Mensahe ti Umuna a Panguluen, Nobiembre 2016
Panagyaman iti Aldaw ti Sabbath
Ni Presidente Henry B. Eyring
Umuna a Mammagbaga iti Umuna a Panguluen
Para kadagiti Santo iti Ud-udina nga Aldaw, ti Sabbath ket maysa nga aldaw ti panagyaman ken ayat.
Kakabsatko nga agnanaed iti nadumaduma a lugar ti lubong iti Ti Simbaan ni Jesucristo dagiti Santo iti Ud-udina nga Aldaw, agyamanak ta kiniddaw ni Presidente Thomas S. Monson nga agsaritaak iti komperensia maipapan itoy aldaw ti Sabbath. Ikararagko a sapay koma ta tulongannakayo ti Espiritu Santo a mangipaawat kadakayo ti kinapateg ken kinapudno dagiti balikasko.
Ita tarigagayak ti agsarita maipapan dagiti karirikna ti puso. Maipapan ti panagyaman ti pangipamaysaak iti pasnekko—nangnagruna iti aldaw ti Sabbath.
Pagyamanantayo ti adu a banag: kinasayaat ti maysa a ganggannaet, taraon a kanentayo no mabisintayo, namaga nga atep a paglinongantayo no adda bagyo, ti naimbagan a natukkol a tulang, ken ti napigsa a sangit ti kaippasngay a maladaga. Adu kadatayo ti manglagip iti pannakarikna iti panagyaman kadagiti kasta a kanito.
Para kadagiti Santo iti Ud-udina nga Aldaw, ti Sabbath ti kasta a maysa a kanito, kinapudnona maysa nga aldaw ti panagyaman ken ayat. Binilin ti Apo dagiti Santo iti Jackson County, Missouri, idi 1831 a nasken a maiturong iti Dios dagiti kararag ken panagyamanda. Naikkan iti paltiing dagiti nagkauna a Santo maipapan ti no kasano ti agtungpal iti Sabbath ken no kasano ti agayuno ken agkararag.1
Imbaga ti Apo kadakuada ken kadakami no kasano ti agdaydayaw ken agyaman iti Sabbath. Kas iti maibagayo, ti kapatgan ket ti ayat a mariknatayo kadagiti mangmangted kadagiti sagut. Dagitoy dagiti balikas ti Apo maipanggep no kasano ti agyaman ken no kasano ti agayat iti Sabbath:
“Gapuna, itedko kadakuada ti bilin, a kastoy ti kunak: Ayatenyo ti Apo a Diosyo, iti amin a pusoyo, iti amin a kabaelan, panunot, ken pigsayo; ket iti nagan ni Jesucristo pagserbianyo. …
“Agyamankayo iti Apo a Diosyo iti amin a banag.
“Mangidatonkayo iti sakripisio iti Apo a Diosyo iti kinalinteg, a kas iti dayta nasneban a puso ken napnuan babawi nga espiritu.”2
Ket kalpasanna intultuloy ti Apo nga imballaag ti pannakapaay no maliwayantayo ti agyaman iti Nailangitan nga Ama ken Jesucristo kas mangmangted kadagiti sagut: “Ket awan ti pagbasolan ti tao iti Dios, wenno awan ti pakaaronan ti pungtotna, malaksid kadagiti saan a mangipudno iti imana iti amin a banag, ken dagiti di agtungpal iti bilinna.”3
Adu kadakayo a dumdumngeg ti nakasaraken iti rag-o iti Sabbath kas maysa nga aldaw tapno manglagip ken agyaman iti Dios kadagiti bendisionna. Lagipenyo ti pamiliar a kanta:
No napnuan ladingit ti panagbiagyo,
Panagkunayon awan namnamayo,
Bilangen saggaysa ti paraburyo,
Ket masdaawkay’ inted Dios kaniayo.
Bilangenyo
Ti paraburyo.
Bilangenyo
’Nted Dios kaniayo. …
Mariknayo kad’ ti pannakadagsen?
Di kabaelanen kad’ a baklayen?
Bilangenyo adu a paraburyo,
Ket mapukawto amin a duaduayo.4
Immawatak kadagiti surat ken panagbisita dagiti napudno a Santo iti Ud-udina nga Aldaw a makarikna iti dagensen iti problemada. Adda dagiti dumani makarikna a, para kadakuada, napukawen ti amin. Sapay koma ta no ania ti kunak maipapan ti panagbalin a managyaman iti Sabbath ket makatulong a maawan dagiti duadua ken mangrugi ti panagkanta iti pusoyo.
