Mensahe sa Visiting Teaching, Nobyembre 2016

Ang Perpekto nga Dalan sa Kalipayan

Ni Pangulong Thomas S. Monson

Nagasaksi ako sang daku nga regalo ang amo ang plano sang aton Amay para sa aton. Ini amo ang nagaisahanon kag perpekto nga dalan padulong sa paghidaet kag kalipayan.

Pinalangga kong mga kauturan, alangay diri sa Conference Center kag sa bilog nga kalibutan, nagapasalamat ako sang daku sa oportunidad nga magpaambit sang akon mga panghunahuna sa inyo sini nga aga.

Singkwenta’y dos ka tuig ang nagligad, sang Hulyo 1964, may ulobrahon ako sa New York City sang tiyempo nga ang World’s Fair ginhiwat didto. Temprano pa sang isa ka aga, nagbisita ako sa Mormon Pavilion sa kahiwatan. Nag-abot ako antes gid lang sang pagsalida sang palagwaon sang Simbahan nga Man’s Search for Happiness, nga isa ka paglaragway sang plano sang kaluwasan nga sumugod sadto nangin isa ka klasiko sang Simbahan. Nagpungko ako sa tupad sang isa ka lamharon nga lalaki nga mga 35 anyos ang pangidaron. Nagsugilanon kami sing makadali. Indi sia miyembro sang aton Simbahan. Dayon nagdulom ang mga suga, kag ang palagwaon nagsugod.

Nagpamati kami sa tingog sang manugsaysay sang iya ginpresentar ang makatalandog nga mga palamangkutanon sang tanan nga katawhan: “Sa diin ako naghalin?” Ngaa ari ako diri? “Sa diin ako makadto pagkatapos sining kabuhi?” Ang tanan nga mga dulunggan nakatuon sa pagpamati sang mga sabat, kag ang tanan nga mga mata nagatamod sa mga imahen nga ginapakita. Isa ka paglaragway sang aton kabuhi antes sa duta ang ginhatag, upod ang pagpaathag sang aton katuyuan sa kalibutan. Nasaksihan namon ang makatalandog nga pagpakita sang pagtaliwan gikan sa sini nga kabuhi sang isa ka tigulang nga lolo kag ang iya mahimayaon nga pagpakig-upod liwat sa mga pinalangga nga nag-una sa iya sa kalibutan sang mga espiritu.

Sa katapusan sining matahum nga paglaragway sang plano sang aton Amay nga Langitnon para sa aton, ang mga tawo mahipos nga nagpila paggwa, nga ang madamo hilmunon nga natandog sang mensahe sang palagwaon. Ang lamharon nga bisita sa tupad nakon wala nagtindog. Ginapamangkot ko sia kon nanamian sia sang palagwaon. Ang iya pat-od nga sabat: “Amo ini ang kamatuoran!”

Ang plano sang aton Amay para sa aton kalipayan kag kaluwasan ginapaambit sang mga misyonero sa bilog nga kalibutan. Indi ang tanan nga makabati sining diosnon nga mensahe nagapati kag nagabaton sini. Pero, ang mga tawo sa bisan diin, pareho sang akon lamharon nga abyan sa New York World’s Fair, nakakilala sang mga kamatuoran sini, kag ginapahamtang nila ang ila mga tiil sa dalan nga magadala sa ila sa pagpauli sing luwas. Ang ila mga kabuhi mabag-o sing dalayon.

Importante gid sa plano amo ang aton Manluluwas, nga si Jesucristo. Kon wala ang Iya nagapasag-uli nga sakripisyo, ang tanan madula. Indi supisyente, ugaling, ang magpati lang sa Iya kag Iya misyon. Kinahanglan naton mag-obra kag magtuon, magpangita kag magpangamuyo, maghinulsol kag mangin mas maayo. Kinahanglan naton mahibaloan ang mga layi sang Dios kag ipangabuhi ang mga ini. Kinahanglan naton nga mabaton ang Iya nagaluwas nga mga ordinansa. Sa paghimo lang gid sini nga maangkon naton ang matuod, wala’y katapusan nga kalipayan.

Bulahan kita nga naagom naton ang kamatuoran. May mando sa aton nga ipaambit ang kamatuoran. Aton ipangabuhi ang kamatuoran, agud nga mangin takos kita para sa tanan nga gintigana sang Amay para sa aton. Wala Sia sang iban nga ginahimo magluwas sang para sa aton kaayuhan. Nagsiling Sia sa aton, “Ini ang akon hilimuon kag himaya—ang pagpahanabo sang imortalidad kag wala’y katapusan nga kabuhi sang tawo.”¹

Halin sa kadadalman sang akon kalag kag sa bug-os nga pagkamapainubuson, nagasaksi ako sa dakung regalo nga amo ang plano sang Amay para sa aton. Ini ang nagaisahanon nga dalan pakadto sa paghidaet kag kalipayan alangay diri kag sa kalibutan nga magaabot.

Mga kauturan, ginabilin ko sa inyo ang akon gugma kag akon pagpakamaayo sa akon pagtakop, kag ginahimo ko ini sa ngalan sang aton Manluluwas kag Manunubos nga si Jesucristo, amen.

© 2016 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 6/16. Petsa sang pagtugot sa paglubad: 6/16. Paglubad sang Visiting Teaching Message, November 2016. Hiligaynon. 12871 861