasalamatan.
Nagasaksi ako nga ang Dios nga Amay nakakilala kag nagahigugma sa inyo. Ang Manluluwas, ang Ginuong Jesucristo, nagpasag-uli para sa inyo mga sala tungod sang paghigugma sa inyo. Sila, ang Amay kag ang Anak, nakahibalo sang inyo ngalan pareho nga nahibaloan Nila ang ngalan sang Propetang si Joseph Smith sang nagpakita Sila sa iya. Nagasaksi ako nga ini ang Simbahan ni Jesucristo kag nga Iya tahuron ang mga kasugtanan nga inyo ginhimo kag ginbag-o upod sa Dios. Ang inyo kinaiya magabag-o agud mangin mas pareho kamo sa Manluluwas. Pagapabakuron kamo batok sa mga tentasyon kag batok sa mga balatyagon sang pagpangduha-duha sa kamatuoran. Makasalapo kamo sang kalipay sa Adlaw sang Pagsimba. Ini ginapromisa ko sa inyo sa ngalan sang Ginuong Jesucristo, amen.
© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang First Presidency Message, November 2016. Hiligaynon. 12871 861