Maysa a bendision a pagyamantayo ket ti kaaddatayo amin iti miting ti sakramento, nagguummong a kaduatayo ti ad-adu pay ngem maysa wenno dua kadagiti disipulona iti naganna. Sumagmamano dagiti adda iti pagtaengan a saan a makabangon iti pagiddaanda. Adda dagiti aggusto a maikabil iti kasasaadtayo ngem ketdi agserserbida kadagiti ospital ken mangipapaay iti talged iti publiko wenno mangsalsalaknib kadatayo uray no pagpeggadan ti biagda iti maysa a disierto wenno kabakiran. Ti kinapudno a kabaelantayo nga ikuyog ti uray maysa a sabali pay a Santo tapno makiranud iti sakramento ket mangtulongto kadatayo a makarikna iti panagyaman ken ayat iti kinaimbag ti Dios.
Gapu ken ni Propeta Joseph Smith ken ti naisubli nga ebanghelio, mabilangtayo ti sabali pay a bendision nga addaantayo iti gundaway nga umawat ti sakramento iti tunggal lawas—nga insagana, binendisionan, ken impasa dagiti napusgan a katulongan ti Dios. Makapagyamantayo no ipatalged ti Nasantuan nga Espiritu kadatayo a dagiti balikas kadagiti kararag ti sakramento, nga inruknoy dagiti napusgan a priesthood holder, ket dinayaw ti Nailangitan nga Amatayo.
Iti amin a parabur a mabilangtayo, ti kadakkelan nga amang ket ti rikna ti pannakapakawan a sumangbay no makiranudtayo iti sakramento. Mariknatayto ti nain-indaklan nga ayat ken panagyaman iti Mangisalakan, a ti awan patingganna a sakripisiona ti nangaramid a posible ti pannakadalustayo manipud iti basol. Bayat ti pannakiranudtayo iti tinapay ken danum, malagiptayo a nagsagaba Isuna para kadatayo. Ket no mariknatayo ti panagyaman para iti naaramidnan para kadatayo, mariknatayto ti ayatna para kadatayo ken ti ayattayo para Kenkuana.
Ti bendision ti ayat nga awatentayo ket ad-adda a mangpalakanto kadatayo tapno agtungpal iti bilin a “kanayon manglaglagip Kenkuana.”5 Mabalin a mariknayo pay ti ayat ken panagyaman, kas iti pannakariknak, para iti Espiritu Santo, nga inkari ti Nailangitan nga Ama a kanayonto nga adda kadatayo no agtalinedtayo a napudno kadagiti katulagan nga inaramidtayo. Mabilangtayo amin dagita a parabur iti tunggal Domingo ken mariknatayo ti panagyaman.
Ti Sabbath ket naan-anay pay a panawen a manglagip iti katulagan nga inaramidtayo kadagiti danum ti panagbuniag tapno ayaten ken pagserbiantayo dagiti Annak ti Nailangitan nga Ama. Ti panangipatungpal iti dayta a kari iti Sabbath ket pakaibilangan ti pannakiraman iti klase wenno korum nga addaan iti naan-anay a panggep tapno mangpatibker iti pammati ken ayat kadagiti kakabsattayo a kaduatayo idiay. Dayta a kari ket ibilangna ti siraragsak a panangipatungpaltayo kadagiti calling wenno awagtayo.
Agyamanak iti adu a Domingo a nangisuruak iti korum dagiti deacon iti Bountiful, Utah, kasta met iti klase ti Sunday school iti Idaho. Ket nalagipko pay dagidi panawen a nagpaayak kas assistant iti asawak iti nursery, a ti kangrunaan a trabahok ket mangted ken mangpidut kadagiti ay-ayam.
Adu a tawen sakbay a nabigbigko babaen ti Espiritu a ti simple a serbisiok para iti Apo ket napateg iti biag dagiti annak ti Nailangitan nga Ama. Masdaawak ta sumagmamano kadakuada ti nakalagip ken nagyaman kaniak kadagiti kabarbaro pay laeng a panagserbik kadakuada para iti Apo kadagita nga aldaw ti Sabbath.
Kas met no dadduma a ditayo kabaelan a makita dagiti bunga ti bukodtayo a serbisio a naited iti Sabbath, ditayo kabaelan a makita dagiti dagup a bunga ti dadduma pay a katulongan ti Apo. Ngem siuulimek a bangbangonen ti Apo ti pagarianna babaen dagiti napudno ken napakumbaba a katulonganna, a di unay naipakpakaammo, iti nagloriaan a masakbayanna iti milenio. Kasapulan ti Espiritu Santo tapno makita ti dumakdakkel a ngayed.
Dimmakkelak a mapmapan kadagiti miting ti sakramento iti bassit a branch ti New Jersey nga adda laeng sumagmamano a bilang dagiti miembro ken maysa a pamilia, ti bukodko a pamilia. Pitupulo-ket-siam a tawen ti napalabas, nabuniaganak idiay Philadelphia iti kakaisuna a kapilia a binangon ti Simbaan a nagun-odmi iti Pennsylvania wenno New Jersey. Idiay nga adda idi maysa a bassit a branch iti Princeton New Jersey, adda itan dua a dadakkel a ward. Ket dua laeng nga aldaw ti napalabas, rinibribu nga agtutubo ti nagpabuya iti maysa a parambak sakbay ti dedikasion ti Philadelphia Pennsylvania Temple.
Idi baritoak, naawaganak a kas maysa a district missionary a pagdaydayawanmi kadagiti Domingo iti kakaisuna a kapilia iti Albuquerque, New Mexico. Ita, addan maysa a templo ken uppat a stake.
Pimmanawak iti Albuquerque tapno mapanak agadal iti Cambridge, Massachusetts. Adda maysa a kapilia ken maysa a district a mangsakup iti kaaduan a paset ti Massachusetts ken Rhode Island. Nagmanehoak kadagiti turod dayta napintas a pagilian a mapan kadagiti miting ti sakramento iti babassit a branch, kaaduanna a maup-upaan a babassit a pasilidad wenno babassit a naulit a naimodelo a balbalay. Ita, addan maysa a sagrado a templo ti Dios iti Belmont, Massachusetts, ken sumagmamano a stake iti nadumaduma a beddeng ti pagilian.
Ti diak makita a nalawag idi ket ti panagibukbok ti Apo ti Espirituna kadagiti tao kadagita a babassit a miting iti sakramento. Mariknak idi, ngem diak nakita ti kadakkel ken panakaipatungpal dagiti panggep ti Apo a mangbangon ken mangitan-ok iti pagarianna. Maysa a propeta, babaen ti paltiing, ti nakakita ken nangirekord iti no ania ti mismo a makitatayo itan. Kinuna ni Nephi a saan a dakkel ti kadagupan dagiti bilangtayo ngem ti lawag ti amin ket agbalin a napintas a buya.
“Ket napasamak a nakitak ti simbaan ti Kordero ti Dios, ket bassit ti bilang daytoy. …
“Ket napasamak a siak, ni Nephi, naimatangak ti bileg ti Kordero ti Dios, a bimmaba kadagiti santo ti simbaan ti Kordero, ken kadagiti natulagan a tao ti Apo, a naiwaraswaras iti amin a dagdaga; ket igamda ti kinalinteg ken addaanda iti nadayag a bileg ti Dios.”6
Iti daytoy a dispensasion, ti kastoy met a panangiladawan ti propeta iti kasasaad ken dagiti gundaway nga agur-uray ket nairekord iti Doktrina ken Katulagan:
“Diyo pay naawatan no kasano kaindaklan dagiti bendision ti Ama iti bukodna nga ima ken naisagana para kadakayo;
“Ket diyo pay la kabaelan amin a banag ita; nupay kasta, agragsakkayo, ta iturongkayo. Kukuayo ti pagarian ken dagiti paraburna, ken kukuayo pay dagiti kinabaknang ti kinaagnanayon.
“Ket isu nga umawat iti amin a banag a siyayaman maidaydayawto; ket mainayonto kenkuana dagiti banag iti daytoy a daga, iti maminggasut, wen, ad-adu pay.”7
Nariknak ti panagbalbaliw ti dumakdakkel a panagyaman kadagiti parabur ken ti ayat ti Dios a dumakdakkel iti amin a disso ti Simbaan. Kasla alisto a napasamak kadagiti miembro ti Simbaan kadagiti panawen ken lugar nga adda pannubok iti pammatida, a pagkararaganda iti Dios para iti tulong tapno agtultuloy iti panagbiagda.
Dagiti panawen a palabsentayo nga addanto kadakuada dagiti narigat a pannubok, kas iti inaramidda kadagiti tao ni Alma iti panangadipen ti naulpit nga Amulon, a nangipabaklay kadakuada kadagiti imet a nadagsen unay a baklayenda:
“Ket napasamak a dimteng kadakuada ti timek ti Apo iti panagsagabada, a kinunana: Yangadyo dagiti uloyo ket maliwliwakayo, ta ammok ti katulagan nga inaramidyo kaniak; ket makitulagak kadagiti taok ken wayawayaak ida iti pannakaadipen.
“Kasta met a palag-anek dagiti dagensen nga adda iti abagayo, tapno diyo ida marikrikna iti kaaddada iti likudyo, uray pay iti pannakaadipenyo; ket aramidek daytoy tapno agbalinkayo a saksi kalpasanna, ken tapno maammuanyo nga awan duadua a siak, ti Apo a Dios, sarungkarak dagiti taok iti panagsagabada.
“Ket ita napasamak a limmag-an dagiti dagensen a naipabaklay ken ni Alma ken dagiti kabsatna; wen, pinatibker ida ti Apo tapno laklakaenda nga ibaklay dagiti dagensenda, ket pinaiturayanda a siraragsak ken siaanus iti amin a pagayatan ti Apo.”8
Dakayo ken siak dagiti saksi a no tinungpaltayo dagiti katulagan iti Dios, nangnangruna no narigat daytoy, dinengngegna dagiti kararagtayo iti panagyaman iti inaramidnan para kadatayo ken sinungbatanna ti kararagtayo para iti pigsa nga agibtur a sipupudno. Ket saan laeng a naminsan no di namin-adu pay a pinaragsaknatayo kasta met a pinapigsanatayo.
Nalabit a pampanunotenyo no ania ti maaramidyo nga agtungpal ken agrukbab itoy nga aldaw ti Sabbath tapno ipakitayo ti panagyamanyo ken tapno papigsaenyo ti bagiyo ken dagiti dadduma kadagiti pannubok nga agur-uray kadakuada.
Mairugiyo itan nga addaan iti bukod ken sangapamiliaan a panagkararag iti panagyaman para iti amin nga inaramid ti Dios para kadakayo. Makapagkararagkayo tapno ammuen no ania ti ipaaramid kadakayo ti Apo tapno agserbi Kenkuana ken iti dadduma. Nangnagruna pay, makapagkararagkayo tapno maibaga kadakayo ti Espiritu Santo maipapan ti maysa a tao a malmalday wenno agkasapulan a kayat ti Apo a papananyo.
Maikarik kadakayo a masungbatanto dagiti kararagyo, ken bayat ti panagtignayyo a mayannurot kadagiti sungbat nga awatenyonto, makasarakkayto iti rag-o iti Sabbath, ket malapunosto ti pusoyo iti kinamanagyaman.
Panaeknekak nga am-ammo ken ay-ayatennakayo ti Dios nga Ama. Ti Mangisalakan, ni Apo Jesucristo, ket nagikaro para kadagiti basbasolyo gapu iti ayatna para kadakayo. Isuda, ti Ama ken ti Anak, ammoda ti naganyo kas iti pannakaammoda iti nagan ni Propeta Joseph Smith idi nagpakitada kenkuana. Paneknekak a daytoy ti Simbaan ni Jesucristo ken dayawenna dagiti katulagan nga aramiden ken pinabaroyo iti Dios. Agbalbaliwto ti mismo a kinataoyo tapno agbalin nga ad-adda pay a kas iti Mangisalakan. Mapapigsakayto a maibusor iti sulisog ken maibusor kadagiti rikna ti panagduadua maipapan ti kinapudno. Makasarakkayto iti rag-o iti Sabbath. Ket ikarik kadakayo iti nagan ni Apo Jesucristo, amen.
© 2016 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/16. Pannakaanamongna a maipatarus: 6/16. Pannakaipatarus ti First Presidency Message, November 2016. Ilokano. 12871 864